Efesus 5 - Basef Buꞌwami Godi

Ape' mefe' mila waf bu'unai ma howalagon

¹ Ipe' pila waf God nanda'anai. Anan okom nainailipa pape si'i awasi ananipei.

² Ipe' pila waf anama ukup maimailasanai si'i Krais okom nainaila ape' hiapai nakwaha ambal Ananinai nagiambamapa. Anan nase'ana alop Ananinai God naga' nondolalimana si'i ofa bu'unai alogw bu'wami ma'ami.

³ Waf anama hianai so'a waolanai, neloma waf aonai alop atonai neloma kowalasanai, ipe' ina penda'ana, owa'. Basefa waf anama ina mataga la'afena ipe', owa'. Dei' main, ine' andeande'ma ape' amam nematawa Godi manda' waf anama, owa'.

⁴ Ipe' ina penda' basef awami o basef mamumami awami, o basef salamalimi awami, owa'. Waf anama ina andeande', owa'. Andeande'ma ipe' pinifela God.

⁵ Ipe' pegawa ma emi egafis sanda' waf aonai so'a waolanai, o emi egafis ukup awami kowalasa amamaga enis epesi si'i saila god baso'omunai, epes isima ina anona nemaf suwis wambota Godi naloma Kraisi, owa'.

⁶ Ipe' pindumafuma andeande'. Na'ama peme' basef enis epesi atom somboma ukup ipe'imi penda' waf anama aonai. Dei' main, waf anama God okom wandafuna ma epes isima sanda'anai sosambala basef Ananimi.

⁷ Amama atom dei' ina penda' waf anama pendao'oma pelomas, owa'. Hapainai.

⁸ Dei' main, fowa' ipe' ata' panda waf aonai si'i pape owamb. Ea' dei' pape la'ifipama paloma Jisas Dembinai, amama atom dei' nahaponepa papoma si'i pape howalagoma. Ipe' pefe' si'i epes safe' alip howalagoma.

⁹ Epes safe' alipi sawalapai waf bu'unai, endilisinai hianai.

¹⁰ Ea' ipe' pendandomba ma pegawa maina waf Dembinai okom na'ianai.

¹¹ Ipe' ina peloma epes isima sanda' waf aonai si'i sape owambi pendao'oma atogon etin, owa'. Waf anama wafinai atona ina nola gwa'imi bu'wami, owa'. Ipe' pekwaha epes isima hiesi sanda' waf anama aonai.

¹² Dei' main, ae' ina ewalapa basefa waf anama aonai epes isima sandambaho' sanda'anai, owa'. Ae' ambal aona ie'iam i'i basef amama.

¹³ Ea' maina waf nagwahis mafifili mawalapanai, ofagena nataga nape nandawalap.

¹⁴ Dei' main, maim amamaga mataga alihim mandawalap, amama mataga mape howalagoma. Amama atom dei' anom basef mape ma'i na'ama ma'i, “Ipe' epes pa'ihi dei' hafel mehip pekwaha koh! Ipe' pehafel hi'agif ea' Krais nese'epa howalagon mififima ipe'.”

¹⁵ Ipe' pape howalagoma ea'. Ea' pimafia fe' pe ki ipe'inai. Ipe' ina pepe si'i epes isima gawa a'asi, owa'. Ipe' pepe si'i epes isima gawaisi.

¹⁶ Dei' ipe' nemaf ata' napomepa ma penda' waf Godi. Ea' penda'ana la'ela'ef nemaf anae'. Dei' main, nimeguf amama sanda' waf aonai atona.

¹⁷ Ea' ipe' dei' ina pepe si'i epes gawa a'asi ukup mese'epa, owa'. Pegawa andeande'ma okom Dembinai na'iami.

¹⁸ Ea' ipe' ina pea' embel la'ifimi pehaga pegaol, owa'. Waf anama nahambombaga ipe'. Ipe' aho'ma Ambal Bu'unai Godi nopaipa si'ipa.

¹⁹ Ea' pi'i basef bu'wami atom peloma enis epes hiesi ma penda' awalef bu'wami mape Buk Songi moloma awalef lotuwimi moloma awalef manda' epesi sataga la'ifis. Ipe' penda' awalef pefela agel Dembinai la'ifipa maloguf moloma ukup ipe'imi.

²⁰ La'ela'ef pendanifela ahalomapa God ama amamaga hiami ma agel Dembinai ape'inai Jisas Kraisi atona.

Basef epes isima sandaso'amai

²¹ Ipe' pila okom Kraisi ea' pefe' owina esis alupusi ipe'isi.

²² Ipe' nematawa pila ukup moloma basef amam wauhiamipei si'i paila okom Dembinai.

²³ Dei' main, aman nape balaga nali'ma akwa'w, si'i Krais nape balaga nali'ma sios amam nematawa Godi. Ea' esis hiesi si'i alop si'ina Ananinai. Epes isima Anan atona nofa'as sotanimani.

²⁴ Epes isima sios safe' owina Krais, ea' na'ama etin ipe' nematawa wapoti', pepe owina amam wahupipa ipe'imi.

²⁵ Ipe' amam wapoti', ukup mimila wauhiamepa ipe'iwai, si'i Krais okom nainaila sios amam nematawa Godi, naga' naloma ambal ananinai naho'ofas.

²⁶ Anan nanda'am na'ama ma sotaga epes Godi etis bo'wes si'i nasa'opas embel sataga bo'wesa basef ananimi.

²⁷ Krais nanda'am na'ama ma sataga bo'wes andeande' sape Ananisi etis ma amamaga awami a'as. Ea' sape bo'wes andeande', amamaga awami a'as.

²⁸ Dei' na'ama etina ipe' amam ukup mimila awau wauhiamepa si'i ukup maila alop ipe'inai atona. Emi epen okom naila waulu'mana anani'wi, anan okom naila anan wapoti'. Dei' main, esis sataga etifis.

²⁹ Ape' hiapai mogawa ina anona aman atotona nandaiwa'ma alop si'ina ananinai nahana, owa'. Amam amama hiami manda' gwa'aimi mumafiana andeande', si'i Krais numafi sios amam nematawa Godi.

³⁰ Dei' main, ape' epes wa'awa'ana alop Kraisi.

^31-32 Basef amama fowa' mape mandambahi'i, lu'wami nomonas hiami. Dei' mataga alihim si'i Buk Baibel na'iam na'i, “Aman nekwaha mamasana ananisi nefe' nope la'ela'ef noloma waulu'mana anani'wi, esis bias sataga alop atotona.” Ae' okom na'i basef amama na'i Krais atona naloma sios amam nematawa Godi.

³³ Ea' basef amama ofagema ma'iam na'ama wapoti' ma ipe' epes atona etin na'ama ma'i, “Ipe' amam hipei ukup mimila wauhiamepa ipe'iwai si'i ukup maimaila ipe' etipa.” Ea' ipe' nematawa hipei wapoti' pefela agofa wauhupipa ipe'imi pinifelom pila basef amamumi.