2 Korin 5 - Basef Buꞌwami Godi

Amam aposel mombale'efa God mofa' pepel Ananinai

¹ Dei' afa' ogawa na'ama. Nemaf anama ipat anama sowalo' selanai sanda'ana etap anae' nondatal aona, ea' hapainai. Afa' anona ipat God na'i nose'afanai dambainai. Ipat anama epes ina sanda'ana sala'ana lagof asasimi, owa'. Anama napani heven ea' notawa la'ela'ef hihif.

² Dei' afa' wape alop afa'inai si'i ipat notawa etap anae', ea' opalef nimanim wape. Afa' ukup ma'ima'i endilisi ma ipat anama afa'inai nape heveni ma anona nemaf nose'ala alop afa'inai si'i luwaguf.

³ I'i afa' ola luwaguf amama, alop afa'inai ina anona nemaf nope wafina, owa'.

⁴ Nimeguf hiami afa' ata' wape etap anae' wape la'ela'ef hihifa ipat anama sowalo' selanai ea' opalef nimanim alop atona wafina wape. Afa' ina wandaiwa'ma okwaha alop dei'inai, owa'. Afa' wa'i undausa alop dambainai si'i luwaguf ama alop anama na'i naga'i anona nemaf nondamboma notaga ambal namunai endilisi.

⁵ God atona nandondombafa ma ofa' alop anama dambainai ea' nase'afa Ambal Bu'unai Ananinai. Ambal anama nali'ma amamaga amama hiami nanda'ami ma na'i anona nemaf nose'afam afa' ea' ogawa endilisi anona nemaf nose'afam.

⁶ Ea' dei' amamaga amama la'ela'ef manda' opalef afa'imi motaga la'ifim. Afa' ogawa alop afa'inai ata' si'i ifagw afa' wapeimi. Ama nogota anae' wape alop anae', ina dei' wape waloma Dembinai ma wambel ananinai, ata' owa'.

⁷ Dei' ata' ombale'efana wafe'. Afa' ina dei' watolona, ata' owa'.

⁸ Ea' afa'ogawa opalef afa'imi mape la'ifim, ukup mohafel endilisi ma okwaha alop dei'inai ofe' ope oloma Dembinai wambel afa'inai.

⁹ I'i ope olomana ilif o ope etap anae', hapaimi. Afa' la'ela'ef ukup mali' mahafel la'ififa wila okom Dembinai atona.

¹⁰ Ape' mogawa endilisi anona nemaf ape' hiapai motaga ma kot anama Kraisi. I'i ape' monda' waf bu'unai o waf aonai nogota anama ata' mape alop ape'inai. Owagama ape' hiapai atona etin mofa' amamaga amama bu'wami o awami mogwama waf anama ape' manda'anai.

Amam aposel manda' maol magiambama esisa sotaga opalef etifim soloma God

¹¹ Afa' umbamahafa ma Dembinai. Amama atom dei' wanda' maola wafela nomonas epesi ma sembale'efana. Naep Godi afa' wape alihifa ea'. Ae' okom na'i na'ama a'i waf afa'inai nandawalap alihina basef mape opalef ipe'imi nomon ma'iami.

¹² Basef amama afa' ina wa'i ofela agof afa'imi atoma ipe' pi'i afa' amam bu'ufai, owa'. Wa'i onda' eafa ipe' pendanifela afa' ma naep enis epesi. Wanda'am na'ama ma ipe' la'ifipa ma pegwamasa basef epes isima sandagala ma enis epes etina alop atona owa' sendanifela waf bu'unai asasinai.

¹³ I'i endilisi afa' ope si'i ukup mahaga magaoli, hapaifai. Afa' wanda'am na'ama ma ofela agel Godi. I'i endilisi afa' ukup mopomas andeande', afa' wanda'am na'ama ma wagiambamepa.

¹⁴ Okom Kraisi nainailapai nafelafa ma maol amama. Dei' main, afa' ukup ma'i mogawa endilisi na'ama. I'i aman atotona noho'ofa ape' hiapai ma naga', amama si'i ape' hiapai maga' ea'.

¹⁵ Ea' anan naho'ofa ape' hiapai naga' ma ape' epes mope namepa ma ina ukup motamea ma ape' atepa, owa'. Ape' ukup ma'i aman anama naho'ofapa naga' ma notanima nohafel wapoti', ukup ma'i maol ananinai la'ela'ef.

¹⁶ Amama atom dei' afa' ina ata' waila opaf apinai wawaloga waf enin epeni, owa'. Endilisi, fowa' waila wafa opaf apinai wawaloga Krais na'ama. Ea' dei' owa'.

¹⁷ Emi egafis sope soloma Kraisi, God nanda' esis sataga dambais endilisi. Dei' peme' andeande'. Waf anama apinai asasinai hi'alana. Dei' saila waf dambainai.

¹⁸ God atona ofagonama waf anama epes sataga dambais. Fowa' ape' ata' mape naumbih malomana, ea' Krais nataga nanda'apa mape opalef etifim maloma God. Ea' God nase'afa maol anama ma wigiambama anona onda' esis naumbih ananisi sotaga opalef etifim solomana.

¹⁹ Basef afa'imi na'ama. Krais atona God nanda' maol nanda' epes hiesi sakwaha waf naumbihinai sataga opalef etifim salomana. Anan ina ata' okom na'i waf aonai esis sanda'anai, owa'. Ea' nase'afa maol anama ma owalapa basef ananimi ma nonda' esis naumbih sotaga opalef etifim solomana.

²⁰ Ea' afa' dei' ofa' malogel Kraisi wawalapa basef ananimi. Amama na'ama etin. God atona nofala epes hiesi ma basef la'ifimi malogof afa'imi. Ea' waho'ofa Krais wa'ipas na'ama wa'i, “Ipe' pekwaha waf naumbihinai ma petaga opalef etifim peloma God.”

²¹ Aman anama ina nanda' waf aonai ea' God nakolasa awami ape'imi hiami mafe'ma anan atona ea' ofagema ape'imi mapoma anan atona nofa'am. Anan nanda'am na'ama ma ape' mape la'ifipa maloma Jisas Krais mefa' waf ananinai bu'unai.