2 Korin 3 - Basef Buꞌwami Godi

Amam manda' maola basef dambaimi God na'i endilisimi atom

¹ Basef amama do'okimi ipe' pa'i afa' wafela agof afa'imi atom lu'una wapoti' si'i anom amam mambaso'mepa manda'am? O pa'i afa' owa' la'ififa wanda'am si'i amama ose'epa anom basef mail pasi enis epes sanda'ami ma sefela agof afa'imi? O ipe' wapoti' nambimb penda' anom basef mil pasa pigiambamafa? Owa'etin.

² Basef mail pasi sefela agof afa'imi si'i ipe' etipa. Basef amama mail la'ifim nomon ukup afa'imi. Ama epes hiesi sotalifam sogawam.

³ Ipe' pandawalap alihipa, pas amama ea' ipe' etipa. Krais atona nanda' basef maila pas amama. Anan nandandepafa nase'afa pas amama wafo'o wasi'ipami. Anan ina nanda' ing nufandiam, owa'. Anan nufandiama Ambal Bu'unai God nape namunai. Anan ina nufandiam mail anona owap wa'anai si'i buk, owa'. Nufandiam mail ukup ipe'imi nomon.

⁴ Basef amama ofagema na'ama. Krais nagiambamafa endilisi ea' ombele'ef la'ififa ma God wape na'ama.

⁵ Endilisi afa' atofa ina la'ififa ma onda' maol anama, owa'. God atona nanda'afa la'ififa ma wanda' maol anama ananinai.

⁶ Ea' anan atona nanda'afa la'ififa ma wanda' maola eaf basef dambaimi God na'i endilisimi atom. Basefa mi'uli anama ina sanda'am mail pas atom, owa'. Amama Ambal Bu'unai Ananinai nawalapami. Basef sanda'am mail pas atom maha epes saga', ea' Ambal Bu'unai Ananinai nanda'as sofa' ambal namunai sope namis.

⁷ God nanda' basef amama fowa'imi ma mi'uli Ananinai mail otam wa'anai si'i buk. Maol Godi amam manda'ami, amama matagama ga' naloma nafifili ananinai bu'unai wapoti'. Nali' damba damba nafifili anama nanda' amaga Mosesi nafifil endilisi. Ea' nagi' nataga so'uso'una. Anama la'ifinai endilisi ma esis Israel ina la'ifisa siti amaga ananinai, owa'.

⁸ Ea' nafifiil ma maol Godi Ambal Bu'unai Ananinai nanda'anai lu'una endilisi nikila' anama fowa'inai.

⁹ Maol fowa'inai nawaloga epes hegilolas, anama nawalapai nafifili Godi. Ea' maol anama dei'inai nanda' epes sataga bo'wes ea' God na'i esis bo'wes andeande'. Maol anama dei' nawalapai nafifili ananinai lu'una endilisi nikila' anama nali'i.

¹⁰ Endilisi, nafifili fowa'inai ina nafe' na'ama etin si'i dei'inai, owa'. Fowa'inai falafunai atona ea' dei'inai lu'unai nikila' endilisi.

¹¹ Maol anama dei' na'i hegililonai, anama fowa' nataga naloma nafifili Godi. Ea' nafifili dei'inai ma maol anama nape la'ela'ef lu'una endilisi nikila' anama nali'i.

¹² Afa' wanda' maol Godi ogawa basef amama dambaimi God na'iam endilisimi atom ea' wape ohafa nahafifili anama anona nemaf notagamafa. Ea' afa' ina umbamahafa, owa'. Afa' la'ififa endilisi.

¹³ Afa' ina wape si'i Moses, owa'. Anan nawala lowaf amaga ananinai nambaho'ana ma esis Israel ina siti nafifili anama nefe' so'uso'umbela hi'ilana, owa'.

¹⁴ Ea' ukup asasimi mase'as endilisi. Dei' main, esis la'ela'ef satalifa basef mail Baibeli fowa' God na'i endilisimi atom. Nemaf mamana satalifa basef amama, lowaf anama wa'anai nape amaga Mosesi ata' nape la'ela'ef nasopama ukup asasimi nafi'i nafi'i nataga dei'. Ina nandatagah, owa'. Ama Krais atona, God nahape' lowaf anama.

¹⁵ Fowa' satalifa basef Moses nanda'ami safi'i sataga dei', lowaf anama ata' nase'ala opalef asasimi la'ela'ef.

¹⁶ Ea' emi egafis somboma opalef sefe'ma Dembinai, dei' lowaf anama nendatagah.

¹⁷ Dembinai anama anan Ambal Bu'unai Godi. I'i Ambal Dembinai nope enin epen, ina ata' anom amamaga mili'akwa enin, owa'. Enin nape wafifin.

¹⁸ Ea' ape' hiapai dei' mape amagah wafimi, nafifili bu'unai Dembinai nafifima ape', ape' mififima enis epes. Ape' mape na'ama dei' Ambal Bu'unai Godi naho'ofa waf ape'inai ea' mandati si'i Dembinai ma nafifili anama nataga lu'una la'ela'ef nafe' etin nape. Amama mataga Dembinai atona, anan Ambal Bu'unai Godi.