Aposel 28 - Basef Buꞌwami Godi

Pol nape anona ailan Malta

¹ Afa' wafe' wataga andeande' akata, ea' wame' esis sa'i ailan anama Malta.

² Epes sape wambel anamai sanda'mafa waf bu'unai endilisi. Asaf nalai ea' nomanamb mafa. Ea' sakata nif sa'ipa afa' hiafai wafe' wapoma nif.

³ Ea' Pol nafe' nafela nif nawamonam. Ea' anona yul nahasi nape nif mahi'ana nawisi ande' nona' lagel Poli nalelef yuli mawis nomon.

⁴ Ea' esis amam nematawa wambelisi sati yul anama nana' lagel Poli nail, esis sa'i, “Endilisi, aman anama naha epes saga'i. Anan ina afuna naoh embel, owa'. Ea' god anama ape'inai nagwa waf andeande'i nandaiwa'ma nope ambal namunai wapoti.”

⁵ Ea' Pol niali' lagel yul pele'atana nafe' nowala nasef nif ea' anan ina awesina, owa'.

⁶ Ea' esis sape sahafana sa'i siti lagel nolata ea' anan nowa afuna, owa'. Esis sape satolona ea' ina sati anom amamamaga matagamana, owa'. Ea' samboma ukup sa'i basef sa'i, “Ahalomafa, Pol anon anona dembinai god.”

⁷ Etap nape felefele'ma anama afa' wapoma etap anama anona aman dembinai numafi esis sape ailan anamai, agilinama Publius. Aman anama nofa'afa wafe' ipat ananinai numafiafa andeande' wape walomana nimeguf wanom.

⁸ Publius ahalomana awesina na'oh. Alop ananinai nifina ea' naka embel atom. Ea' Pol nafe' nasa lagel alop ananinai nataga bo'ona wapoti'.

⁹ Amama mataga ea', enis epes sape ailan anamai hiesi awes nanda'esi safi'mai anan nanda'masa beten sataga bo'wes wapoti'.

¹⁰ Ea' esis sase'afa amamaga bu'wami wa'i weafe', sase'afa amamaga hiami afa' leifamami ea' sofa'am sambe'mafam sip afa' weafi'anai.

Pol nafe' nataga wambel lu'wagoma Rom

¹¹ Afa' ata' wape aomb wanom ailan anama. Anom nimeguf mafe'ma ea' walata sip anama nail ailan anama nogota anama uf lu'unai naluwi. Sip anama Aleksandriai atona. Agilinama sa'i sahalomana owalomana amam atom mape mambap atona. Amam amama nogamana biam anona god baso'omunai Sus. Ea' afa' wakwahogon wafe'.

¹² Wafe' wataga Sirakyus wape nimeguf wanom.

¹³ Wakwaha anama wafe' wataga Regium. Ama nemaf nagi'i uf lu'unai nalo nafi'i aon nowalama, ea' wataga anom basis Puteoli.

¹⁴ Wambel anama afa' wati enis Kristen. Ea' sa'ipafa wape walomas wik si'inai. Wape ea' wafe' Rom.

¹⁵ Esis Kristen sape Romi same' basefa afa' wafi'i, enis safi'i sotambel Maket wambel Apiusi, ea' enis safi'i sotambel wambel agel anama sa'i ifagw wanom sanda' fi'i fe' sapeimi. Ea' satolofa eaf. Pol nati esis, nandanifel nanifela God okom ananinai bo'ona.

¹⁶ Afa' wafe' wataga Rom, gavman Romunai na'i aho'ma Pol atona nope anona ipat noloma anona soldia numafiana nope la'ela'ef.

Pol nawalapa basef bu'wami ma esis Rom

¹⁷ Nimeguf wenif mafe'ma ea', Pol nofalai amam agufumi Judai mafi'i mandatama etifigin. Ea' na'ipam na'ama na'i, “Ipe' sahope, ae' ina anda' anom amamaga ahambombaga epes ape'isi ma esambala waf amam bafapapa ape'imi, owa'. Ea' amam dambami Judai manda' kalabusima ae' Jerusalem ea' manda'e afi'i lagof amam Romi.

