Aposel 26 - Basef Buꞌwami Godi

Pol nawalapa basefa dembinai king Agripa

¹ Ea' Agripa na'ipa Pol na'i, “Dei' ine' negwa basef amama amam mambaso'mena.” Pol nafela lagel na'i basef ananimi na'i,

² “King dembinai Agripa, ae' a'i egwa basef amama hiami amam Juda mambaso'ma ae'ami. Ae' okom na'i andeande'ma a'i ewalapa basef ae'ami ma naep ine'imi.

³ Dei' main? Ine' negawa andeande'ma waf ape' Judai naloma amamaga ape' ukup mapomam mafe' deindei'mami. Amama atom dei' ae' a'i ine' neme' basef ae'ami, okom ine'inai ina iwanina mehip, owa'.

⁴ Fowa' ape afi'i afi'i dei' fe' anama ae'anai esis Juda hiesi sogawa. Fowa' ata' sa'owe ape etap ae'anai ea' afe' ape Jerusalem wapoti'.

⁵ Fowa' gani esis sogawa ae'. I'i ukup asasimi mi'i a'e, sowalapa basef amama ma waf ae' anda'anai. Esis sogawa ae' aila waf epes hiesi ape' Farisi. Waf anama ahifina endilisi, nikila' waf hianai anona lotu ape'inai.

⁶ Ea' basef ofagema ma kot na'ama. Ae' embale'ef endilisi ma God nefela saga'i sohafel wapoti', amama atom. Ae' embale'ef ape ehafa God nonda' amamaga amama motaga si'i fowa' na'ipa akupapa ape'imi Judai. Amama atom dei' esis sanda' kotimi.

⁷ Wambotagw apa'imi 12-peleim manda' lotuma God owamb alip ea' mombele'ef endilisi mape mohafa amama atom. Dei' a'ipa ine' dembinai king, ae' wapoti' embale'ef ape ehafa amama. Ea' na'ama esis Juda sambaso'me.”

⁸ Pol na'ipa king Agripa ea' nandamboma na'ipa amam Juda na'i, “Dei' maina ipe' pa'i basef ina endilisimi ma God owagama nefela esis isima saga'i wapoti? Ipe' pembale'efa basef amama.

⁹ Fowa' ae' wapoti' okom na'i ae' enda' amamaga hiami ma ehagofa agel Jisas Nasaretinai.

¹⁰ Ae' anda'am na'ama etina enis epes gani Jerusalem. Amam pris dambami mase'e pepel anda' kalabusima amam nematawa hiesi Godi. Nemaf anama amam pris dambami ma'i moha enis Kristen soga', ae' wapoti' a'i a'e.

¹¹ Ea' nimeguf hiami ae' ase'as nimanimi Kristen isima ahas nomon ifagw esis Juda sa'i basef sapeimi hiami. Ae' a'i enda' esisa sonda' Dembinai findiwana ma sokwaha basef Dembinai. Ae' okom wandafuna endilisi ma esis, ailas afe' anona wambel laogoma lu'wagoma.

Pol na'i basef nawalapama nataga Kristen namboma okom naila God

¹² Efa' pepela amam pris dambami masapa'e afe' Damaskus.

¹³ Ae' a'ipa ine' dembinai king, ma aon nahagasom ae' aila eaf afe', ati howalogon nisila'i heven nikila' aon alipunai. Howalagon nafi'i nolalowe aloma amam mafe' malumai.

¹⁴ Afa' hiafai wa'oh etap ea' ae' ame' anona malogel na'i diga Hibrui na'i, ‘Sol, Sol, dei' maina ine' nanda' maol nahambombaga ae'? Ine' nanda' maol naha anama ina negawa. Dei' nefa' nimanimi bolam si'i anona naha bulmakau ananimi bolam nanindinama nafe' andeande'.’

¹⁵ Ea' ahali'ana a'i, ‘Dembinai ine' emi?’ Ea' Dembinai na'i, ‘Ae' Jisas, ine' nahambombage.

¹⁶ Ea' ine' hafel nitu. Ae' afi'mai ine' ma amamaga amama. Ae' a'i esahe'ena ma nihapila maol ae'anai, newalapa basefa amamaga ine' natoloma ae'i. Ea' amamaga amama owagama ae' ihi'ambenam.

