2 Pita 2 - Basef Buꞌwami Godi

Waf amam profet mambaso'ami manda'anai

¹ Fowa' anom profet mambaso'ami mataga la'afena esis amam nematawa Israel mambaso'masa basef baso'maimi. Dei' na'ama etin anona nemaf anom amam mambaso'ami mohafel la'afena ipe' wapoti' ea' mondambaho' mifi'i mombaso'mepa mi'ipipa basef mamumami hiami baso'maimi mahambombaga epesi. Dembinai Anan fowa' naga' ma natala amam amama natagahoma waf aonai amam manda'anai ma mope andeande'. Ea' owa'. Amam mase'ana alafugah Dembinai. Nambimb monda'am na'ama etin, ea' mehip amam motaga aom.

² Amam manda'am na'ama nambimb enis amam nematawa hiesi sila waf naninani aonai amam manda'anai. Ea' enis siti waf aonai amam mambaso'ami manda'anai ea' sosambala basef bu'wami si'i basef awami atoma waf bu'unai endilisi Godi.

³ Amam amama kowalami endilisi, amama atom nambimb monda' basef baso'maimi ukup amamumi atom ma'iami ma mofa' otamba maim ipe'imi. Fowa' gani God nogawa nandandepa anona nemaf mapomam ma nowaloga amam mofe' wambel aonai hel. God nandondomba anom amamaga mohamboga amam endilisi ata' mape la'ela'ef mohafa amam. Ina ma'oh, owa'.

⁴ God ina niambali' amam ensel amama fowa' manda' waf aonai, owa'. Anan nakwahom mowala wambel aonai hel. Ea' nowa'am la'ifim mape la'ela'ef anama mape mohafa anona nemaf God nowalogama basef lu'wami.

⁵ Anan ina niambali' esis amam nematawa fowa'isi saso' alafugahanai sape andeande', owa'. Anan nanda' embel lu'wami matef mahas afis hi'alas. Anan numafi Noa atona nawalipasa basef bu'wami Godi nofa'ana naloma epes 7-peleis wapoti' nofa'as sotanimani sape andeande'.

⁶ Ea' nahambombaga epes hiesi sape wambel biefina lu'unai Sodom naloma Gomora wapoti'. Epes isima wambel anama God nahagon naofagon nif lu'wami dei' agambeh atom ma'oh. Anan nagwamasa waf aonai esis sanda'anai nanda'as si'i anona ikwafa nimanimi lu'wami emi egafis sosambala basef Ananimi anona nemaf seafa'ami.

⁷ God nagiambama aman anama bu'unai Lot numafiana nofa'ana notanimani nape andeande', ina naga', owa'. Anan okom aona endilisima waf aonai so'a waolanai amam Sodom manda'anai, mosambala basef Godi.

⁸ Aman anama bu'unai Lot nape nalomas la'ela'ef name'ama waf aonai amam manda'anai natolom. Okom ananinai aona endilisi ma waf anama amam mosambala basef Godi manda'anai.

⁹ Basef amama ma'ipapa alihim ma'i Dembinai numafi epes bu'wasi saila waf ananinai andeande'. Maina nemaf amama meagwambasi motagamas, anan nogawa ma nili'akwas sope andeande'. Ea' Anan nahapila esis sanda' waf aonai ma nogwamasa nimanimi ma waf aonai esis sanda'anai sape la'ela'ef sofe' sotagama nemaf anama Anan nowalogasanai.

¹⁰ Basef amama endilisi atom mapoma emi egafis ukup mohafema waf aonai alop atona ma ukup ma'i basef Dembinai sa'i falafumi. Epes isima anona nemaf sofa' nimanimi lu'wami endilisi. Amam mambaso'ami matotopa' basef Godi maila ukup amamumi atom mafela agof amamumi atom. Amam ina umbamahama manda' amam mape ilif heveni findiwam, owa'.

¹¹ Ea' ensel bu'wami la'ifimi mikila' amam amama mambaso'ami, amam ina magwam manda' ensel amama awami findiwama naep Dembinai, owa'.

