Aposel 27 - Basef Buꞌwami Godi

Amam soldia manda' Pol nafe' anona sip nafe' Rom

¹ Ea' anom dambami Rom ma'i basef mandame'mama afa' ofa' sip ofe' etap hiagoma Itali. Ea' anom dambami masapa' Pol naloma enis epes sanda' kalabusi ma anona soldia dembinai Julius numafias. Anan anona amam soldia gavman dembinai Sisari.

² Ea' afa' walata anona sip nafi' Adramitiumi. Sip anama na'i nefe' anona wambel nape naoh amama etap hiagoma Esia. Afa' wafe' ea' anona aman Aristarkus Tesalonaikainai ma etap hiagoma Masedonia nafe' nalomafa.

³ Wafilu wafe' wail anona wambel Saidon. Ea' aman anama Julius numafi Pol nanda' waf bu'unai ma anan. Na'i aho'ma anan nefe' niti alupusi ananisi ma nofa' gwa'aimi maima esis.

⁴ Afa' wakwaha Saidon wafe' ea' uf naluwi anama afa' wa'i weafe'ma. Ea' wafe' anona ailan Saiprus wa'ol uf a'agoma.

⁵ Ea' wafe' watopa' naoh wafe' felefele'ma etap hiagoma Silisia naloma Pamfilia ea' wafe' watagama anona wambel Maira etap hiagoma Lisia.

⁶ Wambel anama Julius nati anona sip nafi'i Aleksandria na'i nefe' etap hiagoma Itali. Ea' na'ipafa wafe' walata sip anama.

⁷ Wafe', sip anama nafe' sa'osa'ombel ama anom nimeguf hi'alam. Wanda'am noma'w nahafa ea' wataga felefele'ma anona wambel Nidus. Uf nalo lu'una nili'akwafa ea' ina ata' wafe' mehip, owa'. Ea' wafe' anona ailan Krit wa'ol uf owa'ma felefele'ma etap Salmone da'malifinama.

⁸ Wanda'am noma'w nahafa ea' waila naoh atom wafe' felefele'ma akata ailan anama Krit. Wafe' nogota laona ea' wataga anona wambel Fasiguma Sip Naila. Anama felefele'ma wambel lu'wagoma Lasea.

⁹ Nimeguf hiami mafe' hi'alam, nemaf anama esis Juda sakwaha gwa'aimianai hi'alana ea' anom nimeguf wapoti'. Nogota anama naoh manda'am fepo. Ina nogota bo'onama sip neafe', owa'. Ea' Pol na'ipasa basef esis na'ama na'i,

¹⁰ “Ipe' amam, peme'. I'i dei' afa' weafe'ma, nambimb otagama nimanimi ea' amamaga hiami higililam. Ina hiahaom maim atom moloma sip higililam, owa'. Ambagof afa'imi wapoti' nambimb higililam. Ae' egawam endilisi.”

¹¹ Ea' Julius name' dembinai kepten anama numafi amam manda' maol sipi naloma aman anama ofagenama sipi ina mame' basef Pol na'iami, owa'.

¹² Basis amama sip nafe' naima ina bo'wagon ma sip nilagon nogota anama uf naluwianai, owa'. Ea' amam hiami mape sip ma'i anom basef mandame'mama ma'i mokwaha wambel anama mafe'. I'i amam la'ifim, ma'i mefe' motaga ulal basis amama Finiks ea' mope anama nogota anama launai uf lu'unai naluwianai. Basis amama Finiks mape ailan anama Krit. Anama bo'wagoma ma sip nofe' nondambaho'ma uf naluma. Basis amama mape la'afena aon natefima nowalama.

Uf lu'unai nalo naoh manda'am fepo kwapete'am endilisi

¹³ Sape nogota bandana nafe' ea' uf so'unai nalo nafi'i aon natopa' nowalama ea' ina la'ifina, owa'. Ea' amam ma'iam ma'i atuwasi amam mofe' andeande' si'i ukup amamumi ma'i. Na'ama magiai anka nalatai ea' wafe' waila naoh atom felefele'ma bandagoma ailan anama Krit.

¹⁴ Nogota laona uf la'ifinai sa'i taleo naluwi nalo nafi'i ailan anama Krit.

¹⁵ Namboma sip anama ea' ina la'ifina neafe' anama uf nalu nafi'ima, owa'. Ea' wapoma uf atona nefa' sip nafe'.

¹⁶ Wafe' anona ailan wa'ol uf a'agoma sofalagon sa'i Kauda. Wanda' maol lu'unai endilisi ma owa' bot so'unai nail la'ifina.

¹⁷ Ea' amam magiai bot anama so'unai nalatai sip ilif ea' mowa' sip la'afen ma anom mandelef la'ifina nail. Amam umbamaham endilisi ma mefe' mieil anama wesan aonai na'oma, felefele'ma etap hiagoma Libia, Afrika. Ea' matagahai sel mikila'i.

¹⁸ Uf naloma naoh makoto'ma afa' mehip. Wafilu magi' anom hiahaom nimanimi makwahom mowala naoh.

¹⁹ Ama nemaf nafe'ma wenifi manda' lagof amamumi atom makwaha anom amamaga sel mandelef maim manda' sip nimaninai.

²⁰ Nimeguf hiami afa' ina ata' wati aon ondowa, owa'. Uf lu'unai atona endilisi nakoto'mafa wape na'ama etin. Ea' wa'i nambimb ina ofe' otaga anagon andeande', owa'. Wa'i higililafa etin.

