Aposel 24 - Basef Buꞌwami Godi

Amam agufumi Judai manda' kotima Pola naep dembinai gavman Feliks

¹ Nimeguf wanom biam mafe' ea', pris dembinai Ananaias nakini' nafe' Sisaria naloma anom agufumi Judai ea' anona aman Tertulus aman nogawa mi'uli gavman nalomam nafi'i. Amam hiami ma'ipa gavman dembinai Filiksa basef amama ma'i monda' kotima Polami.

² Ea' gavman anama nofalai Pol nafi'i, Tertulus nanda' basef findiwama anan. Ea' na'ipa Feliks na'i, “Ine' aman dembinai Feliks, ine' nagiambama ape' Juda ma mape nogota launai andeande' ea' wandaf main owa'etin. Okom bu'unai ine'inai nagiambama esis wambota ape'inai ma dei' mape andeande' mikila' fowa' mali' mape.

³ Ea' ape' mape wambel hiagoma opalef ape'imi mape bo'oma ine'. Ea' nimeguf hiami la'ela'ef manifelina ma amama.

⁴ Na'ama ae' andaiwa'ma ahapilina nogota laona. Dei' ahali'ina ma neme' basef ape'imi bandami.

⁵ Ape' mogawa aman anama nanda'mapa amamaga awami hiami. Ea' nanda' naumbih nafela ukup awami naloma esis Juda hiesi napa' nalomas etap hiagoma wambel hiagoma. Anan agel lu'unai ma epes isima sapa' sawala epes hiesi ape'isi ma epes sape deindei'i, sa'i epes Nasareti.

⁶ Ea' anan na'i nonda' ipat lu'unai sanda lotuma Godanai aona wapoti'. Na'ama ape' mombale'ana ma'i monda' kotimana ma mi'uli ape'inai.

⁷ Ea' kepten dembinai Lisias nafi'i, anan la'ifinai nahonde'ana lagof ape'imi.

⁸ Anan na'i mehip ape' manda' kotima anan mifi'i motaga naep ine'imi. I'i dei' ine' nihali' aman anama, atuwasi ine' negawa endilisi basef ananimi ma ni'i amamaga hiami ape' manda' kotimanami.”

⁹ Ea' amam Juda dambami wapoti' magiambama anan mambaso'ma Pol mawalapam ma'iam ma'i, “Basef amama endilisimi atom.”

Pol nagwa basefa Feliks

¹⁰ Ea' gavman dembinai nanda' balaga nahali' Pol nogwa basef na'ama na'i, “Ae' egawa afagof hiami ine' nanda' jas nape dembinai gavman numafi ape' Juda hiapai. Na'ama dei' okom ae'anai bo'ona, endilisi ma egwa basef amama ihi'ambena ae' ina anda' anona waf aonai, owa'.

¹¹ I'i ine' nihali' esis, atuwasi neme' basef amama dei' ae' a'i i'ipinami. Nimeguf ata' 12-peleim mafe' ea' ae' ali' afe' Jerusalem anda' lotu.

¹² Ea' amam Juda ma'i monda' kotima ae' mati ae' ina a'i anom basef afitapam aloma enin epen nomon ipat lu'unai Godi, owa'. Amam ina mati ae' afela ukup asasimi ma sopa' ifagw esis Juda sa'i basef sapeimi nomon o anagon nomona wambel anama lu'wagoma, owa'.

¹³ Ea' basef amama esis dei' sanda' kotimiami, esis ina atuwasi la'ifis sowalapa anom basef ofagema ma ine' negawa, owa'.

¹⁴ Na'ama ae' a'i ewalapa basef amama atoma ine'. Eaf anama esis Juda etis sandaiwa'manai sa'i waf anama sawala wambotagwanai ina endilisinai. Waf anama endilisinai ae' ahapilana ailana. Ae' aila eaf anama anda' lotu ma God amam bafapapa ape' Juda hiapai manda' lotumanai. Ae' ahapila basef hiami mape mi'uli Godi naloma basef hiami amam profet fowa' manda'ami.

¹⁵ Ae' embale'efam ape ehafa God owagama nefela esis saga'i, epes isima bu'wasi soloma isima sanda' waf aonai wapoti'. Amam manda' kotima ae' wapoti' mombale'ef mape mohafa God na'ama etin.

¹⁶ Ea' la'ela'ef ae' anda' maol lu'unai ma epe andeande' ma malogel nape opaf ae' nomoni ina nihi'ambe anona waf aonai ae' anda'anai, owa'. Ae' anda' maola waf aonai a'e ma naep Godi naloma naep epesi wapoti'.

¹⁷ Ae' ape anom afagof anona wambel ea' etanima afi'i Jerusalem ma epes hiesi ae'asi. Ae' efa'ai moni maina igiambama isima kwahusi ea' eha anom mafis endalalima God ese'ana.

¹⁸ Anda'am na'ama ma anda' waf bu'unai, waf aonai a'e ma naep Godi. Ea' esis satolowe. Ina enis amam nematawa hiesi sape salome afela opalef enis epes sanda' salamala naninani, owa'etin.

¹⁹ Na'ama enis Juda sape etap hiagoma Esiaisi safi'i sombale'e. I'i esis anom basefa ae', dei' andeande'ma sifi'i na'ae naep ine'imi sonda' kotimi.

²⁰ I'i owa', amam amama mi'ipina anom basefa amamaga awami amam mati ae' anda'ami, nemaf anama fowa' aitu naep amam Juda dambami mumafi koti.

²¹ Anom basef etifim na'ama. Nemaf anama aitu la'afena amam, ae' ega a'i, ‘Ae' embale'efa God nefela esis saga'i sohafel wapoti', ea' amama atom ipe' dei' panda' kotima ae' ma naep ipe'imi.’ ”

²² Feliks nogawa andeande'ma bale'ef naloma waf sa'i eaf esis Kristeni. Ea' na'ipa esis Juda ma ata' sope sohafana. Anan na'i, “Ota' ma soldia dembinai Lisias nikini'i, ae' enandonama basef amama ipe'imi.”

²³ Ea' na'ipa anona soldia dembinai ma ata' nonda' Pol nuwis nope kalabus nope wafifina etin. Ea' na'i aho'ma esis alupusi ananisi sifi'i sigiambamana ma amamaga.

Feliks nanda' Pol nanda' kalabus afagof biam

²⁴ Anom nimeguf mafe'ma ea', Feliks nao'wa waulu'mana anani'wi Drusila safi'i. Drusila akwa'w ano'w Judai'wi. Ea' Feliks nofala Pol na'i neme' anom basef ananimi. Ea' Pol nafi'i na'ipana basef ofagema ma esis sombale'efa basef Jisas Kraisi.

²⁵ Na'ipana waf bu'unai ma epes sumafi alop asasinai andeande' ma owagama God nonda' kotima epes hiesi. Na'iam na'ama, Feliks umbamahana. Ea' na'i, “Ine' fo'o. Nambimb anona nemaf, efalena wapoti'.”

²⁶ Feliks nape nohafa anom amamaga wapoti'. Anan na'i nambimb Pol nose'ana anona moni ma nokwahona nofe' wafifina. Na'ama la'ela'ef anan nofalana nafi'i na'i nalomana.

²⁷ Afagof biam mafe'ma hi'alam, Festus nofa' maol Filiksi. Ea' Feliks na'i ata' nonda' ukup esis Judai mope andeande'. Ea' ata' nanda' Pol nape nanda' kalabus.