Aposel 6 - Basef Buꞌwami Godi

Esis sandandepa amam 7-peleima migiambama amam aposel manda' maol Godi

¹ Nogota anama esis alupusi saila Jisasi sataga hias endilisi. Ea' esis Juda hiesi enis sa'i diga Griki safitap saloma enis Juda sa'i diga Hibrui ea' sa'i, “Nimeguf hiami ipe' pagiambama esis amam nematawa isima gwa'aimi maim a'asi, ea' anowa nematawa alifiwai ape'iwai owa'.”

² Ea' amam aposel 12-peleim mati nimanimi amama ea' mofalai esis alupusi isima hiesi safi'i ma'ipas ma'i, “I'i afa' okwaha maol anama owalipasa basef Godi ma otambe'am gwa'aimi, na'ama ina andeande', owa'.

³ Ipe' Kristen alupipei, ipe' ata' pendandepa anom amam 7-peleim la'afena ipe' mape andeande'ma naep esis amam nematawai, Ambal Bu'unai Godi nape napaim si'inama amam nomonas bu'wami mapaimi. Ama afa' onda'am mopoma mumafi maol anama.

⁴ Ea' afa' opoma onda' beten etin ea' wi'ipasa basef Godi amam nematawa wigiambamas.”

⁵ Amam nematawa hiesi ukup ma'i basef amama. Ea' sandandepa Stiven, anan nembale'efa Jisasi ma Ambal Bu'unai Godi napaina nape si'inamana. Ea' sandandepa Filip naloma Prokorus maloma Nikanor naloma Timon naloma Parmenas naloma Nikolas. Aman anama Nikolas Antiokinai, fowa' nafi'i naila waf esis Judai.

⁶ Ea' esis hiesi sanda' amam amama maitu felefele'ma naep amam aposeli mawamona lagofa amam manda'mam betena monda' maol anama.

⁷ Ea' basef Godi mafe'agon hi'alogon. Amam nematawa hiesi sape Jerusalemi sataga alupusi Jisasi sataga hias endilisi. Ea' pris amama hiami wapoti' mombale'efa Jisas mailana.

Amam Juda manda' kotima Stiven

⁸ God nandahowema Stiven nagiambamana. Ea' nanda'ana la'ifina, nanda' ikwaf la'ifinai hianai naninani la'afena esis amam nematawa.

⁹ Ea' anom amam mohafel ma'i basef mandahihianama maloma Stiven. Amam amama fowa' manda' maol mape owina enis epes ea' dei' mape wafifim. Ea' sofalana amam wambel Sairini naloma Aleksandria anona etap hiagoma Silisia naloma etap hiagoma Esia.

¹⁰ Ambal Bu'unai Godi nase'ana gawa bu'unai Stiven. Amam amama hiami ma'i basef mandahihianama maloma Stiven ea' amam ina la'ifima mi'i basef mikila'ana, owa'.

¹¹ Ea' manda' anona waf baso'maimi ma moha Stiven noga'. Ea' mofa'ai anom amam mase'am anama otamba ma'i basef ma'i, “Afa' wame' anan na'i basef nanda' Moses findiwana ea' nanda' God findiwana wapoti'.”

¹² Ea' amam mafela opalef esis amam nematawai saloma amam agufumi asasimi maloma amam mawalipasa mi'uli Godi. Ea' esis safe'ma Stiven sombalo'ana sofa'ana safe'ma amam dambami Juda mumafi koti.

¹³ Ea' sanda' anom amam maitu ma mambaso'mana ma anom basef baso'maimi. Amam amama ma'i, “La'ela'ef aman anama na'i basef awami ma ipat lu'unai Godi naloma mi'uli fowa' gani God na'ipa Mosesanai.

¹⁴ Ape' mame' anan na'i, ‘Aman anama Jisas Nasaretinai nambimb nohambombaga ipat anama lu'unai Godi ea' nonda' anona waf dambainai noho'ofa waf hianai fowa' gani Moses na'ipapanai.’ ”

¹⁵ Ea' amam hiami manda' kolas etifigin ipat esis Juda sanda' kotanai mati Stiven ea' mati amaga ananinai nafifil nataga si'i amaga anona enseli.