Filipai 1 - Basef Buꞌwami Godi

¹ Ae' Pol aloma Timoti afa' biafa Krais Jisasi atofa wanda' opeh ananimi. Wanda' basef amama mafe'mago ipe' amam nematawa Godi pape Filipai. Basef amama mafe'ma ipe' pape la'ifipa paloma Jisas paloma agufumi ipe'imi maloma amam magiambamam wapoti'.

² Afa' biafa wa'i God Ahalomapa ape'inai noloma Dembinai Jisas Krais migiabamepa na'a monda'epa petaga la'ifipa monda' opalef ipe'imi mope awanem.

Pol nanifela God

³ Maina nemaf ae' okom napoma ipe', anifela God ae'anai ma ipe'.

⁴ Ae' endanifela maina nemaf anda' betena ipe' hipei.

⁵ Dei' main, ipe' panda' waf bu'unai pagiambame awalipasa basef bu'wami Godi. Fowa' damba damba ipe' pame' basef amama bu'wami pembale'ef pandao'oma pape la'ela'ef palome pafi'i pafi'i pataga dei'.

⁶ Ea' ae' egawa endilisi, God nafela opeh bu'wami nomon opalef ipe'imi, anona nemaf nonda'am nefe' nefe' nembefam nemaf anama Krais Jisas niefi'ianai.

⁷ Ae' ahapila ipe' okom ae'anai, egawa God nigiambamepa dei' anona nemaf wapoti' na'ama etin. Amama andeande'. Dei' main, ape' manda'kolas etin manda' opeh ananimi. Nemaf anae' dei' ape kalabus o nimeguf hiami ali' awalapa basef amama bu'wami epes hiesi agiambamasa sogawa basef amama endilisimi atom, nimeguf amama hiami God nagiambamapa na'a.

⁸ Ae' a'iam endilisi ma naep Godi. Anan nogawa dahowe Krais Jisasi nafela ae' ea' okom nohafel endilisi nainailipa ma iti ipe' hipei.

⁹ Ae' anda' betena ipe' a'i ipe' ukup mimila God pendao'oma pila sahin owan hiesi ma waf anama nataga lu'una ma ipe' neloma gawa hianai neloma nomonas bu'wami pegawa basef Godi andeande'.

¹⁰ Anda' betena nambimb pewaloga waf hianai andeande' pegawa maina waf bu'unai o aonai. Ama nemaf Krais niefi'ianai pepe bo'wepa ofagema a'epa ma naep Godi.

¹¹ Ae' anda' betena waf bu'unai Jisas Krais nawalapanai nambimb nepe si'ina ma ipe', nese'ana agel lu'unai Goda epes hiesi siti pepel nafifili Ananinai.

Pol nanda' kalabus. Amama atom dei' basef bu'wami mafe' hi'agoma epes hiesi same'am

¹² Alupipei, dei' a'i ipe' pegawa amamaga mali' matagama ae' ma anda' kalabus, ina masopama basef bu'wami Godi, owa'. Amama manda'am mafe' lu'um endilisi ma hiesi seme'am.

¹³ Ea' soldia amama Romi mumafi ipat dembinai gavmani maloma enis epes sape na'ae esis wapoti' sogawa anda' kalabusa agel Kraisi.

¹⁴ Esis sahin owan hiesi ukup mapoma ae' anda' kalabus. Ea' opalef asasimi la'ifim sape la'ifisa Dembinai, sakwaha umbamahas dei' saitu la'ifis la'ela'ef sikila' fowa' sape sawalapa basef Godi.

¹⁵ Endilisi, enis epes kowalasa ae' efa' agel aposel ma'i mofa' agof lu'wami sowalapa basef Kraisi. Ea' enis epes saitu la'ifis sa'i sonda' waf bu'unai sagiambame ma owalapa basef bu'wami Kraisi.

¹⁶ Isima sogawa ae' ape na'ae ma anda' basef bu'wami Godi mataga la'ifim. Ea' esis ukup maimaili sawalapa basef bu'wami.

¹⁷ Ea' epes isima kowalasa ae'i dei' sawalapa basef Kraisi. Esis ina ukup mohafel endilisi ma sanda' opeh sefela agel Kraisi, owa'. Esis sanda'am na'ama ma sefela agof asasimi atom. Sa'i sowatani anom nimanimi wapoti' ma ae' ape la'ela'ef anda' kalabus.

^18-19 Ea' hapaiwei. I'i esis ukup mimila waf endilisimi ma sowalipasa basef Kraisi o i'i enis ukup mimila waf owa' endilisinai ma sowalipasam, andanifel alomas. Dei' main, sawalapa basef Kraisi atom. Ea' nambimb endanifel wapoti' ma amama. Ipe' penda' betena ae' ma Ambal Bu'unai Godi Jisas Kraisi nagiambame. Amama atom dei' egawa nambimb ekwaha kalabus.

²⁰ Ae' okom na'i egawa endilisi nambimb ae' ina ambal aona ma ekwaha basef Godi, owa'. Dei' wapoti' ae' okom la'ifina ewalipasa basef Ananimi si'i fowa' anda'am. I'i epe namowe o ega', ae' okom na'i amamaga anda'am alop ae'anai nambimb mefela agel Kraisi lu'una.

²¹ Ofagema ma ape namowe na'ama. Ape namowe ma Krais atona. Ea' i'i ega', epe andeande' elomana efa' amamaga God nese'e pe bu'unai nikila' dei' ape.

²² I'i ata' epe namowe la'ela'ef etap anae', nambimb enda' opeh bu'wami Godi. Ea' ae' ata' ila maina eaf? Ae' ina egawa.

²³ Ae' okom biefina anama. Ae' okom na'i efe' epe eloma Krais. Na'ama andeande' endilisi ikila' pe etapanai.

²⁴ Ea' i'i ae' ata' epe etap anae', ae' la'ifiwi ma igiambamepa. Na'ama andeande' ma ipe'.

²⁵ Ae' egawa amama endilisi. Ea' egawa nambimb ata' epe la'ela'ef enda' opeh elomepa igiambamepa ma pendanifel pembale'efa Krais pikila' pali' pape.

²⁶ Ama nemaf anama efo'o etaga epe elomepa, ipe' pendanifel ma Krais Jisas endilisi.

Esis Filipai sa'i saloma Pol sanda' wandaf

²⁷ Dei' fe' ipe'inai nefe' bo'ona nila basef bu'wami Kraisi. I'i ae' efe'mago ipe', o i'i eme' basef atoma ipe', ea' hapaimi. A'i ata' egawa ipe' paitu la'ifipa opalef etifim pandagigiambanama pafela esisa sembale'efa basef amama bu'wami

²⁸ Ma ipe' ina umbamehepa ma naumbih ipe'isi, owa'. Amama mihi'ambas na'ama. Nambimb esis hegililas hi'ilas, ea' ipe' owa'. Anona nemaf God nofa'epa pitanimani pepe andeande'.

²⁹ Dei' main, God nase'epa waf bu'unai ma penda' opeh Kraisi. Anan ina nase'epa waf pembale'efana atona, owa'. Anan nase'epa waf anama pefa' nimanimi wapoti' ma agel Ananinai.

³⁰ Fowa' efa' nimanimi lu'wami ma agel Kraisi aitu la'ifiwi si'i anda' wandaf. Amama ipe' patolom pegawam. Ea' dei' pame' ae' ata' anda'am etin la'ela'ef. Ipe' pepe pendao'oma pelome ma opeh Kraisi si'i wandaf anama.