3 Jon 1 - Basef Buꞌwami Godi

¹ Ae' agiliwei imafi esis Kristen, anda' anom basef mafe'mago ina' alupinai Gaius. Ae' okom nainailina endilisi.

² Basef mafe'mago ine', anda' betena Goda amamaga hiami ine' nanda'ami motaga bo'om andeande'ma awes a'ena nepe andeande' si'i ambal ine'inai nape andeande'.

³ Fowa' ae' ame' basefa anom alupumi mafi'i matagame ma'ipi waf ine' nanda'anai ma'i ine' naila basef endilisimi andeande'. Ame' basef amama andanifamena endilisi.

⁴ Ae' andanifel endilisi ma awasi saila basef endilisimi. Ea' ae' ina andanifel ma anom amamaga mikila' andanifela awasi ae'asi saila basef endilisimi, owa'.

Gaius nanda' opeh bu'wami Godi

⁵ Alupinai ae' okom nanailinai, opeh hiami ine' nanda'ami ma nagiambama amam sahin owan, amama ine' nanda'am andeande' endilisi. Amam ina nati nogonaepima negawam, owa'. Ea' ine' natolom numafiam etin.

⁶ Amam hiami ma'ipa esis Kristen sape na'ae ma okom ine'inai nainailam nigiambamam. Ae' ahali'ina ma nigiambamama gwa'aimi otamba maim mofa'am etin mofe' anagon monda' opeh Godi si'i okom ananinai na'iam.

⁷ Dei' main, amam mafe' manda' maola agel Kraisi, ea' ina mofa' gwa'aimi maima esis isima sololama Godi, owa'.

⁸ Amama atom ape' migiambamama gwa'aimi maima monda' maola basef endilisimi Kraisi molomam.

Anona aman Diotrefes nanda' waf aonai

⁹ Ae' anda' anom basef mafe'mago esis Kristen, ea' Diotrefes anan okom na'ina'i endilisi ma nope dembinai nili'i. Anan ina naila basef ae'ami, owa'.

¹⁰ Maina nemaf ae' efe'mago ine', ae' ewalapa basefa waf hianai anama anan nanda'anai. Anan nambaso'mas na'i basef mamumami awami findiwama ae'. Ea' ina nanda' waf anama atona, owa'. Nanda' anona waf wapoti' na'ama. Nowa' alafugama amam sahin owan mawalipasa basef Godi ma'i mifi'mai anan. Ea' anona waf wapoti' na'ama. Nasopama enis Kristen sa'i sigiambama amam amama nanda'as safe' sape ande' ma sios.

Demitrius nanda' waf bu'unai

¹¹ Ine' alupinai, ina nila waf aonai, hapainai. Nila waf bu'unai atona. Emi egafis sanda' waf bu'unai, esis epes Godi. Ea' emi egafis sanda' waf aonai, esis ina segawa God, owa'.

¹² Epes hiesi safela agel Demitriusi. Waf ananinai endilisinai nihi'ambapa anan aman bu'unai. Ae' wapoti' a'i anan bu'unai ea' ine' negawa basef ae'ami endilisimi.

Basef amama tu'wanim akutaimi

¹³ Ae' a'i i'ipina basef hiami hi'ilam, ea' ae' andaiwa'ma enda' pen enda'am mil okwatip mefe'mago ine', owa'.

¹⁴ Ae' okom ma'i anona nemaf efo'o itilina, ea' afa' biafa ondatima wi'i basef amama.

¹⁵ Ae' a'i opaf ine'inai nope awanena nepe andeande'. Alupusi ine'isi sape na'ae sanda'menago danifel nolomago ine'. Ine' da'masago danifela ae'anai wapoti' nefe'mago esis sape wambel ine'imi atona etin. Ea' ma'um.