Efesus 4 - Basef Buꞌwami Godi

Ape' Kristen si'i alop si'ina Kraisi

¹ Basef amama mali'i endilisimi atom. Ea' dei' a'i efela ukup ipe'imi ma basef la'ifimi amama. A'i fe' pe ipe'inai nefe' dende'ma waf bu'unai okom Godi na'ianai nofalapa ma milana. Ae' anda' kalabusa maol anama Dembinai dei' a'ipipa na'ama afela ukup ipe'imi.

² Ipe' pepe la'afen endilisi ma epes hiesi penda'as sa'osa'ombemas. Esis sonda'mepa waf aonai, pinindifa ukup ipe'imi la'ifim pepe pitilis. Ipe' ina ukup mohafel aom, owa'. Ukup mimila sahin owan ipe'isi pigiambamas pefa' nimanimi pelomas.

³ Ambal Bu'unai Godi nakolasepa mape opalef etifim. Ea' dei' penda' maol la'ifipa penda' waf anama neloma waf ukup awanemi atom. Waf anama opalef etifimanai nandawalap nape na'ama.

⁴ Alop etifina, Ambal Bu'unai Godi etifina. Amama na'ama etin si'i amamaga etifim, God nali' nofalepa pape pehafana.

⁵ Dembinai atotona, bale'ef etifina, baptais etifim.

⁶ God ahalomapa ape' hiapai anan atotona nape dembinai ma ape' hiapai mombale'efana. Anan nape anama hiagoma, ea' nape nomona ape' hiapai.

⁷ Ape' hiapai atona etin mofa' anom amamaga bu'wami, dende'ma ikwaf Krais nawalogam nase'apam na'a.

⁸ Si'i buk Baibel na'iam na'ama na'i, “Nemaf anama anan nafe' gani ilif, nefa' epes hiesi sanda' kalabusi nafe' nalata ilif. Ea' nase'asa presen bu'unai esis.”

⁹ Basef ma'i, “Nalata ilif,” ofagema ma'i main? Amama ma'i Anan nali' nafi'i nowala gani etap owin endilisi.

¹⁰ Ea' aman anama atona nowala etap owin endilisi dei' notambel nalata ilif wapoti' nafe' gani ilif endilisi nikila' otaga ma nanda' amamaga hiami hi'alam si'im endilisi ma Anan atona.

¹¹ Anan atona nase'apa presen bu'unai na'ama. Anom amam nandandepama manda' maol aposel, anom nandandepama manda' maol profet. Ea' anom nandandepama manda' maola mefe' mi'ipasa basef bu'wami Kraisi epes hiesi. Ea' anom nase'ama gawa mope pasto tisa mumafi esis Kristen mawalipasa basef bu'wami Godi ma monda' esis amam nematawa Kraisi sotaga la'ifis.

¹² Krais nase'apa presen anama bu'unai ma manda' ape' amam nematawa Godi mondondombam mope la'ifipama monda' maol bu'unai Ananinai. Ape' amam nematawa Godi si'i alop Kraisi. God nase'apa presen anama bu'unai ma ape' mefa'ana manda' hiesi amam nematawa Kraisi sataga la'ifisa sanda' maol Godi.

¹³ Ea' mope mefe' mefe' ma anona nemaf ape' hiapai mombale'efana motaga opalef etifim endilisi ma bale'ef ape'inai noloma gawa etifina ma anan Nogalomana Godi. Ape' motaga epes la'ifipa endilisi mombale'efana si'i epes dambes ea', motaga na'ama etin si'i ikwafa waf bu'unai Kraisi atona.

¹⁴ I'i ape' motaga na'ama, ape' ina ata' mape mundati si'i awasi gawa a'asi wapoti', owa'. I'i epes isima sogawa endilisi sakikipapa ma waf baso'maimi si'ipapa basef hiami mamumami, amama ina mamboma ukup ape'imi mape si'i naoh makoto'ma kanu. Amama ina makoto'mapa manda'apa si'i uf nafapusapa mafe' mafi'i, owa'.

¹⁵ Ape' ukup la'ifim ea' mi'i basef endilisimi atoma waf ukup maimailasanai. Ape' mi'i basef endilisimi na'ama ma mila waf Kraisi bu'unai hi'ilana. Ea' motaga la'ifipa mikila' waf mali' mailanai. Ape' monda'am na'ama mefe' motaga dende'ma ikwaf Kraisi, Anan dembinai ma ape'.

