2 Korin 7 - Basef Buꞌwami Godi

¹ Ipe' alupipei afa'ipei endilisi, ape' mofa' basef amama Godi endilisimi la'ifimi. Ea' mokwaha amamaga amama awami mape nomona alop naloma ambagof ape'imi ea' mope bu'upai umbamahepama God mila waf bu'unai.

Esis Korin samboma opalef, dei' Pol nandanifel

² Ipe' dei' pese'afa opalef ipe'imi. Afa' ina wanda' enin epen ipe'ini awen o wahambombaga enin, ola'ipa enin epena amamaga ananimi, owa'.

³ Ae' awalapa basefa ipe', ina a'ipipa a'i ofagema ipe'imi atom, owa'. Ae' a'iam a'i afa' wase'epa opalef afa'imi ipe'. Wanda'am na'ama ma i'i ipe' pega', afa' oga' olomepa. I'i pepe namipa, afa' wapoti' ope namofa olomepa.

⁴ Ae' okom na'i endilisi ipe' pape andeande'. Andanifel endilisi ma ipe'. Nimanimi hiami matagama ae' ea' okom ae'anai nape naloma ipe', amama atom dei' manda' opaf ae'anai nape awanena andanifel endilisi.

⁵ Fowa' afa' wafi'i otaga etap hiagoma Masedonia, alop afa'inai ina napoma noma'w owa'. Nimanimi mamumami hiami matagamafa, sa'i basef la'ifimi safitap salomafa. Ea' umbamahafa ukup matamea.

⁶ Ea' God nanda' epes isima opalef nimanimi sataga laifis nasapa' Taitus natagamafa nanda'afa wataga la'ififa.

⁷ Ina Taitus atona natagamafa dei' God nanda'afa la'ififa, owa'. Ipe' panda' Taitus nataga la'ifina, amama atom dei' God nanda'afa wataga la'ififa wapoti'. Taitus na'ipafa na'i ipe' ukup mohafel endilisi ma pa'i petolowe ea' opalef ipe'imi malefa fowa' pase'e nimanimi ae'. Ea' ukup ipe'imi mohafel endilisi ma pepe opalef etifim pelome. Amama atom dei' andanifel endilisi ikila' fowa'.

⁸ Endilisi ae' egawa basefa pas anda'am mali' mafo'o manda' opalef ipe'imi aom, ea' ae' ina opaf aona ma amama, owa'. Endilisi, fowa' ae' okom nimanina ea' dei' owa'etin. Ae' egawa pas amama manda' opalef ipe'imi nimanim, ea' amama nogota bandana atona.

⁹ Ea' dei' ae' andanifel. Ina andanifel ma basefa pas amama manda' ukup ipe'imi nimanim, owa'. Ae' andanifel ma amama manda'epa pamboma opalef pafe'ma God. Ae' egawa God atona nawalapai nimanimi amama ipe'imi ma nagiambamepa. Dei' ipe' pegawa afa' ina wanda'epa aopa, owa'.

¹⁰ Waf Godi na'ama. Nimanimi maim anan nawalapami manda'apa mamboma opalef mafe'ma anan nokwahomapa waf aonai nofa'apa motanimani. Ea' mape andeande'. I'i opalef nimanima waf etapanai, anama aonai nawalapai waf saga' safe' wambel aonai.

¹¹ Ipe' ukup mi'i andeande' ma nimanimi amama ipe'imi. God nanda'am mawalapai waf bu'unai naninani hianai ma ipe'. Amama mafelepa pahafel ulala pekwaha waf aonai ipe'inai. Ipe' ambagof aoma epen inima ipe'ini nanda' waf aonai, amama atom dei' umbamehepama basef a'ipipama okom wandafunai Godi. Opalef ipe'imi malef endilisi ma pa'i petolowe ea' la'ifipama pegalo'ma epes isima sanda' waf aonai. Ipe' pagalo'ma epen inima napani laogon. Panda'am na'ama ma pihi'amba epes hiesi waf aonai ofagena a'epa ma amamaga mali' matagamapei.

¹² Ea' endilisi fowa' anda'mepago amefa basef amama mail okwatipi ae' ina okom na'i epen inima nanda' waf aonai, a'i inima nefa' nimanimi ma waf anama, owa'. Ae' a'i waf ipe'inai notaga nondawalap alihina ma naep Godi ma pegawana andeande' na'ama. Ipe' ukup maimailafa endilisi. Amama atom ae' fowa' anda'mepago basef amama.

¹³ Waf anama ipe'inai nanda'afa wandanifel nanda'afa wataga la'ififa. Ea' ina afa' atofa wandanifel, owa'. Taitus wapoti' nandanifel endilisi. Dei' main, ipe' hipei panda' ambal ananinai napoma noma'w. Afa' wati amama atom, wandanifel endilisi.

¹⁴ Nimbewa' afela agof ipe'imi lu'uma naep Taitusi ea' dei' ae' ina ambal aona ma waf anama, owa'. Basef hiami afa' wa'ipipami amama endilisimi. Ea' na'ama etin basef afa' wali' wafela agof ipe'imi ma naep Taitusi, amama wapoti' mataga mafe' alihim, amama endilisimi.

¹⁵ Fowa' anan nali' nafe'mago ipe', ipe' hipei pase'ana opalef paila basef ananimi umbamahepa ma pesambalom. Anan okom nape na'i amama la'ela'ef dei' okom ananinai nainailipa endilisi.

¹⁶ Dei' ae' andanifel endilisi ma egawa ipe' hipei panda' waf hianai andeande' la'ela'ef.