2 Korin 9 - Basef Buꞌwami Godi

Esis sase'asa amamaga sigiambama epes Godi amamaga a'asi

¹ Ipe' pegawa maol bu'unai pigiambama esis amam nematawa Godi amamaga a'asi. Ea' ae' ina enda' anom basefa amama, owa'.

² Ae' egawa, opalef ipe'imi mohafela panda' maol anama ea' la'ela'ef afela agof ipe'imi ma naep esis Kristen sape etap hiagoma sape Masedonia. A'ipas na'ama a'i, “Afagel nali'i esis Grik sape Korini sandondombam ea' ma sonda' maol anama.” Ea' esis Kristen sape Masedonia same' basef amama ma ipe' ukup mohafel ma maol anama. Dei' amama mafela ukup esis Kristen sape Masedoniai hiesi ma sonda'am wapoti'.

³ Ea' ae' andaiwa'ma basef afa' wafela agof ipe'imi ma esis Kristen Masedoniai motaga falafumi atom, owa'. Amama atom dei' esapa' owapepa ipe'imi wanom mofe'mago ipe'. Andeande'ma ipe' pendondombam, pepe si'i a'ipipam.

⁴ I'i owa', enis Masedonia sifi'i solome siti ipe' ata' owa' pendondombam, afa' ambagof aom ma amama ea' ipe' wapoti' pelomafa. Dei' main, afa' wali' wa'ipipas wa'i ipe' panda'am pandondombam ea'.

⁵ Ea' ae' okom na'i i'ipa amam alupumi wanom mehipa muli' mofo'o motagamepa ma mondondomba otamba amama ma'um pali' pa'iam pa'i pese'asami. Ea' penda'am na'ama ma nemaf ae' efo'o pendondomba otamba amama hiami mo'oh. Amama afa' ina wasapa'epa mehip pembe'am, owa'. Ukup ipe'imi atom pendanda' ma pese'asam.

⁶ Ipe' ukup mopoma enin epen nawa gwa'aimi kwawie'im. Anona nemaf enin nela' kwawie'im. Epen nawa hiami anona nemaf nela' hiami.

⁷ Ea' ipe' hipei ata' pili' ukup motamea andeande' atona etin ea' pila nomonas amama atom pese'as amamaga. Na'ama enin epen okom aona nese'as amamaga ananimi o enin epen ni'i enis epes si'ipan mehipa nese'as na'ama, owa'. Dei' main, God okom nainaila epes isima sandanifel sase'as amamaga.

⁸ God Anan wilama nese'epa amamaga bu'wami hiami ipe' ma nambimb ipe' si'ipamam endilisi. Anan nanda'am na'ama ma nimeguf hiemi ipe' penda'am peso' enis epes ina hi'ilam, owa'. Mo'oh la'ela'ef. Ea' ipe' amamaga hiamipei penda' opeh bu'wami hiami mamumami ma pigiambama enis epes wapoti'.

⁹ Si'i Baibel na'iam na'i, “Epes isima sase'as amamaga hiami epes isima amamaga a'asi. Ea' epes hiesi ukup mapoma waf bu'unai asasinai la'ela'ef hihif.”

¹⁰ La'ela'ef God nase'as olelemb gwa'aimi hiami epesa sawam aof. Ea' nase'as gwa'aimi mamumami hiami epesa sagwa'am. Ea' nambimb nese'epa amamaga ipe' wapoti' ma pese'asam enis epes. Ama amamaga amama ipe'imi motaga lu'um endilisi ma pese'asam wapoti', si'i enin epen nawa olelemb gwa'aimi ma anom nimeguf mafe' ea', nala' gwa'aimi hiami endilisi nefa'am.

¹¹ Nambimb ipe' pefa' amamaga hiami ma la'ela'ef la'ifipama peso' alupusi kwahusi ma amamaga hiami. Nemaf mamana afa' ofa' amamaga amama ipe'imi ma oso'asam alupusi isima, waf bu'unai ipe'inai nanda' esis sanifela God.

¹² Ipe' penda'am na'ama ma pigiambama alupusi isima amam nematawa Godi ma waf anama, ipe' panda' opeha pagiambama epes isima kwahusi. Ea' ina amama atom, owa'. Ipe' panda' waf anama pafela epes hiesi ma sefela agel Godi sinifelona endilisi.

¹³ Waf anama ipe'inai nandawalap alihiguma nihi'amba epes hiesi ma ipe' paila basef Godi andeande'. Ea' enis epes wapoti' sefela agel Godi lu'una ma ipe' paila basef bu'wami Kraisi pawalapama pagiambama esis saloma enis epes wapoti' hi'alas.

¹⁴ Ea' esis nambimb ukup mimilipa endilisi ma sonda' betena ipe'. Dei' main, esis sogawa waf Godi nagiambamepa na'a nape lu'una endilisi ma ipe'.

¹⁵ Waf anama God nase'apanai, anama lu'una endilisi. Ea' ape' basef a'apa ma mi'ipa epes a waf anama bu'unai Godi. Ape' minifela Goda waf anama Ananinai.