2 Korin 13 - Basef Buꞌwami Godi

Esis Korin sundumafuma ma bale'ef asasinai andeande'

¹ Nambimb ae' efe'mago ipe' ma wenif. “I'i enis epes sombaso'ma enin epena anom basef, ama i'i enis epes bias o wenis si'i basef etifima waf anama, basef amama endilisimi atom.”

² Fowa' ae' ali' afo'o bif ape alomepa, ae' a'ipa enipa mehip a'iam na'ama a'i, “Ipe' pindumafuma andeande'.” Dei' ape laogon a'ipipago wapoti' na'ama a'i nemaf anama ae' efo'o wapoti', ina iti enis soloma ipe' pali' panda' waf aonai i'i bu'upei, owa'. Ewalogepa ili'amonepa mehip.

³ Nemaf anama atona ae' ewalipipa, ipe' pegawa endilisi si'i Krais na'i basef mataga malogel ae'anai. Ipe' pegawa endilisi. Krais ina falafunai ma nanda' maol nalomepa, owa'. Anan la'ifinai.

⁴ Endilisi, fowa' anan ina la'ifina endilisi ma dei' saundana lawag usi'inai tu'wanainai sahana naga', owa'. Ea' pepel Godi atona nafelona dei' nape dambainai. Afa' walomana, afa' wapoti' owa' la'ififa. Ea' pepel atona Godi dei' afa' wape dambaifai walomana ea' nambimb owalapa pepel atona la'afena ipe'.

⁵ Ipe' la'ela'ef pewaloga opalef ipe'imi pewalogam andeande'. Ipe' pembale'efa God endilisi o owa'? Ipe' pewaloga ipe' etipa. Ipe' pegawa Krais Jisas nape opalef ipe'imi o owa'? I'i ata' owa', ikwaf ipe'inai ina dei' pafe' pataga dende', ata' owa'.

⁶ Ae' egawa a'i dei' ipe' pegawa ikwaf afa'inai wafe' wataga dende'.

⁷ Dei' afa' wanda' betena God nigiambamepa ma ina penda' anona waf aonai, owa'. Afa' ina wanda' betena ipe' na'ama ma otaga ondawalap alihifa ma naep epesi ma si'i ikwaf afa'inai dende', owa'. Afa' wanda'ana ma ipe' penda' waf bu'unai andeande', ea' afa' hapaifai. Afa' wandawalap alihifa ma naep epes hiesi sambaso'am sa'i ikwaf afa'inai ina nafe' nataga, owa'.

⁸ Ipe' pegawa afa' ina onda' anom amamaga ma mohagofa basef endilisimi, owa'. Afa' la'ififa ma wanda' maola wa'ipasa basef endilisimi atom.

⁹ Maina nemaf afa' wame' ina la'ififa ea' ipe' pape la'ifipa, afa' wandanifel endilisi. Ea' afa' wanda' betena God la'ela'efa nonda'epa petaga la'ifipa bo'wepa andeande'.

¹⁰ Dei' ape laogon anda'ago basef amama mafe'mepago ma main? Ae' anda'am na'ama ma nambimb efo'o epe elomepa ae' ina i'ipipa basef la'ifimi endilisi ma pepel Dembinai nasi'ianai, owa'. Pepel anama enin ina nase'eam ma nohambombaga ipe', owa'. Anama nonda bale'ef ipe'inai notaga la'ifina.

Anom basef tu'wanim

¹¹ Kristen alupipei, dei' embefa basef hi'ilam a'i nemaf bu'unai inifelipa. Ipe' penda' maol la'ifipa endilisi ma petaga bo'wepa andeande'. Ea' peme' basef ae'ami. Ipe' pefa' ukup etifim ea' pepe opalef etifim awanem. God, anan ofagonama waf ukup naloma opalef awanemi nope nolomepa.

¹² Waf ape'inai amam nematawa hiapai atona etin Godi, pese'ama lagof pelomago esis alupusi.

¹³ Amam nematawa hiesi Godi sanda'mepago nemaf bu'unai ma ipe'.

¹⁴ Ae' a'i Dembinai Jisas Krais niti uwahipipa nigiambamepago na'a ma okom Godi bu'unai nainailipa. Ea' a'i Ambal Bu'unai Ananinai nope noloma ipe' hipei ma pelomana opalef etifim pepe.