2 Timoti 2 - Basef Buꞌwami Godi

Ine' nepe si'i soldia bu'unai nanda' maol Kraisi

¹ Nogalome ae'inai, la'ela'ef ine' nepe la'ifina ma Krais Jisas nigiambamena na'ama pepel anama naso' ape' mape la'ifipa ma Anan.

² Basef hiami ine' name' fowa' awalapama naep epes hiesi, amama newalapama anom amam bu'wami mogawa basef andeande'i ma mi'ipa enis epes andeande'.

³ Ine' nepe la'ifina endilisi si'i soldia naitu la'ifina nila Krais Jisas. Nefa' nimanimi amama neloma afa' anofa soldia ananifai ma maol anama Godi.

⁴ Aman anama nape si'i soldia, ina nahapila maol naninani, owa'. Nanda' maol anama soldiai bu'unai atona ni'i dembinai soldia ananinai okom ninila maol ananinai.

⁵ Na'ama etin, emi aman nondondombam noloma enis nosagih, nila waf anama esis sasagihanai. Ama nikila' nofa' amamaga amama bu'wami sasagih sikila' sefa'ami. Ea' i'i anan owa' nigi'ma waf anama sasagihanai andeande', atuwasi ina nofa' amamaga amama, owa'.

⁶ Aman nanda' maol lu'unai aofi ma numafi aof andeande' nambimb nili' nela' gwa'aimi aof anama nisila' enis epes.

⁷ Ine' okokoma basef amama a'iami. Nambimb Dembinai nomboma okom ine'inai, ea' negawa basef amama hiami ofagema.

⁸ La'ela'ef ine' okom nopoma Jisas Krais, anan naga' notanima nohafel wapoti'. Anan wambota anama Deviti, si'i a'iama basef bu'wami Godi.

⁹ Ae' awalapa basef amama bu'wami. Amama atom dei' sa'i ae' aowei, sase'e nimanimi lu'wami mamumami. Sanda'e anda' kalabus wapoti'. Ea' basef Godi ina manda' kalabus mape, owa'etin.

¹⁰ Ea' anda' okom ae'anai nataga la'ifina ma aitu la'ifiwi la'ela'ef igiambama epes isima God nosahe'as ea' Ananisi. Ae' a'i God nigiambama esisa nofa'as sotanimani ma Krais Jisas soloma howalagon pepel nape la'ela'efi.

¹¹ Basef amama endilisimi ape' mombale'efam la'ifipa. Basef amama. I'i endilisi ape' moga' molomana, anona nemaf mohafel mope namepa molomana wapoti'.

¹² I'i ape' mope la'ifipa mofa' nimanimi lu'wami, anona nemaf mope si'i king molomana. I'i mowa' alafugahana, Anan wapoti' anona nemaf nowa' alafugahapa.

¹³ I'i ape' mi'i ape' alupupai Ananipai milana, ma owa' milana, ea' ape' hapaipai. Ea' Anan atona naila basef Ananimi endilisi andeande'. Ina anona nemaf nokwaham nombaso'mas, owa'.

Amam manda' maola God endilisi, agof amamumi mataga mandawalapa naep Godi

¹⁴ La'ela'ef ine' nefela ukup asasimi ma basef amama. Ni'ipasa ma naep Godi amama. Ipe' ina pi'i basef pepa'am pelomasa basef mamumami, owa'. Waf anama ina nigiambamas, owa'. Waf anama nambimb mohambombaga isima some'ami.

¹⁵ Ine' nenda' maol Godi la'ifina netaga aman nanda' maol endilisi, ma ambal ine'inai ina aona ma maol anama, owa'. Nenda'ana na'ama ma God okom bo'ona ma ine' ma ni'i basef Ananimi bo'om endilisi.

¹⁶ Ine' nihi'ama basef awami. Amama ina basef Godi, owa'. Basef amama nambimb monda' esis sofe' eaf anama aonai ma sowa' alafugaha God.

¹⁷ Basef asasimi awami atom nambimb motaga lu'um si'i maselis awami, monda'as motaga lu'um endilisi. Tisa asasimi biam Himeneus naloma Filetus manda' waf anama, ma'i basef mamumami wafimi.

¹⁸ Amam amama mololama basef endilisimi ea' ma'iam ma'i, “Ape' motanima mohafel hi'agilif ea', ina ata' motanima mohafel wapoti', owa'.” Basef amama atom amam mahambombaga ukup la'ifimi enis epes sombale'efa Godi.

¹⁹ Ea' dei' God nawa anona olaf la'ifinai dei' notawa. Olaf anama anom amef mailana ma'i na'ama ma'i, “Dembinai nogawa andeande'ma epes isima Ananisi.” Ea' anom wapoti' ma'i, “Emi egafis sa'i agel Dembinai, sokwaha waf aonai.”

²⁰ Ipat lu'unai nomon dis amama hiami esis sanda' kapa bu'unai gol o siliwa main howalagon sanda'ami, anom sanda' lawah sanda'am, anom sala' etap sanda'ami. Anom sanda'ama maol bu'unai, si'i sanda' gwa'aimi sa'am. Ea' anom sanda'ama maol aonai falafunai, sala alufuta.

²¹ Ea' dei' emi epen nekwaha waf aonai ma nepe bo'wen andeande', inima nambimb nepe si'i dis amama sanda' maol bu'unai atona. Ea' Dembinai nigiambaman nepe andeande' nenda' maol ananinai. Ea' enin nendandombam nenda' maol naninani bu'unai hianai.

²² La'ela'ef ine' nendafa'ma ukup amama awasimi mataga ma amam amama awomimi. Nenda' maol bu'unai la'ifina nembale'efa God nila waf bu'unai neloma okom nainaila enis epesanai. Ea' nila waf opaf awaninai, neloma epes isima opalef mape bo'om andeande' sofala Dembinai.

²³ Ea' ine' newa' alafugama basef amama mamumami awami falafumi ma epes isima ukup mase'asi gawa a'asi. Ine' negawa basef amama atom mawalapa ukup mamumami wandafumi ma'i mandahihianamam.

²⁴ Aman anama nanda' maola Dembinai ina ni'i anom basef wafimi nifitapam neloma enis epes, owa'. Anan niti amam nematawa hiesi uwahipis nose'as opaf. Anan nope dembinai tisa, nosopama okom wandafunai, nope niti esis sonda'mana waf aonai.

²⁵ Anan nuwalipas sa'ombel nihi'amba andeande' epes isima sandaiwa'manai sosambala basef ananimi. Anan nonda' maol na'ama nigiambamas, anona nemaf somboma opalefa sogawa basef endilisimi andeande'.

²⁶ Fowa' Satan naolo'as isag ananinai ma saila basef ananimi. I'i esis sogawa basef amama endilisimi, nambimb ukup asasimi motaga alihim wapoti' ma sokwaha isag anama Satani sifi'mai God.