¹⁶ Anan atona dembinai ma ape' Kristen hiapai. Ea' ape' Kristen hiapai si'i alop wa'awa'ana nape etifina la'ifipa mandagigiambanama etin si'i gigililimb mowa' nigis hiami lu'wami so'umi motaga la'ifimi. I'i alop wa'awa'ana hianai nonda' maol nondahama ikwaf Anan na'ianai, alop anama si'ina nape na'ama. Ape' amam nematawa Kraisi mandagigiambanama mape la'ifipa mikila' fowa' mape. Alop anama nataga la'ifina etina ukup maimailas sandagigiambanama.

Ape' Kristen mofa' waf dambainai

¹⁷ Dei' a'i i'ipipa anom basef. Ipe' pape la'ifipa paloma Jisas Dembinai dei' a'ipipa basef la'ifima ma agel Ananinai. Ipe' ina ata' pila waf anama sololama Godi sailanai, owa'. Hapainai. Epes isima ukup asasimi mapoma waf falafunai atona.

¹⁸ Gawa ma ukup asasimi si'i owamb atona. Esis sololama gawa bu'unai, satotopa' basef, opalef asasimi mase'as. Amama atom dei' sape ande' laogona ambal namunai Godi.

¹⁹ Esis ina ata' ambagof aoma waf anama aonai asasinai, owa'etin. Safe' sawis endilisi ma waf aonai naninani hianai naloma waf aonai so'a waolanai ma saila waf aonai hianai. Saila waf anama la'ela'efa ukup mohafel endilisi ma sanda' waf anama aonai wapoti'.

²⁰ Ea' ipe' ina pelafa waf anama ma Krais, owa'.

²¹ Ae' egawa endilisi ipe' pegawa basef Kraisi ea'. Ipe' pape la'ifipa paloma Anan, amam mawalipipa ma basef amama endilisimi Jisas nihi'ambapa.

²² Fowa' ipe' pelafa basef amama na'ama. Dei' kwahana opaf anama fowa'inai ma waf aonai ipe' panda'anai. Opaf anama ofagonama waf baso'mainai anama dei' nape nahambombagapa. Dei' kwahona opaf anama fowa'inai.

²³ Ea' ukup ipe'imi motaga dambaim

²⁴ pefa' opaf dambainai. God nanda' opaf anama dambainai nataga si'i anan atona ma waf bu'unai endilisinai.

²⁵ Ea' ipe' hipei pekwaha waf baso'mainai ma pi'i basef endilisimi atoma epes hiesi. Dei' main, ipe' pegawa ape' hiapai mape alop wa'awa'ana ea' mataga alop atotona.

²⁶ I'i opalef ipe'imi aom mope la'ela'ef, ipe' pindumafuma andeande'. Na'ama ipe' penda' waf aonai opalef aom la'ela'ef pefe' aon newala naso'. Na'ama owa'.

²⁷ Na'ama piwisi' utama Satan.

²⁸ Emi egafis sanda' wali, esis ina ata' sonda' wal wapoti', owa'. Esis dei' sonda' maola lagof asasimi ma atuwasi sotagama amamaga sose'asam epes isima amamaga a'asi.

²⁹ Basef awami ina motaga malogof ipe'imi, owa'. Pi'i basef bu'wami atom pi'ipasam mandahama fe' pe ki asasinai. Penda'am na'ama ma pigiambama epes isima some' basef ipe'imi.

³⁰ Ipe' ina penda' anona waf aonai ma penda' Ambal Bu'unai Godi aona, owa'. Anan anona ikwaf Godi ma God nandandepepa ma pape ananipei etipa si'ipa ma anona nemaf notagahepa waf aonai nofa'epa petanimani pepan andeande'.

³¹ Ipe' pekwaha waf hianai aonai opalef aomunai migimigah, ukup awomunai basef findiwaimi awami. Waf anama aonai hianai nahambombaga epesi.

³² Ipe' penda' waf so'umbilinai ma esis alupusi ea' piti uwahipis. Ipe' pekwahomasa waf aonai esis sanda'mepanai, si'i God nakwahomepa waf aonai ipe' panda'anai ma agel Kraisi.