¹² Amamaga amam mambaso'ami owa' mogawame, amam ma'i basef awami ma amam. Amam mambaso'ami si'i mafis mape aolopi owa' ukup bu'wami miapaimi mape aolop atona. Mafis amama enis epes sagolopam satolom saham afum hi'alam ea' na'ama etina amam amama wapoti' anona nemaf aom hegililam.

¹³ Amam manda' waf naninani aonai mase'as nimanimi enis. Ea' anona nemaf God nogwamam mofa' nimanimi wapoti'. Amam okokoma sa' gwa'aimi embel maim maloma waf aonai so'a waolanai ea' sandanifel endilisi ma sanda' waf anama alip. Nemaf anama ma' gwa'aimi maloma ipe', waf aonai amam manda'anai si'i anona ikwaf aonai la'afena ipe'. Amam mape malomepa mandanifela waf aonai amam manda'anai.

¹⁴ La'ela'ef naep amamumi mati nematawa wanda' waf aonai la'ela'ef ma monda' waf aonai molomawa ea' amam ina makwaha waf anama, owa'etin. Amam makikipa enis epes mombomefas sonda' waf aonai. Amam mogawa endilisima waf anama aonai kowalasanai ma amamaga enis epesi. Anona nemaf God nohambombagam endilisi.

¹⁵ Amam maso' alafugaha eaf bu'unai, amama atom dei' ukup mase'ama waf bu'unai. Amam maila waf anona aman Balami, Beor nogalomana. Anan okom nohafela nanda' waf aonai ma nofa' otamba hiami.

¹⁶ Ea' neme' basef la'ifimi ma'ipana mehipa nokwaha waf anama aonai. Basef amama donki ananinai atona noga na'ipanam si'i epen na'i nasopama eafa waf anama aonai ukup mase'asanai profet anama na'i nonda'anai.

¹⁷ Amam na'amaimi si'i ifatagw amama magal mowala etap embel a'ami. Amam si'i elagw uf lu'unai nufapusam nawalom mafe' deindei'. God nandondomba akot lu'unai endilisi ma anona nemaf amam mopaigon.

¹⁸ Amam amama matotopa' basef Godi ma'i ma'oh etina basef falafumi awami amamumi. Amam ma'ipa enis epesa waf ukup mohafemanai ma so'a waola waf naninani aonai alopunai. Amam manda' waf anama ea' mambomefa enis epes ata' dei'aol sataga sa'i sokwaha waf aonai epes isima sololama Godi sanda'anai ea' mambomefas saila amam.

¹⁹ Amam ma'ipa enis epes ma'i, “I'i ipe' pila basef afa'imi, nambimb ipe' pepe andeande'ma ina anom amamaga mowa'ipai, owa'. Pepe wafifipa.” Ea' owa'. Amam mape owina waf aonai, anama nombalo'am la'ifim. Dei' main, i'i anom amamaga mombomefa enin epen, nambimb epen inima la'ela'ef nape owina amamaga amama mambomefani.

²⁰ Emi egafis sokwaha waf aonai etapanai nanda' epes awes ma sogawa Dembinai ape'inai Jisas Krais nofa'as sotanimani, ma i'i waf anama aonai nomboma esis wapoti' ma nombale'as la'ifis, anona nemaf sope la'ela'ef na'ama. Sali' sape la'ifisa sonda' waf aonai, ata' sape awes kwaukwawie'. Ea' dei' satanima sanda' waf aonai wapoti', awes endilisi sanda' waf aonai la'ela'ef.

²¹ I'i esis ina sogawa mi'uli bu'unai Godi, ata' sope awes kwaukwawie'. Ea' dei' saso' alafugahana, anona nemaf sope awes endilisi.

²² Waf anama natagamas si'i anom basef endilisimi epes gawaisi sa'iami ma'i na'ama ma'i, “Nombat notanima nafe' na' nagu'omi ananimi wapoti'.” Anom basef wapoti' ma'i, “Bol nafe' nasa'of ea', natanima nafe' nasa'of wambu' awagom wapoti'.”