2 Korin 6 - Basef Buꞌwami Godi

Amam aposel mofa' nimanimi hiami ma maol Godi

¹ Afa' wanda' maol Godi wandao'oma walomana. Dei' wa'ipipa basef la'ifimi na'ama wa'i, “God nagiambamepa na'a. Na'ama ipe' ukup mose'epa waf anama nagiambamepa na'a, owa'.”

² Peme'. God na'i na'ama na'i, “Nemaf ae' ati uwahipipanai anama ame' basef ipe'imi. Nemaf anae' ae' agiambamepa a'i efa'epa petanimani.” Peme'! Dei' God nati uwahipipa. Dei' God na'i, “Ae' ekwahomepa waf aonai efa'apa pitanimani.”

³ Afa' wandaiwa'ma epes si'ipafa basef awami ma maol Godi afa' wanda'anai. Amama atom dei' wandaiwa'ma onda' anom amamaga ma waf aonai monda' enis sondasisi'ip sowa, owa'.

⁴ Ea' la'ela'ef wihi'amba epes hiesi wanda' maol Godi. Dei' wihi'ambas na'ama. Waitu la'ififa endilisi ma nimanimi mamumami ma amamaga ma'i mohambombagafa.

⁵ Esis sahafa sanda'afa wanda' kalabus. Esis naumbih sanda'afa aofa sa'ipafa awagon. Afa' wanda' maol lu'unai endilisi. Ina wa' gwa'aimi wape wa'oh andeande', owa'.

⁶ Wanda' waf bu'unai ea' wahapila gawa bu'unai, opalef awanem waitu la'ififa ma nimanimi. Wanda' waf bu'unai ma enis epes. Ofa' pepel Ambal Bu'unai Godi, wanda' waf anama endilisi ma ukup maimaila enis epes wagiambamas. Ina wa'i basef malogof atom, owa'.

⁷ Wawalapa basef endilisimi wanda' maol waloma pepel Godi. Afa' waila waf bu'unai si'i wahapila amamaga wapa'ami lagof biam da'isinai iganai.

⁸ Enis epes safela agof afa'imi ea' enis sandaha basefafa. Enis sa'i basef awami sa'i sase'afa alafugah ea' enis sa'ipasa basef enis epesa waf bu'unai afa' wanda'anai. Esis ukup ma'i sa'i afa' epes wambaso'ami ea' esis etis epes sambaso'ami. Afa' wa'i endilisi.

⁹ Wanda'am na'ama, ina enin epen negawa afa', ea' hiesi sogwafa. Afa' si'i epes waga'i, ea' owa'etin. Afa' ata' wape namofa. God ata' nahafa bolam nanindinafa, wandanifel ea' anan ina nahafa afufa, owa'.

¹⁰ Afa' opalef nimanim endilisi, ea' la'ela'ef wandanifel. Wape si'i isima amamaga a'asi kwahusi ea' wase'asa amamaga afa'imi ma epes hiesi. Afa' amamaga a'afa si'i isima kwahusi, ea' waf bu'unai Godi nihi'ambafa wape si'i amamaga hiamifai.

¹¹ Ipe' Korin alupipei, ae' a'i basef hiami bu'wami mape okom ae'anai awalapama ipe' alihim hi'alam, ae' okom nainailipa endilisi si'i alupisi ae'asi.

¹² Ae' ina opaf aona ma ipe' esambalipa, owa'. Ae' okom nainailipa endilisi. Ea' ipe' opalef aoma afa. Ea' ina mape opalef etifim endilisi, owa'.

¹³ Dei' ae' ahalomepa, ipe' si'i awasi ae'ipei. Ipe' ukup mimili si'i ae' okom nainailipa endilisi.

Ape' si'i ipat Godi lu'unai sanda' lotuwanai

¹⁴ Epes isima owa' sombale'efa Godi, ipe' ina pelomas pepe pefe' etifigin atogon, owa', hapaisi. Dei' main, waf anama bu'unai ina nape etifigin naloma waf anama sosambala basef Godi, owa'. Dei' maina owambi alip mandakolas etifigin? Owa'etin.

¹⁵ Pa'i Krais naloma Satan mape mefa' ukup etifim? Owa'etin. Dei' epes isima sembale'efa Godi saloma epes isima owa' sombale'efa Godi sofa' nomonas etifim, anona nemaf esis sonda' maina waf? Owa'etin. Ina sanda' anona waf bu'unai, owa'.

¹⁶ Dei' a'ipipa basef amama afela ukup ipe'imi. Ea' ina andeande'ma mokolasa ipat lu'unai Godi noloma amamaga baso'maimi sanda'am sanda' lotumami, owa'. Ipe' pegawa ape' atepa si'i ipat anama God napainai nomon. Si'i fowa' Anan na'iam na'i, “Owagama ae' epe elomas efe' la'afena esis ea' epe God asasiwei ea' esis wapoti' sepe epes ae'asi.”

¹⁷ Ea' Dembinai na'iam wapoti' na'i, “Ipe' pekwaha esis pefe' pepe anagon. Ea' ipe' ina pihapila amamaga alugumi awami, owa'. Ama atuwasi ese'epa opaf ae'anai efa'epa petanimani.

¹⁸ Ama epe Ahalomepa ipe'iwei ipe' pepe awasi amam nematawa ae'ipei. Dembiwei ofagewema pepel hianai a'iam na'ama.”