2 Pita 1 - Basef Buꞌwami Godi

¹ Ae' Saimon Pita anda' maol Jisas Kraisi, anan nandandepe aposel. Ae' anda'ago basef amama ma ipe' amam nematawa pefa' bale'ef bu'unai na'ama etin si'i afa' ofa'anai. Bale'ef anama ipe' pefa'ana waf bu'unai Jisas Kraisi, Anan God ape'inai nofa'apa motanimani.

² God nagiambamepa na'a nanda' opalef ipe'imi mape awanem. Ae' a'i amama mope si'ima ipe' ma eaf anama pegawa God naloma Jisas Krais Dembinai ape'inai.

God nofalapa nosahe'apa ma mape Ananipai atepa

³ Krais nofalepa ma pefa' pepel howalagon ananimi atom pelomana. Ama pepel God nase'anami atom anan nase'apa pe bu'unai amamaga amama bu'wami hi'alama mope andeande' mila waf Godi. Krais nanda'apa na'ama ma eaf anama mogawa anan atona.

⁴ Pepel Ananinai naloma howalagon amama atom Anan nase'apa basef ananimi na'i endilisi atom. Basef amama lu'wami bu'wami endilisi. Basef amama atom ipe' pataga la'ifipama pefa' ambal namunai ma waf Godi pelomana. Ama pefe' pihi'ama waf aonai naninani nataga nanda' ukup mohafel endilisi ma waf aonai nape etap anae'i nanda' epes sataga awes.

⁵ Ipe' ukup mopoma amamaga amama penda' maol la'ifimi endilisi dende'ma ikwaf pepel ipe'inai piwatania bale'ef ipe'inai penda' waf bu'unai. Ea' piwatania waf anama bu'unai ma pefa' gawa bu'unai.

⁶ Ea' piwatania gawa anama bu'unai ma waf ukup mopeipa pimafi alop andeande'. Ea' piwatania waf pimafi alopanai ma waf pitu la'ifipa nemaf anama nimanimi meatagamipei. Ea' piwatania waf pitu la'ifipa ma penda' waf pefela agel ananinai.

⁷ Ea' waf anama hianai bu'unai nali'i piwataniana noloma waf ukup mimila sahin owan atona etin pigiambamas. Ea' waf anama ukup maimailasanai piwatania waf bu'unai pigiambama sahin owan ipe'isi.

⁸ Ipe' pegawa Jisas Krais dembinai ape'inai anan ofagonama waf anama hianai hi'alana. I'i waf anama nope ipe' la'ifipa notaga lu'una endilisi nikila' pali' panda'anai, gawa anama ipe'inai ina nambimb nepe na'a, owa'. Nambimb notaga nefe' lu'una nowalapai waf bu'unai hianai.

⁹ Emi egafis waf anama a'asi, esis ina nambimb siti anom amamaga mape laogoma, owa'. Esis si'i naep mase'asi ea' ukup mase'asa God nasa'opas nakwahomasa waf aonai hianai esis sali' sanda'anai.

¹⁰ Ea' ipe' penda' waf bu'unai pepe la'ifipa endilisi pikila' fowa' pali' panda'ana paila basef amama fowa' God nofalepa nosahe'epa ma pape ananipei etipa. Penda'am na'ama ma pegawa endilisi God nofalepa nosahe'epa. I'i ipe' penda'am na'ama la'ela'ef, nambimb ina pewa ma anona waf aonai, owa'.

¹¹ I'i ipe' pilam, anona nemaf God nonda' eaf nogal alihina pendanifel pefe' piwis wambel Jisas Krais Dembinai ape'inai nape la'ela'efa. Anan atona nofa'apa motanimani.

¹² Endilisi, ipe' pegawa amamaga amama ma basef amama mali'i pembale'efam la'ifipa ma basef amama endilisimi paitu la'ifipamam. Owa'etin, ae' a'i ata' i'ipipa efela ukup ipe'imi ma pilam andeande'.

¹³ Nimeguf hiami ae' ape namowe alomepa etap anae', okom na'i i'ipipa timbi tambela efela ukup ipe'imi ma pila basef amama. Ipe' ina ukup mose'epamam.

¹⁴ Ae' egawa nogota bandana nape ma nambimb sehe ega' si'i Dembinai ape'inai Jisas Krais nihi'ambe ea'.

¹⁵ Amama atom dei' a'i enda' maol lu'unai dende'ma ikwafa pepel ae'anai enda' anona eaf ma anona nemaf ae' ega' ea', ipe' ukup mopoma basef amama hiami ae' a'ipipami pepe pegawam.

Afa' wati pepel howalagon Godi nape Krais

¹⁶ Afa' wa'ipipa ea' pegawa pepel Dembinai ape'inai Jisas Kraisi ma anona nemaf notanima nifi'i noloma pepel lu'unai Ananinai. Afa' ina waila anom basef numunefin epes gawaisi sa'iami wa'ipipa basef amama Kraisi, owa'. Afa' watolona endilisi nofa' pepel la'ifinai bu'unai Godi ma naep afa'imi, amama atom dei' wa'ipipa.

¹⁷ Nemaf anama afa' wape walomana halaf anama, wati Anan nofa' agel lu'unai naloma pepel howalagon bu'unai ma lagel Ahalomana Godi. Nemaf anama anona malogel na'i nataga God napoma nafi'mai Jisas na'i, “Anama Nogalome Ae'anai okom nainailana endilisi. Okom Ae'anai bo'ona ma Anan.”

¹⁸ Afa' wape walomana halaf anama God nandandepagoma bo'wagoma ea' wame' basef amama malogel anama na'i nataga ilif.

¹⁹ Afa' atofa ukup mapoma basef amama God na'iami wame'am nemaf anama wape halaf anama. Basef amama God na'iami manda basef fowa' amam profet ma'iami mataga la'ifim wahapilam la'ifim wa'i endilisimi atom. I'i ipe' peme' basef amama amam profeti ipe' okokomom pepan, andeande'. Dei' main, basef amama si'i anona nagwapin fandonai nafifil nape la'afena owamb. Ea' howalagon nape la'ela'ef nafi'i nataga lala. Ama ondo'w kuhimbitainai lala'wan mafifil opalef ipe'imi nomon.

²⁰ Ea' ipe' ata' pegawa basef amama la'ela'ef. Ina anona profet atotona naila okom ananinai atona dei' na'i anom basef ofagema amam profet fowa' manda'am mail buk Baibeli, owa'.

²¹ Dei' main? Fowa' ina enin epen atitin na'i anom basef mofa'ama Godi ma okom ananinai atona, owa'. Ambal Bu'unai Godi atona nafela ukup amam profeti mail okom Godi atona ea' mofa' malogel Ananinai ma'i basef amama.