2 Timoti 4 - Basef Buꞌwami Godi

Ine' newalapa basef Godi endilisi

¹ Anona nemaf Jisas Krais nowaloga epes hiesi dei' ata' sape namisi, soloma isima saga'i wapoti'. Naep Godi maloma Krais Jisasi dei' a'ipina basef la'ifimi a'i Krais Jisas anona nemaf notaga nondawalap alihina naep epes hiesi ea' nope Dembinai wambel Ananinai. Amama atom dei' a'ipina mehip,

² ine' ni'ipasa basef Godi la'ela'ef. Nemaf anama esis sondandombam ma some' basef, ni'ipasam. Ea' maina nemaf esis sandaiwa' ma some'am, ni'ipasam etin. Ni'ipasam ma mohagofa basef amama baso'maimi. Ni'ipasa basef la'ifimi ma sokwaha waf aonai esis sanda'anai. Ea' nefela ukup asasimi nenda'as sotaga la'ifisa bale'ef, niwalipasa waf aonai nenda'as so'uso'umbemas. Niwalipasa basef amama si'i okom Godi na'iami.

³ Anona nemaf notaga, esis sondaiwa'ma sofa' basef bu'wami Godi, owa'. Ea' sila ukup asasimi atom sofa'ai anom tisa hiami asasimi, ma mi'ipasa basef amama esis isima ukup maimaila some'am aligah asasimi.

⁴ Ea' sowa' alafugaha basef endilisimi seme' basef amama mamumami falafumi wafimi.

⁵ Ea' ine' la'ela'ef okom nopeina andeande' nimafi alop ine'inai andeande'. Nemaf anama nimanimi motagamena nepe la'ifina nenda' maol Godi newalapa basef bu'wami ma esis amam nematawa sololama Godi. Nenda' maol anama ma nigiambamas nenda'ana endilisi nimbefana.

Pol na'i, “Dei' maol ae'anai na'i hi'ilana.”

⁶ Ine' negawa, nogota anama nataga ea' ma sehe ega'. Esimbel ae'ami ma'i kolo'olam molo sehe ega' ma indilali eso' ae' efe'ma God. Nemaf nataga ma ae' ekwaha etap anae'.

⁷ Ae' fowa' andondombam asagih andeande'. Ae' embale'efa Krais la'ifiwi asagih andeande', dei' ataga ikwaf.

⁸ Dei' amamaga amama bu'wami sasagih sikila'i sefa'ami sandandombam ma'ome. Amama na'ama. Nambimb Dembinai nofale ni'ipi ni'i, “Ine' aman bu'winai.” Dembinai anan aman bu'unai nowalogas ma nemaf anama. Nemaf anama lu'unai Anan nese'e amamaga amama bu'wami. Ea' ina noso' ae' atowe, owa'. Anan nose'asam emi egafis ukup maimaila Anan notaga nondawalap sotolona.

Anom basef tu'wanim

⁹ Dei' ine' nifi'mai ae' mehip.

¹⁰ Dei' main, Demas okom na'ina'i waf aonai etapanai ea' nakwahowe nafe' Tesalonaika. Kresens nafe' etap hiagoma Galesia, ea' Taitus nafe' etap hiagoma Dalmesia.

¹¹ Dei' Luk atona nape nalome. Ine' ne'wa Mak nolomena nifi'i nehaponameana. Dei' main, andeande'ma anan nigiambame ma maol Godi.

¹² Ae' asapa' Tikikus nafe' Efesus.

¹³ Ine' nifi'i nifa'mai saket anama launai anama akwahona na'ihi Troas ipat Karpusi. Anama ine' nifa'mianai nifi'i. Ea' anom buk ae'ami wapoti' nifa'miami. Buk amama sanda' agwafuh mafisim sanda'ami. Amama nifa'miam etin nifi'i endilisi.

¹⁴ Aleksander aman nanda' maola brasi, nanda' megah endilisi. Anona nemaf Dembinai nogwamana nimanimi anan, mondahama waf anan nanda'meanai.

¹⁵ Ine' wapoti' nindumafuma ma aman anama. Anan nahogofa basef amama afe'imi endilisi.

¹⁶ Ali' agwa basefa kot anama esis sanda'meanai, ina enin epen etitin naitu nalome nemaf anama nagiambame, owa'. Epes ae'asi hiesi sakwahowe. Ea' anda' betena God na'ama, a'i ina okom nopoma waf anama aonai esis sanda'anai ma sakwahowe nemaf anama anda' kotanai, owa'.

¹⁷ Ea' Dembinai numafi ae' ape nase'e pepel. Amama atom dei' awalapa basef bu'wami a'iam la'ifiwi endilisi ea' epes isima hiesi owa' Judaisi sogawa basef Godi, dei' same'am hi'alas. Ea' God nagiambame ma malogel mafin anama lu'unai laion.

¹⁸ Anona nemaf Dembinai nigiambame ma waf anama aonai hianai esis sanda'mianai, ea' nofa'e etanima nohapone epe wambel Ananinai gani ilif heven. Ae' a'i pepel howalagon nopaina la'ela'ef. Endilisi.

¹⁹ Ine' nese'ago danifel ae'anai ma Akwila naloma Prisila ea' esis isima wambota Onesiforusi.

²⁰ Erastus ata' napani etin Korin. Ea' Trofimus awes nanda'ana akwahona napani Miletus.

²¹ Ine' nifi'i mehip. Na'ama ine' nepomai nemaf anama uf lu'unai naluwanai. Yubulus naloma Pudens, Linus naloma Klodia naloma esis alupusi Kristen isima hiesi sanda'menago danifel ma ine'.

²² Ae' a'i Dembinai nope nolomago ambal bu'unai ine'inai nigiambamepa na'a. Ea' ma'um.