¹⁸ Amam Rom mame' basefa kot ae'anai, ae' basefa waf aonai ofagema owa'etina moha ega'. Ea' ma'i motagahe.

¹⁹ Ea' amam Juda mosambala basef amama. Na'ama dei' ae' eaf a'e ma efe' wafifiwi. Ea' efala gavman dembinai Sisar ma nome' kot ae'anai. Ea' ae' ina enda' kotima epes ae'asi ma anom amamaga, owa'.

²⁰ Basef ofagema amama atom dei' efalepa pafi'i. Ae' a'i i'ipipa anom basef. Ae' embale'ef ape ehafa anan anama ape' Israel hiapai mape mohafanai. Ae' embale'efanai. Amama atom ofagema ma dei' manda' sen anama mowa'e.”

²¹ Ea' amam ma'ipana ma'i, “Anom Judaimi ina manda' anom basef mafi'i ma ma'ipafa ine', owa'. Ea' ina anona aman Judainai nafi'i nape na'ipafa andeande'ma na'i anom basef awami ma ine', owa'.

²² Ea' afa' wa'i ome' okom ine'inai atoma malogel ine'inai. Afa' ogawa, wambel hiagoma esis amam nematawa sanda' basef awami ma epes hiesi wambota anama.”

²³ Ea' amam mandandepa anona nemafa amam hiami mafi'i ipat Poli. Ea' mafi'i kuhimbita mape mape mataga wambomota, anan na'i basef ofagema nawalipam. Ea' nawalapa basef alihima epes siowis wambota Godi numafias. Anan nawalapa anom basefa mi'uli fowa' gani God naso' Mosesanai maloma basef Godi amam profet fowa' ma'iami. Ama basef amama anan na'ipama basef la'ifimi nafela ukup amamumi ma mombale'efa Jisas.

²⁴ Anom mombale'efana ma basef ananimi, ea' anom owa' mombale'efana.

²⁵ Ea' ukup mape na'ama ea' mafe'. Do'ok Pol nali' na'ipama anom basef na'ama na'i, “Ambal Bu'unai Godi na'i endilisi etisa amam akupapa ape'imi ma malogel profet Aisaia. Fowa' anan na'i na'ama na'i,

²⁶ ‘Ine' fo'mago esis amam nematawa isima ni'ipas na'ama ni'i. Anona nemaf ipe' pepe peme' basef, ea' ipe' ina pegawa ofagema, owa'. Ipe' pepe naep motawa ea' ipe' ina piti anom amamaga pegawam, owa'.

²⁷ Dei' main, ukup epes amam nematawa isima mase'as ea'. Ukup asasimi aoma some' basefa aligah asasimi, sasopama naep asasimi. I'i owa', esis siti amamaga ea' some' basef aligah asasimi ma ukup mopoma basef ofagema samboma opalef sotanima sifi'mai ae' ma enda' esis bo'wes wapoti', owa'.’ ”

²⁸ Ea' Pol na'ipam basef akutaimi na'i, “Dei' ae' a'i ipe' pegawa basefa God nofa'apa nokwahomapa waf aonai motanima mufi'mai anan. Amama anan nasapa'am mafe'ma esis amam nematawa sololama Godi. Esis isima nambimb sila basef amama, ea' ipe' owa'.”

²⁹ Pol na'ipam basef amama, amam dambami Juda mafe'. Ea' ma'i basef lu'wami ma'iam mandahihianamam la'afena amam atom.

³⁰ Amama mafe'ma ea', Pol nape la'ela'ef afagof biam si'im ipat anama anan natalonai ea' nase'as opaf nanda'mas waf bu'unai epes hiesi safi'i satolonai.

³¹ Anan nawalapa basef bu'wami ma epes siowis wambota Godi numafias. Ea' nawalipasa basefa dembinai Jisas Krais. Anan ina umbamahana, owa'. Nawalapam na'iam alihim ea' ina enin epen nafi'i na'ipana na'i owa'.