Aposel 25 - Basef Buꞌwami Godi

Pol nofala Sisar gavman dembinai esis Romi ma nome' kot ananinai

¹ Festus nafi'i nofa' maol nape dembinai gavman numafi etap hiagoma fowa' Feliks numafiagoma. Nape nimeguf wanom ea', nakwaha wambel Sisaria nondowasa' Jerusalem.

² Ea' amam pris dambami maloma agufumi Judai mafi'mai anan mambaso'ma Pol.

³ Ma'ipa Festus mehip ma'i, “Ine' nigiambamafa nesapa' aman anama nifi'i anae'.” Dei' main, amam ma'i mondambaho' mope eafa mohana noga'.

⁴ Ea' Festus nagwa basef na'ipam na'i, “Pol nanda' kalabus nape wambel Sisaria. Nambimb ae' etanima efe' ganima.

⁵ Ea' amam agufumi ipe'imi mifi'i mikini'i moloma ae'. I'i aman anama nanda' waf aonai, amam monda' kotimana.”

⁶ Festus nape nalomam nimeguf 8-peleim o 10-peleim, ea' nakini' wambel Sisaria. Wafilu nafe' nawis ipat sandakota na'ipa amam soldia mo'wa Pol mifi'i.

⁷ Ea' amam Juda makwaha Jerusalem mape mahafa Pol nafi'i makini'i maitu felefele'ma anan mambaso'mana basef hiami nimanimi. Ea' amam manda'mana basef etin, basef ofagema amamumi ina anom.

⁸ Ea' Pol nagwa basef na'i, “Ae' ina anda' anona waf aonai ma mi'uli ape' Judai, ipat lu'unai Godi, o mi'uli Sisari wapoti', owa'etin.”

⁹ Na'ama Festus na'i nonda' ukup esis Judai mope bo'om. Ea' nahali' Pol na'i, “Ine' na'i nefe' Jerusalem ama nambimb eme'enama basef ine'imi gani?”

¹⁰ Ea' Pol na'i, “Ipat anae' ae' dei' aituanai, anae' ipat Sisari sanda' kota. Ipat anae' atona peme' basefa kot ae'anai. Ine' etina negawa, ae' ina anda' anona waf aonai ma esis Juda, owa'.

¹¹ I'i ae' anona waf aonai ma enda' anom amamaga awami mondahama ae' ega', andeande'ma amam mohe ega'. I'i basef amama amam manda' kotima ae'ami owa' endilisimi, ina andeande'ma dembinai gavman nese'e efe'ma lagof amamumi, owa'. Dei' ae' efala gavman dembinai Sisar neme' kot ae'anai.”

¹² Ea' Festus ata' na'i basef naloma amam dambami ananimi, na'ipa Pol na'i, “Ine' nefala Sisar ama neme' kot ine'inai, ine' fo'mago Sisar.”

Festus nahali' dembinai King Agripa ma Pol

¹³ Anom nimeguf mafe'ma ea', dembinai king Agripa nafi'i naloma ano'w nemata'w Bernaisi esis bias safi'i Sisaria sa'i sonda'mana nemaf bu'unai Festus.

¹⁴ Esis sape Sisaria nimeguf hiami ea' Festus nawalapa basef na'ipanam king Agripa ma Pol. Anan na'i, “Anona aman fowa' napani Feliks nanda'ana dei' nanda' kalabus.

¹⁵ Fowa' ae' apani Jerusalem, amam pris dambami maloma agufumi esis Judai mambaso'mana mahali' ae' ma i'i endilisi anan aman aonai ma noga'.

¹⁶ Ea' ae' agwamama basef na'ama a'i, ‘Ape' Rom waf anama a'apa ma mose'ana nimanimi na'a enin epen, owa'. I'i basef milan, enin ata' nili' nitu nonda' basefa naep esis isima sanda' kotimani ma ape' ata' mose'ana nogota ma enin negwa anom basefa esis sanda' kotimani.’ ”

¹⁷ Nemaf anama amam agufumi Judai mafi'i na'ae, ina apoma noma ma eme' basefana, owa'. Nemaf gi'mainai ae' afe' ape ipat sanda' kota a'ipa esisa sofa' aman anama nafi'i.

¹⁸ Ea' amam manda' kotima anan mafi'i maitu mambaso'mana. Ea' amam ina ma'i anom basef endilisimi ma waf aonai masindinana a'i amam monda' kotimanami, owa'.

¹⁹ Amam mandahihianama anom basef malomana ma waf esis sanda' lotuwanai ea' anona aman naga'i, Jisas. Ea' Pol na'i aman anama nape namunai ambal napaina.

²⁰ Ae' a'i egolopa basef amama ofagema andeande', na'ama okom ae'anai ina egawa, owa'. Ae' ina la'ifiwi, owa'. Ea' ahali'ana a'i, “Ine' na'i nefe' Jerusalem ama nambimb eme'enama basef ine'imi gani?

²¹ Ea' Pol na'i anan nope kalabus ama nambimb gavman dembinai ape'inai Sisar neme' basef ananimi. Ae' a'i anan nope kalabus ea' esapa'ana nefe'mago Sisar.”

²² Ea' Agripa na'ipa Festus na'i, “Ae' atowe a'i eme' basef ananimi.” Ea' Festus na'ipana na'i, “Naman ine' neme'ana.”

²³ Wafilu Agripa naloma nemata'w akwama Bernaisi safi'i sanda' sosaf hianai ma sefela agof asasimi lu'um. Ea' sawis ipat lu'unai sandatama etifigin sape sa'i basef nomon saloma amam soldia dambami mali'i maloma amam agufumi taun anama. Ea' Festus na'ipas mehip sao'wa Pol nafi'i.

²⁴ Ea' Festus na'i, “King Agripa, naloma ipe' epes hipei pape paloma ape', ipe' pati aman anama. Esis amam nematawa hiesi Juda sape Jerusalemi saloma sape na'ae wapoti' sanda' kotimana naep ae'ami. Esis sa'ipi basef laifimi sa'i ehana afuna. Sa'i 'Ina nope, hana afuna.’

²⁵ Na'ama ae' ati anan ina nanda' anom amamaga awami ma noga', owa'. Ea' anan nofala gavman dembinai Sisar ma nome' kota anan. Amama atom ae' a'i basefa esapa'ana nofo'o.

²⁶ Ea' ae' ina ati anom basefa anan mataga alihima enda' anom basefa pas esapa'am mofe'ma Sisar, owa'. Ea' dei' king Agripa ae' au'wai aman anama nafi'mai ine' neloma ipe' hipei wapoti'. Afa' ome' basef ananimi andeande'ma nambimb ae' egawama enda' anom basef mil pas.

²⁷ Dei' main, ina andeande'ma esapa'ana nofe' etin. Afa' onda' anom basef sanda' kotimanami mil pepa mefe' molomana, andeande'.”