2 Tesalonaika 3 - Basef Buꞌwami Godi

Pol na'i, “Ipe' penda' betena God nigiambamafa.”

¹ Ipe' Kristen alupipei, afa' wa'i ata' wi'ipipago anom basef wapoti'. Ipe' penda' betena Goda nigiambamafa ma basef Dembinai mefe' mehip anama hiagoma mofa' agel lu'unai si'i fowa' manda'am la'afena ipe'

² Ipe' penda' betena afa' ma God notagahofa ma lagofa epes isima sanda' waf aonai. Ipe' pegawa epes hiesi ina dei' sembale'efa basef Godi, ata' owa'

³ Ea' Dembinai naila basef ananimi andeande' nanda' amamaga ananimi andeande' ma nonda'epa petaga la'ifipa numafipa ma aman aonai owa' la'ifinama nomboma opalef ipe'imi

⁴ Dembinai nafela ukup afa'imi dei' ogawa ipe' na'ama. Waf hianai wa'ipipa ma pinda'anai, anama ipe' penda'ana endilisi. Ea' anona nemaf wapoti' ina pindaiwa'mana, owa'. Pilana penda'ana la'ela'ef

⁵ Afa' wa'i Dembinai nonda' opalef ipe'imi ma pegawa God okom nainailipa endilisi. Afa' wa'i nemaf anama nimanimi motagamepa, pitu la'ifipa ma pepel Kraisi atona penda' waf bu'unai atona.

Epes hiesi sonda' opeh

⁶ Ipe' Kristen alupipei, afa' wa'ipipa mehip na'ama ma agel Dembinai Jisas Kraisi. I'i enis alupusi ipe'isi sope etina owa' seme' basef amama wa'ipasam sieilam, ipe' pihi'amas pekwahis pefe'

⁷ Ipe' pegawa ma pila waf afa'inai. Fowa' wape walomepa, ina wape etin, owa'

⁸ Ina ofa' gwa'aimi na'a ma ipe', owa'. Watalom etin wa'am. Ea' wanda' opeh la'ifimi hiami wanda'am owamb alipa ina wapoma ipe' etipa pimafiafa, owa'

⁹ Afa' wi'i ofa' gwa'aimi ma ipe', God na'i andeande'ma okom ananinai. Ea' afa' wandaiwa'ma ofa' gwa'aimi ipe'imi, owa'. Afa' wanda'am na'ama ma ipe' pati waf afa' wanda'anai ma petolona pilana

¹⁰ Ipe' pegawa fowa' wape walomepa afa' wase'epa mi'uli na'ama. Na'i epen owa' nenda' maoli, ipe' ina pemafian pese'an anom gwa'aimi, owa', hapaini

¹¹ Afa' ina wa'ipipa na'ama etin, owa'. Wame' basef enis sape la'afena ipe'i ina sanda' opeh, owa'. Sape etin. Esis sapoma basef atom usihimi ma amamaga enis epesi atom

¹² Agel Jisas Kraisi Dembinai ape'inai afa' wa'ipipa mehipa mi'uli anama ma epes isima sape etini, wa'i ofela ukup asasimi ma sonda' waf na'ama. Esis ata' sope andeande'ma sonda' maola sotagama gwa'aimi asasimi atom dei'

¹³ Ipe' Kristen alupipei, ipe' ina ala'uta nepa ma penda' waf bu'unai, owa'

¹⁴ I'i enin epen owa' nila basef amama hiami afa' wanda'ami, ipe' pegawa epen inima andeande'. Ea' pihi'aman pepe laogona enin. Ama enin ambal aona ma waf ananinai. Dei' main, enin ina naila basef afa'imi, owa'

¹⁵ Ipe' ina pefalan pi'i nautamepa ipe'ini, owa'. Ukup mopoma enin si'i alupini ipe'ini ea' pi'ipana negawa waf anama aonai ma nekwahona.

Anom basef tu'wanim

¹⁶ Afa' wa'i Dembinai anan ofagonama opaf awanena la'ela'ef nose'epa okom awanena ma mamagoma ipe' pepe peafe'ma. Afa' wa'i Dembinai nope nolomago ipe' hipei.

¹⁷ Anan nanda' basefi nase'e pen ae' Pol anda' basef amama ma lagel ae'anai, a'i nemaf bu'unai ma ipe'. Ikwaf anama ae'anai ma basef amama hiami ae'ami, anda'am na'ama etin.

¹⁸ Afa' wa'i Dembinai ape'inai Jisas Krais nigiambamepago ipe' hipei na'a. Ea' ma'um.