²¹ Nimeguf hiami amam ina ata' ma' gwa'aimi ea' Pol nohafel naitu la'afena amam na'i, “Ipe' peme'. Fowa' ipe' andeande'ma peme' basef ae'ami ma afa' ina okwaha Krit ufi'i ulal. I'i onda'am na'ama, afa' ina dei' ofa' nimanimi amama, ea' amamaga hiahaom maim afa'imi higililam, owa'.

²² Ea' dei' a'ipipa afela ukup ipe'imi mope la'ifim. Ina nambimb anona aman afa'inai nefe' higililana, owa'. Sip atona higililana.

²³ Dei' maina ae' egawa amama? Ae' aman Godi anda' lotuma anani. Do'ok owamb anona ensel Ananinai nafi'i naitu felefele'ma ae'

²⁴ na'ipi na'i, ‘Pol, ine' owa' umbamehena, owa'. Ine' nambimb nefe' nitu naep gavman dembinai Sisar. Ea' ine' neme', epes hiesi isima sape salomena sipi, isima God nambimb nigiambamas. Ea' ina atuwasi enin higililan, owa'.’

²⁵ Dei' main, ae' embale'efa God anan nambimb nonda' amamaga amama motaga si'i na'ipiam.

²⁶ Ea' afa' ata' ofe' wil anona ailan anama otamba ma'oma.”

²⁷ Owambeh amama wikifah biam tol wala etin wafe' naoh amama Adriai. Owamb la'afen aon nahagasom amam mumafi hiahaom sipi mogawa ma'i sip nafe' nataga felefele'ma anona ailan.

²⁸ Ea' mala mandof si'i ikwaf nowala naoh mondola'wifagon nihi'ambam na'i 40 mita, laogon atona. Ea' wafo'o felefele', walana wapoti' mondala'wifagon na'i 30 mita, ina laogon, owa'.

²⁹ Ea' amam umbamaham ma'i, “Na'ama mofe' etin la'ifim mope anom otamba anama otambaiguma.” Ea' makwaha anka biefina biefina nowala sip anama naila ma mombalo'a sip nail. Ea' amam ukup ma'i aon alipunai ata' nitefi mehip.

³⁰ Amam manda' maol sipi ma'i ata' magolopa eafa mokwaha sip mefe'. Ea' mala bot so'unai nowala mambaso'am ma'i mokwaha anona anka nowala sip anama naila.

³¹ Ea' Pol na'ipa dembinai soldia Julius naloma amam soldia na'ipam na'i, “I'i amam amama owa' mope sip la'la'ef, atuwasi ipe' awepa higililipa.”

³² Ea' amam soldia matopa' mandelefa bot so'unai anama nowala naoh.

³³ Ea' felefele'ma aon na'i nitefi, Pol na'ipam basef amam hiami. Anan na'i nonda'am motaga la'ifim mea' anom gwa'aimi. Ea' na'i, “Nogota launai ipe' pape etin ina pa' anom gwa'aimi ea' pape umbamahepa ma amamaga amama meatagamipei. Ipe' pape etin nimeguf amama 14-peleim ea' pafi'i pataga nemaf dei'inai.

³⁴ Dei' a'ipipa mehip, a'i ipe' ata' pea' anom gwa'aimi ma petaga la'ifipa. Peme', ina atuwasi anom amamaga motaga mohambombagepa, owa'. Pepe andeande'.”

³⁵ Anan na'iam na'ama, nafela anona bret naep amamumi nanda' beten nanifela God, nawalona na'ana.

³⁶ Ea' amam hiami ukup bo'om ma' gwa'aimi wapoti'.

³⁷ Afa' hiafai wape sip wataga 276-peleifa hiafai.

³⁸ Amam ma'am ea', makwaha wit mowala naoh ama sip ata' sofalina.

Sip palalana awasina hi'alana

³⁹ Aon natefima lala, amam mati anona etap ea' amam ina mogawa etap anama akata, owa'. Amam mati anom basis sip nafe' naila nondola' nawis endilisi. Ma'i i'i la'ifim, dei' monda' sip nondowasa' wesan akata.

⁴⁰ Ea' matopa' mandelefa anka anama hianai makwahom mala naoh. Ea' matagaha mandof manda'am mowa' stiaimi, mandola sela uf nofa' sip nafe' akata.

⁴¹ Ea' sip la'afina dogwala wesan la'ifina nail. Nali'ma la'ifina endilisi nape otamba. Ea' naoh mowa maha sip nagi'ma ea' kwa'alana.

⁴² Ea' amam soldia ukup amamumi ma'i moha amama manda' kalabusi afum hi'ilam, ama amam ina ata' mopaol mofa' mefe', owa'.

⁴³ Ea' dembinai soldia Julius na'i nigiambama Pol. Ea' na'ipam na'i ina moham afum, owa'. Mope. Ea' na'ipa amam amama mogawa paoli ma motoma mukupa' mopaol mofe' akata.

⁴⁴ Ea' anom mololama paoli, mohapila palag maim la'if'im moloma endah sip anama kokwa'alami mohapilam tol mola naoh mofa'am mofe' akata. Afa' wame' basef ananimi wanda'am na'ama, dei' afa' hiafai wafe' be'efa wataga waitu naoh akata.