2 Korin 2 - Basef Buꞌwami Godi

¹ Okom ae'anai a'iam endilisi na'ama a'i, ae' ina ata' etanima efe'mago ipe' wapoti' enda' opalef ipe'imi nimanim, owa'.

² I'i enda' opalef ipe'imi nimanim, emi egafis sonda'e endanifel? Owa'etin. Ipe' etipa, ea' anda' ukup ipe'imi aom.

³ I'i ipe' pendanifel, andeande'. Waf anama bu'unai. Ea' i'i ae' efo'o ma penda' opaf ae'anai nimanina, na'ama andaiwa'. Ea' amama atom fowa' ali' anda' basef amama mafe'mago ipe'. Dei' main, ae' egawa ipe' endilisi na'ama. I'i ae' endanifel epe, ipe' hipei wapoti' pendanifel.

⁴ Endilisi anda'mepago basef amama ma nemaf anama opaf ae'anai ame' nimanimi lu'wami ea' alef hihif. Ae' ina anda' basef amama ma mese'epa opalef nimanim, owa'. Anda'ama ipe' pegawa ae' okom nainailipa endilisi.

Esis sokwaha waf aonai anona owalomas nanda'masanai

⁵ I'i enin epen ofagena nenda' opaf nimaninai netaga, enin ina nanda' opaf ae'anai atona nimanina, owa'. Enin nanda' ipe' hipei opalef nimanim wapoti'. Ae' a'i basefa ipe' hipei ea' enipa owa'. Ina a'ipipa. Andaiwa' ma i'i basef la'ifimi endilisi ma waf aonai anan nanda'anai, owa'. Amama atom dei' a'iam na'ama ma enipa owa'.

⁶ Nimanimi ipe' epes hipei pese'anami ea' mandahama anan.

⁷ Ea' dei' penda' anona wafa anan. Andeande'ma pekwaha waf aonai ananinai pigiambamana notaga la'ifina penda' opaf ananinai awanena. Na'ama nimanimi lu'wami endilisi monda' okom ananinai aona ea' nokwaha Dembinai.

⁸ Amama atom dei' a'ipipa basef la'ifimi pihi'amba anan ipe' ukup maimailana.

⁹ Fowa' anda' basef amama mail okwatip a'ipipago ma egawa waf ipe'inai. Anda'am na'ama a'i egawa ipe' paila basef ae'ami la'ila'ef o owa'?

¹⁰ I'i ipe' pekwaha waf aonai enin epen nanda'anai, endilisi ae' wapoti' ekwahomanana. Waf anama aonai akwahanai okom ae'anai na'i na'ama. Ae' ina egawa okom Kraisi na'i na'imama, ea' i'i andeande'ma ae' ekwahomanana naep Kraisi, ekwahomanana endilisi ma igiambamepa pepe andeande'.

¹¹ Ae' anda'am na'ama ma Satan ina anona nemaf nombaso'mapa nikila'apa, owa'. Dei' main, afa' ogawa okom ananinai nambaso'ami.

Pol opaf nimanina wambel anama Troas

¹² Fowa' Dembinai nanda' eaf nafe' ae' afe' ataga wambel Troasa awalapa basef bu'wami Kraisi.

¹³ Ea' opaf ae'anai ina nape awanena, owa'. Dei' main, ae' ina ata' ati owalome ae'anai Taitus, owa'. Ea' akwaha esis Troas afi'i ataga anona etap hiagoma Masedonia.

Pepel Godi atona amam aposel mali'amona wandafa waf aonai

¹⁴ Ea' dei' afa' wanifela God. Anan la'ela'ef nagiambamafa wape la'ififa waloma Krais ea' wali'amona wandafa waf aonai. Ama maol afa'inai God nawalapa basef ea' enis epes sogawa basef Kraisi. Gawa anama anan si'i alogw bu'wami ma mafe'agon hiagoma.

¹⁵ Endilisi afa' si'i alogw bu'wami ma mataga Krais mafe'ma God. Alogw amama mafe' la'afena epes isima dei' God nakwahomas waf aonai nofa'as sotanimani, isima sape eaf nafe' heveni saloma isima sape eaf higililasanai wapoti'.

¹⁶ Ama wambota anama epes sape eaf higililasanai, alogw amama hi'apimi si'i saga'i. Ea' wambota anama sape eaf nafe' heveni, alogw amama bu'wami mase'as ambal namunai. Ea' dei' afa' ukup ma'i maol anama Godi wa'i ina enis epes la'ifisa onda'ana, owa'. Ea' afa' la'ififa wanda'ana.

¹⁷ Dei' main, afa' ina si'i enis epes hiesi safe'agon hi'alagona sanda' maola basef Godi ma sofa' amamaga asasimi atom, owa'. Afa' wanda' maol anama Godi na'ama. Afa' ina wambaso'am etina maol Godi, owa'. Afa' wanda'am waila eaf bu'unai atona hi'alana, wape la'ififa waloma Krais. God nasapa'afa wafi'i wawalapa basef mafe' andeande'ma naep ananimi.