2 Tesalonaika 2 - Basef Buꞌwami Godi

Basefa aman aonai nosambala mi'uli Godi

¹ Ipe' Kristen alupipei, afa' wa'i wi'i basefa Dembinai ape'inai Jisas Krais anona nemaf notanima nifi'i wapoti' ma ape' mondakolas molomana. Dei' wahali'ipa na'ama

² Enis epes sa'ipipa sa'i nemaf Dembinai anona nemaf niefi'ianai nataga ea'. Ae' ine' egawa. Basef amama Ambal Bu'unai Godi na'ipanam enin epen na'ipi pas o enin epen na'iam okom ananinai atona o esis sa'i afa' wanda' basef amama wasapa'am mafo'o wa'ipasa basef amama? I'i peme'asa basef amama, ipe' ina pehafel gegelalasipa kwapete' mehip ea' ukup ipe'imi aom, owa'

³ Ipe' ina peme' enin epen nembaso'mepa ma anom basefa Dembinai notanimani, owa'. Nemaf dembinai niefi'ianai, ina nataga, owa'etin. Epes hiesi ata' sali' sosombala basefi sose'ana alafugah God ea' aman aonai nosambala mi'uli Godi notaga nondawalap. Aman anama owagama nefe' wambel aonai hel nif fandumi ma'oma

⁴ Anan noham amamaga amama hiami epes sanda' lotumami sailam si'i Godi ea' nowa' alafuga ma amamaga amama. Ea' nefela agel ananinai atona lu'una, nonda' amamaga amama hiami mofe' owina anan. Ea' nuwis nupe ipat lu'unai Godi nowalapa basef na'ama na'i, “Ae' atowe Dembiwei God.”

⁵ Fowa' ae' ape alomepa a'ipipa basefa amamaga amama. Ipe' ukup mase'epama a'amon?

⁶ Ipe' dei' pegawa amamaga amama mahefa eafa aman anama aonai ma notaga nondawalap alihiguma nemaf anama God nandandepananai

⁷ Ipe' pegawa dei' pepel anama nosambala mi'uli Godi ata' nanda' opeh nandambaho' nape. Anama ata' napoma mondahama nogota anama aman anama nili'akwa eaf ananinai nofe'

⁸ Nemaf anama aman anama aonai nosambala mi'uli Godi notaga nondawalap. Ea' nemaf Dembinai Jisas niefi'ianai nohana naga'ma malogel ambip ananimi atom moloma mafifili lu'wami ananimi

⁹ Aman anama aonai nosambala mi'uli Godi notaga nondawalap alihiguma ma pepel Satani atona. Ea' waf baso'mainai Satani nonda' anan la'ifinai nonda' ikwaf naninani si'i God nanda'anai

¹⁰ Anan nanda' waf hianai baso'omunai ma waf aonai. Ea' nombaso'ma esis saila eaf sefe' higililasanai. I'i epes isima si'i aho'ma basef endilisimi, God nofa'as sotanimani sope andeande'. Owa', sandaiwa'

¹¹ Ea' God nosapa'i amamaga amama mombaso'ma esisi ea' seme' basef amama kwamaimi baso'ami asasimi sembale'efam

¹² Esis amam nematawa hiesi ina ata' sombale'efa basef endilisimi, owa'etin. Sondanifela sonda' waf aonai atona. Amama atom anona nemaf sofa' amamaga awami atom basef kot Dembinai God nonda'anai.

God nosahe'epa ea' ma nofa'epa pifi'mai anan

¹³ Fowa' gani dambadamba God nosahe'epa ma nofa'epa petanimani pambale'efa basef endilisimi. Ama pepel Ambal Bu'unai Ananinai nanda'epa bo'wepa. Ea' la'ela'ef wanifela Goda ipe'. Kristen alupipei, okom Dembinai nainailipa

¹⁴ Nemaf anama afa' wa'ipipa basef bu'wami Godi ma anan nofalepa nose'epa nafifili Dembinai ape'inai Jisas Kraisi. Ma God nefela agola Dembinai ape'inai Jisas Krais noloma agof ipe'imi wapoti'

¹⁵ Ea' dei' ipe' Kristen alupipei pitu la'ifipa ma basef hiami Godi wa'ipipam malogof o wanda'mepago okwatih, amama ipe' pendanifel

¹⁶ Afa' wa'i Dembinai ape'inai Jisas Krais naloma God Ahalomapa ape'inai ukup amamumi maimailapa magiambamapa manda'apa mataga la'ifipa. Amam manda'apa na'ama la'ela'ef. Ea' magiambamapa mape mohafa God nonda'apa mope andeande'

¹⁷ Ea' dei' afa' wa'i amam biam monda'epa petaga la'ifipa migiambamepa penda' waf bu'unai hianai ma pi'ipasa basef bu'wami hiami.