Aposel 3 - Basef Buꞌwami Godi

Pita nanda' aman bo'wagah mondola'anai nataga bo'ona

¹ Nogota anama esis Kristen sanda' betenanai, Pita naloma Jon mafe' ipat lu'unai Godi ma'i monda beten. Nemaf anama ea' wambomota 3 klok.

² Ea' anona aman bo'wagah mondala'anai nape anama, mama'wana anani'wi fowa' kolana nape na'ama la'ela'ef. Nimeguf hiami la'ela'ef esis sanda'ana sofa'ana sahaponana nape ipat lu'unai Godi ande' felefele'ma uta sa'i bu'unai. Sanda'ana na'ama ma nondailasa moni gwa'aimi maima esis amam nematawa safe'ma lotu.

³ Aman anama nati Pita naloma Jon ma'i mofe' muwis ipat anama, nahali' amam biam ma mose'ana anom otamba anan.

⁴ Ea' Pita naloma Jon mati anan titi titi ea' Pita na'i, “Ine' ata' niti afa' biafa.”

⁵ Ea' nandamboma nati amam, okom na'i mose'ana anom amamaga.

⁶ Ea' Pita na'i, “Ae' otamba siliwa gol a'e, ea' amamaga bu'wami a'i atuwasi iesi'inami amama. Ae' a'i pepel Jisas Krais Nasaretinai atona a'ipina, dei' hafel nitu nefe'.”

⁷ Ea' nahapila lagel da'isinai aman anama aonai nafelona. Ea' mehip etin bo'wagah maloma nembawa ananimi la'ifim mataga bo'om.

⁸ Ea' anan nitipa' nafe'. Ea' nalomom mafe' mawis ipat lu'unai Godi nomon nandanifel kwapi' etin naitu nalemb nafe' nafela agel Godi lu'una.

⁹ Ea' esis amam nematawa hiesi sati anan nafe' nafela agel Godi

¹⁰ ea' sogawana sa'i anan ma'una aman anama bo'wagah mandola'anai, fowa' nape la'ela'ef uta anama sa'i bu'unai ipat Godi lu'unai sanda' lotuwanai nape nandailasa moni maim. Esis sati anan bo'ona sohafel gegelalasis kwapete'as ukup matamea.

Pita nawalapa basef bu'wami na'iam ipat lu'unai Godi nomon

^11-12 Aman anama nandanifel ma nataga bo'ona ea' nahapila Pita naloma Jon ea' esis sasagih safi'i ma sotolona ilaf anama sa'i ilaf Solomoni. Pita nati epes isima, na'ipas na'i, “Ipe' epes Isrel, dei' maina ipe' gegelalasipa ma amamaga amama mataga? Dei' maina ipe' pati afa' biafa? Pa'i pepel afa'inai naloma waf bu'unai afa'inai atona wanda' aman anama nataga bo'ona nohafel nafe'? Owa'.

¹³ God anama bafapapa ape'imi Abraham naloma Aisak naloma Jekop manda' lotumanai, anan atona nanda'ana nataga bo'ona nafela agel Jisasi, nanda' maola Anani. Anan aman anama atona ipe' pandaiwa'mana pase'ana amam agufumi gavmani ma mahana naga'. Dembinai Pailat na'i notagahona nifi'i, owa'. Ipe'pandaiwa'mana pewa' alafugahana.

¹⁴ Ipe' pewa alafugaha aman bu'unai Godi. Ea' pahali'a Pailat mehipa anona aman aonai naha epes saga'i, ea' nakwahomepanai.

¹⁵ Aman bu'unai ofagena ma ambal namunai, anama ea' pahana naga'. Ea' God nafelona nohafel hi'agif wapoti' ea' afa' biafa wape amam ananifai owalapa basefa amama, wati anan nape namona endilisi.

¹⁶ Afa' biafa ombale'efa Jisas. Anan atona nafela bale'ef afa'inai, pepel ananinai atona nanda' aman anama bo'ona naep ipe'imi hipei. Pepel Jisasi atona dei' nanda' aman anama bo'ona endilisi patolona pegawana.

¹⁷ Endilisi, alupipei, ae' egawa ipe' ina pegawa andeande'ma dei' panda' waf anama aonai ma Jisas, owa'. Amam agufumi ipe'imi wapoti' amam na'ama etin.

¹⁸ Fowa' gani God nawalapa basefa amam profet hiami ma Krais, God nandandepana nasapa'ana nafi'i. Basef amama ma'i Krais nome' nimanimi lu'wami. Ea' waf anama dei' ipe' panda'anai, anama nandahama basef amama amamumi mataga mandawalap alihim.

¹⁹ Dei' ipe' pemboma opalef pila Goda nokwahomepa waf aonai ipe' panda'anai.

²⁰ Ipe' penda'am na'ama, nambimb Dembinai nese'epa pepel namunai ma ambagof ipe'imi. Ama nambimb nosapa' Krais nofi'mai ipe'. Aman anama fowa' gani God nandandepana ma ipe' ea'i, Anan Jisas.

²¹ Dei' napani heven nohafa nemaf anama God nonda' amamaga hiami motaga dambaimi wapoti'. Si'i fowa' gani na'ipipa basef Ananimi endilisimi atom ma amam profet ananimi bu'wami.

²² Amama si'i fowa' Moses na'iam na'ama na'i, ‘God Dembinai ipe'inai, anona nemaf nefela anona sahalomepa ipe'inai, nonda'ana nope profet si'i ae'. Ipe' peme' basef ananimi hiami pilana.

²³ Ea' emi egafis sondaiwa'ma some' basefa profet anama, esis ina ata' sope wambota Godi, owa'. Nambimb sefe' anagon.’

²⁴ Ea' amam profet hiami, Samuel naloma amam profet mataga magi'ma anani, hiami ma'iama nimeguf amama dei' mataga.

²⁵ Basef Godi endilisimi atom amam profet dei' ma'ipa ipe' pembale'am pilam. Fowa' gani God na'i basef la'ifimi amama naloma bafasepa ipe'isi. Dei' basef amama mataga alihim ma migiambama ipe' wapoti'. Fowa' gani anan na'ipa Abrahama anona nemaf Jisas notaga na'i, 'Anona nemaf bafasena ine'isi etis ae' igiambamas amam nematawa hiesi sope etap hiagoma i'ipasa basef bu'wami Ae'ami.’

²⁶ Ea' God nandandepa aman anama nanda' maol ananinai, nasapa'ana nali' nafi'mai ipe' ma nonda'epa petaga la'ifipa ma pemboma opalef atona etin pekwaha waf aonai ipe' panda'anai.”