2 Korin 4 - Basef Buꞌwami Godi

Amam aposel si'i maloh sanda' etap sanda'ami

¹ God na'i afa' uwahipifa dei' nase'afa maol anama. Ea' dei' afa' ina otanima ma maol anama, owa'.

² Afa' owa' alafugah ma waf ambagof awami sandambaho' sanda'ami. Ina ata' wape wafe' waf anama baso'mainai oho'ofa waf ombaso'masa basef Godi wa'iam, owa'. Afa' wawalapa basef endilisimi alihima naep Godi ma epes hiesi seme'am sogawa basef mape opalef asasimi nomon ma'iami.

³ I'i basef amama bu'wami Godi wawalapami mondambaho', mandambaho'ma epes isima safe' eaf hegilalasanai.

⁴ God baso'omunai ma etap anae' nasopama opalefa epes isima owa' sembale'efa Godi. Ama basef amama bu'wami ofagema ma nafifili Kraisi ina muwis nomona opalef asasimi, owa'. Esis ina sati Krais nandati na'a si'i God, owa'.

⁵ Dei' main, afa' ina wawalapa basefa afa' ofela agof afa'imi lu'um, owa'. Afa' wawalapama Krais Jisas atona anan Dembinai. Afa' waila waf Jisasi dei' agof a'afa wape owina ipe' wanda' maol wagiambamepa.

⁶ Fowa' gani God nati owamb atona na'i, “Lala notaga.” Dei' na'ama etin nanda' nafifili ananinai nataga ma afa' nanda' opalef afa'imi mafifil endilisi. Nafifili anama nihi'ambapa gawa ma nafifili pepel Godi nape la'ela'ef. Ape' mati anama ma waf Jisas Kraisi nafifili nataga amaga ananinai.

⁷ Ea' amamaga amama bu'wami nafifili naloma pepel Godi, anama nape opalef afa'imi nomon, afa' si'i maloh sanda' etap sanda'ami. Ama mihi'amba epes hiesi sogawa pepel anama Godi atona. Afa' owa'.

⁸ Fe' pe waf afa'inai fowa' dei' wapoti' nape na'ama. Anama hiagoma wafe'ma la'ela'ef nimanimi matagamafa, ea' amam ina mahambombagafa endilisi, owa'. Amamaga hiami masopama ukup afa'imi, ea' ukup afa'imi ina higilalam hi'alam, owa'.

⁹ Enis epes sahafa sanda'afa aofa, ea' God ina nakwahofa, owa'. Esis sahafa hihif owa wa'oh etap, owa'etin. Ina afufa endilisi, owa'.

¹⁰ La'ela'ef afa' ofa' nimanimi ma ga' Jisasi alop afa'inai wafe'. Wanda'am na'ama ma ambal namunai nape Jisasi wapoti' notaga alihina alop afa'inai.

¹¹ Dei' main, afa' wanda' maol Jisasi. Amama atom dei' nimeguf hiami la'ela'ef enis epes sa'i sohafa ofa' nimanimi oga'. Sanda'afa na'ama ma ambal namunai nape Jisasi notaga nondawalap alop afa'inai.

¹² Ea' dei' epes isima sa'i sohafa oga' ma ipe' pembale'efanai pefa' ambal namunai pepe andeande'.

¹³ Baibel na'i, “Ae' embale'efa God. Amama atom dei' awalapa basef alihim a'iam.” Afa' wambale'efa God na'ama etin si'i Baibel na'i dei' wawalapa basef wa'iam.

¹⁴ Dei' main, afa' ogawa God nafela Dembinai Jisas nohafel hi'agif, anan nofela ape' wapoti' moloma Jisas ea' nofa' afa' oloma ipe' nokolasepa atogon mofe' mope felefele' molomana.

¹⁵ Amamaga amama nimanimi hiami matagamafa ma wigiambamapa. Afa' wafe' wa'ipasa basef God nigiambamas na'a mefe' motaga la'ela'ef mefe'agon hi'ilagon. Ea' esis sonda' beten sinifela God sefela agel ananinai lu'una.

¹⁶ Afa' ukup mapoma amama dei' ina otanima ma maol Godi, owa'. Endilisi, pepela alop afa'inai la'ela'ef na'i nowafa hi'ilana. Ea' opalef afa'imi mataga dambaim wapoti' nimeguf hiami hihif.

¹⁷ Nimanimi amama matagamafai amama sa'osa'om endilisi ea' mape nogota bandana. Nimanimi amama anona nemaf mowalapai nafifili bu'unai endilisi gani heven la'ela'ef hihif. Pe anama bu'unai anona nemaf nikila' endilisi nimanimi amama so'umi dei'imi.

¹⁸ Dei' main, afa' ina wati la'ifipa amamaga satolom naepi, owa'. Amamaga owa' seatolom naepi, watolom la'ififa. Dei' main, amamaga satolom naepi, amama anona nemaf mope nogota bandana. Ea' amamaga amama owa' seatolom naepi, amama mape la'ela'ef hihif.