2 Korin 8 - Basef Buꞌwami Godi

Esis Kristen sape etap hiagoma sagiambama esis alupusi sase'asa otamba

¹ Ipe' alupipei, dei' a'i i'ipipa ma pegawa waf esis sios Kristen hiesi sape anona wambel etap hiagoma Masedonia sanda'anai. God nagiambamas na'a nihi'ambas waf bu'unai sagiambama enis epes kwahusi.

² Nimanimi lu'wami matagama esis ea' amama magwamba opalef asasimi endilisi. Ea' nogota anama esis sape amamaga a'as endilisi. Ea' esis sofa' danifel lu'unai nalomam. Ea' esis ukup ma'i enis Kristen kwahusi, satama otamba maim hiami ma sigiambamas.

³ Ae' egawam ea' awalapam a'iam mandawalap alihim. Amama amamaga kwawie'im ma'omasi esis wilama sose'asam, esis sase'asam. Ea' ina sase'asa amama atom, owa'. Sase'asa anom hiam wapoti. Ea' sataga kwahusi endilisi ma amamaga. Esis saila ukup asasimi atom, ea' dei' sase'asam.

⁴ Ea' esis la'ifis endilisi ma afa' wi'i aho'ma sonda' maol Godi soloma enis Kristen sigiambama epes Godi kwahusi sape etap hiagoma Judia.

⁵ Fowa' afa' ukup ma'i na'ama wa'i nambimb esis sose'as anom otamba. Ea' esis sali' saso' esis etisa Dembinai saila okom Godi sase'afa opalef asasimi afa' wapoti ma sose'afa anom otamba sigiambama esis Kristen kwahusi.

⁶ Fowa' Taitus nafela maol anama ma ipe' pagiambama Kristen amama atom. Amama atom dei' afa' la'ififa ma anan nigiambamapa ma pembefa maol anama hi'ilana.

⁷ Alupipei, amamaga hiami ipe' panda' waf bu'unai endilisi, pikila' enis epesa waf anama. Ipe' pembale'efa God la'ifipa. Ambal Bu'unai Godi nase'epa gawa nafelepa ma pewalapa basef bu'wami ananimi. Ipe' pahafel endilisi ma panda' maol Godi ea' ukup maimailafa wapoti'. Ipe' panda' waf anama bu'unai na'ama. Dei' afa' wa'i ipe' penda' anona waf bu'unai wapoti'. Pigiambama esis Kristen kwahusi pese'as anom amamaga na'a.

⁸ Dei' ae' ina a'ipipa la'ifimi, owa'. Do'ok a'ipipa ma waf esis Kristen sape Masedoniai sanda'anai. Esis sape kwahusi endilisi ea', ukup mahafel endilisi ma sagiambama enis epes na'a. Dei' a'ipipa basef amama ma ewaloga waf ipe'inai ukup maimailasanai. Ae' a'i egawa waf anama nape bo'ona endilisi si'i enis Kristen, o owa'?

⁹ Endilisi, ipe' pegawa eaf dembinai Jisas Krais nagiambamapa na'a. Eaf anama na'ama. Fowa' anan amamaga hiamunai, ea' dei' nataga wafinai endilisi. Nagiambamepa na'a nataga nape kwahunai, amama atom dei' ipe' pefa' waf bu'unai naloma amamaga hiami bu'wami.

¹⁰ Okom anama ae'anai dei' awalapana ma ipe'. Afagel do'okinai ipe' pali'a enis epes ukup mohafela pagiambama enis epes kwahusi ea' panda'am pali'.

¹¹ Amama atom dei' penda'am pembefam. Ipe' fowa' ukup mohafel endilisi ma pagiambamas. Ea' dei' wapoti' na'ama etin penda'am hi'ilam dende' na'ama etina amamaga ma'omepa.

¹² I'i ipe' penda'am na'ama God natolom na'i waf bu'unai ma okom ananinai. Ea' amamaga a'ipei, hapaimi. God nogawam.

¹³ Ae' ina a'ipipa pigiambama enis sope andeande'ma ipe' pepe aopa, owa'. A'i ipe' hipei pepe dende' na'ama etin.

¹⁴ Dei' nogota anae' amamaga ipe'imi amama magiambama epes isima amamaga a'asi. Ama anona nemaf ipe' amamaga a'epa, amamaga asasimi motanima migiambama ipe' amamaga a'epa. Penda'am na'ama ma pepe dende'epa na'ama etin.

¹⁵ Amama si'i Baibel na'iam na'i, “Epen nefa' amamaga hiami, amama ina hiam si'im endilisi, owa'. Ea' epen nefa' amamaga kwawie'im, enin ina kwahuna anom amamaga, owa'.”

Taitus naloma amam biam manda' maol Godi nambimb mofe' Korin

¹⁶ Ae' anifela God, anan nafela okom Taitusi ea' nomonas etifim si'i ae'. Ea' okom nohafel endilisi ma nigiambamepa.

¹⁷ Anan ina naila basef afa'imi atoma osapa'ana nafe'mago ipe', owa'. Anan okom nohafel wapoti' ma maol anama. Ea' dei' okom ananinai atona na'i nefe'mago ipe'.

¹⁸ Ea' afa' nambimb osapa' anona alupunai nofo'o nolomanago. Dei' main, aman anama agilinaima esis Kristen hiesi nanda' maol nawalapa basef bu'wami Godi.

¹⁹ Ina amama atom, owa'. Esis sios hiesi sandandepana ma nefe' nolomafa ofa' otamba ipe'imi ma wigiambama Kristen isima kwahusi. Afa' ukup ma'ima'i maol anama afa'inai. Afa' onda'ana ofela agel Dembinai atona ma wihi'amba epes hiesi sogawa opalef afa'imi mohafela wigiambamas.

²⁰ Afa' wandaiwa'ma enin epen ni'i basef awami ma waf afa' wanda'ana umafi otamba amama hiami ipe' paloma enis epes panda' ofa mami. Amama atom dei' afa' wa'i osapa' owalomafa anama nifi'i nefe'mago ipe'.

²¹ Afa' ukup ma'i onda' waf bu'unai atona ma epes hiesi. Ina naep Dembinai atom, owa'. Naep epesi wapoti'.

²² Ea' afa' wa'i osapa' anona aman owalomafa afa'inai nifi'i nolomago amam biam. La'ela'ef afa' watolona wandondomana ma maol hianai nanda'anai naninani. Ea' wati anan okom nohafel endilisi ma nanda'ana. Dei' anan nogawepa endilisi na'i ipe' panda' waf bu'unai atona. Ea' anan la'ifina endilisi ma nigiambamepa umafi otamba amama afa' ofa'am ofo'o.

²³ Taitus ipe' pegawana. Afa' wandao'oma wanda' maol etin ma wagiambamepa. Alupumi biam mofo'o molomanai mofa' malogof esis sios hiesi mofo'o. Amam manda' maol Kraisi mafela agel ananinai.

²⁴ Ea' ipe' pihi'ambanago waf ukup mimila enis epes. Penda'am na'ama ma amam wanom ama esis Kristen hiesi sogawa endilisi waf anama ipe'inai, ma sogawa wapoti' afa' wa'i endilisi nambimb ipe' pigiambama esis kwahusi.