2 Timoti 3 - Basef Buꞌwami Godi

Anona nemaf akutainai waf aonai hianai naninani notaga alihina

¹ Ine' negawa, nimeguf akutaimi nimanimi lu'wami endilisi motaga.

² Nimeguf amama epes ukup mopoma esis etis, ea' ukup mimila otamba atom, sefela agof asasimi atom, sototopa' basef, sonda' epes findiwasa God. Ea' sosambala basef mamasasi ahapas asasisi. Esis ina sinifela Goda waf bu'unai, owa'. Sosambala waf bu'unai.

³ Ea' ina ukup mimila enis epes, owa'. Ina sokwaha waf aonai enis epes sanda'masanai, owa'. Esis ina ukup mose'asa lopa' fitap asasinai ma si'i basef awami, owa'. Ea' si'ipa enis epes si'i, “Ape' monda' waf aonai.” Esis ukup mi'i esis etis ina sumafi alop asasinai andeande', owa'. Sohambombaga epes isima bu'wasi, sowa' alafugah sondaiwa'ma waf bu'unai.

⁴ Ea' sonda' alupusi asasisi sofe'ma lagof naumbih. Ea' esis mehip sila waf aonai asas sanda'anai, ukup mopoma esis etis si'i dembesi. Ea' ukup maimaila danifel naninani aonai endilisi ma alop asasinai atona. Esis ina ata' ukup mi'i God, owa'.

⁵ Epes isima saila waf Godi alop atona asasinai ande' atogon, ea' ukup asasimi nomon sandaiwa'ma God sowa' alafugaha pepel ananinai. Ine' nihi'ama epes isima.

⁶ Anom amam si'i amama mandambaho' so'uso'umbel mafe' magi'ma nematawa awama ukup bu'wami owa' meapaiwai mawis ifagw awaumi, ea' momboma ukup awaumi. Nematawa awama waf awaunai nanda' ukup awaumi nimanim endilisi. Ea' ukup awaumi mohafema awami mamumami momboma ukup awaumi.

⁷ Nematawa awama la'ela'ef wanda' maola ofa' basef, ea' ina ogawa basef ofagema endilisimi, owa'.

⁸ Fowa' Janes naloma Jambris manda' naumbih maloma Moses, mowa' alafugahana. Na'ama etin dei' epes isima sanda' naumbiha basef endilisimi sowa' alafugaham. Ukup asasimi aom endilisi, ea' bale'ef asasinai sambaso'am etin. Esis ina sembale'efa God endilisi, owa'.

⁹ Ea' waf anama amamunai ina nataga lu'una endilisi, owa'. Dei' main, nambimb epes hiesi siti waf anama gawa a'anai amamunai si'i fowa' gani sati waf anama gawa a'anai ma amam amama Janes naloma Jambres manda'anai.

Ine' nembale'efa basef Godi la'ifina

¹⁰ Ine' fowa' nafe' naloma ae', name' basef amama a'ipasam ea'. Ine' negawa fe' pe, ki ma basef hiami ofagema ae'ami. Ine' negawa ae' embale'efa God la'ifiwi, la'ela'ef a'ipasa basef Ananimi so'umbel, okom ae'anai ina wandafuna, owa'. Ine' negawa ae' okom nainaila enis epes, aitu la'ifiwi efa' nimanimi.

¹¹ Ine' negawa waf aonai hianai esis sanda'meana ae' ma nimanimi amama efa'am wambel anama wenifina Antiok naloma Aikoniam naloma Listra. Ine' negawa amamaga nimanimi sanda'meam efa'ami. Ea' Dembinai natagahowe ma amamaga amama nimanimi hiami sanda'meami.

¹² Emi egafis sope la'ifis soloma Krais Jisas ma sila waf Godi andeande', naumbih asasisi anona nemaf sonda'as kwapete'as.

¹³ Ea' amam awami maloma amam mambaso'ami nambimb mombaso'ma epes hiesi. Ea' anom amam mombaso'ma amam atom. Ea' waf amam manda'anai nambimb notaga aona endilisi.

¹⁴ Ea' ine' nembale'efa basef amama Godi nefa'am la'ifina. Ine' negawa amam nematawa isima fowa' sawalipina basef na'ama.

¹⁵ Ea' ine' negawa amama wapoti'. Fowa' ine' ata' so'uso'win negawa basef bu'wami Godi mape Buk Baibeli andeande'. Buk anama la'ifina ma nose'ena gawa bu'unai neloma okom bu'unai ma ine' nembale'efa Krais Jisasa God nagiambamena nofa'ena netanimani.

¹⁶ Ambal Bu'unai Godi atona nafela ukup amam profeti manda' basef amama hiami mape Buk Baibeli. Basef amama bu'wami ma mose'apa gawa bu'unai, mih'ambapa waf aonai ma mokwahona, mihi'ambapa fe' ape'inai, muwalipapa ma mila waf bu'unai.

¹⁷ Basef amama manda' ape' epes Godi la'ifipa endilisi ma monda' maol hianai bu'unai Ananinai.