¹⁷ Nambimb ae' etagahina lagof esis epes hiesi ine'isi Juda ea' etagahina ma lagof isima enis epes sololama Godi wapoti'. Ae' esapa'ena nefe'ma epes isima.

¹⁸ Ama newala naep asasimi ma esis sowa' alafugaha akota waf aonai somboma opalef sifi'mai howalagon ma sokwaha pepel Satani sifi'mai God. Esis sombale'efa ae' ma ekwaha waf aonai esis sanda'anai. Ama sofa' amamaga bu'wami soloma enis amam nematawa God nanda'as bo'wes ananisi etisi.’

Pol na'ipa dembinai king Agripa ma maol anan nanda'ana Dembinai

¹⁹ Dembinai king Agripa, ae' ati amamaga amama mataga heveni ea' ina esambala basef amama, owa'.

²⁰ Ae' ali' awalapa basefa esis amam nematawa sape Damaskusi ea' awalapama epes sape Jerusalemi ea' awalapama esis sape etap hiagoma Judia ea' afe' awalapama isima sololama Godi wapoti'. Ae' awalapa basefa penda' maol peloma waf bu'unai nendahama epes somboma opalef sefe'ma God.

²¹ Ae' anda'am na'ama ea' ofagema amama atom dei' esis Juda sombale'e ipat lu'unai Godi sa'i sehe ega'.

²² Na'ama God nagiambame afi'i afi'i ataga dei' aitu na'ae ea' awalapa basef a'ipa epes hiesi agof a'asi saloma ipe' agufipei wapoti'. Ae' ina ewalapa anom basef, owa'. Awalapa basef amama Godi atom fowa' amam profet maloma Moses ma'iami ma amamaga owagama meatagai.

²³ Amam ma'iam na'ama ma'i, ‘Dembinai Krais ata' nofa' nimanimi, ma nambimb notanima nohafel hi'agif nili'ma epes hiesi. Ama Anan nowalapa basefa epes hiesi sogawam si'i howalagon nikila'i nififima esis ananisi soloma isima sololama Godi wapoti'.’ ”

Pol na'ipa dembinai king Agripa nombale'efa Jisas

²⁴ Pol na'ipas na'ama ea', Festus noga na'i basef la'ifimi na'ama na'i, “Pol, ine' okom nololaina! Ine' nati buk hiami natalifam nogawam dei' gawa anama lu'unai nanda'ena okom nololaina!”

²⁵ Ea' Pol nagwamana na'i, “Ine' aman dembinai Festus, ae' ina okom nololae, owa'. Ae' okom napaewe dei' a'i endilisi.

²⁶ Ine' dembinai king negawa hi'alam amamaga amama hiami. Ea' ae' dei' awalapam a'iam ae' ina umbamahe, owa'. Ae' egawa amamaga amama hiami ina mandambaho'ma naep maloma aligah ine'imi, owa'. Ine' natolom negawam ea'. Dei' main, amamaga amama ina mataga mandambaho', owa'.

²⁷ Dembinai king Agripa, ine' nembale'a basef Godi amam profet fowa' mawalipasami o owa'? Ae' egawa ine' nembale'am!”

²⁸ Ea' king Agripa na'ipa Pol na'i, “Nogota anama bandana ine' na'i nenda'e etaga Kristen?”

²⁹ Ea' Pol na'i, “Nogota bandana o laona andeande'. Ae' anda betena God na'ama. A'i nambimb ine' neloma epes isima hiesi dei' pame' basef ae'ami petaga Kristen na'ama etin si'i ae'. Ea' sen anama nowa' ae'i, andaiwa'ma nowa'epa.”

³⁰ Pol na'iam na'ama ea', dembinai king nali' nohafel naitu naloma Bernaisi saloma gavman dembinai saloma epes isima sape salomasi.

³¹ Ea' sawis ande'. Esis etis sanda'ipama sa'i, “Aman anama ina nanda' anom amamaga awami ma noga' o nonda' kalabus, owa'.”

³² Ea' Agripa na'ipa Festus na'i, “I'i aman anama ina nofala gavman dembinai Sisar ma nome'anama kot, ine' netagahana nofo'o wafifina.”