2 Korin 12 - Basef Buꞌwami Godi

Pol na'oh nandondo'oh God nihi'ambana basef hiami

¹ Ina anona eaf wapoti', owa'. Ea' ae' efela agel ae'anai atona wapoti'. Anda'am na'ama ina la'ifima migiambamapa, owa'. Ea' hapaimi, ae' enda'am. Dei' ae' a'i i'i basefa enin epen na'oh nandondo'oha basef mape mandambahi'i God nawalapameam ma ae'.

² Ae' egawa anona aman Kraisi, basef ananimi mape na'ama. Fowa' afagof 14-peleim mafe'ma ea', God nofa'ana nalata ilif heven nafe'ma wenifiguma gani ilif. Aman anama ambal atona nalata o naloma alop nalata, ina egawana. God atona nogawana.

³ Ea' ae' egawa aman anama God nofa'ana nalata ilif heven. Aman anama ambal atona nalata o alop napaina nalata ae' ina egawana. God atona nagawana.

⁴ Gani ilif heven anan name' basef hiami mamumami epes owa' la'ifisa si'iama diga, God nandaiwa' ma epes sowalapami.

⁵ Ae' a'i efela agel aman anama lu'una. Agel ae'anai owa'. Ae' i'iam i'i ae' owa' la'ifiwi, ea' amama atom efela agel ae'anai.

⁶ Endilisi, i'i ae' efela agel ae'anai atona, ae' ina si'i epen okom nololani, owa'. Dei' main, a'i endilisi etin. Owa'etin. Ae' andaiwa'. Na'ama enin epen ni'i ae' epen bu'uwei endilisi ikila' waf fe' pe ki ae'anai. Ae' a'i ipe' piti waf ae' anda'anai peme'e ma basef ae' a'iami. Ea' na'ama etin ipe' pegawa waf ae'anai andeande'.

Amamaga si'i higata nape alop Poli

⁷ Basef amama God nihi'ambeam ae' lu'um endilisi. God nandaiwa'ma efela agel ae'anai endilisi, owa'. Amama atom dei' nase'e anom amamaga si'i higata nape alop ae'anai ekep pahe. Amama anona ensel Satan nasapa'ana nafi'i ma nanda' ae' ekep pahe. Amama manda' agel ae'anai nowala.

⁸ Ae' anda' betena Dembinai wenifa anan ata' notofa amamaga manda'e ekep pahae, epan andeande'.

⁹ Ea' anan na'ipi na'ama na'i, “Ae' agiambamena na'a, waf anama la'ifinai ma ine'. Dei' main, pepel ae'anai anama nanda' maol la'ifinai endilisi ma epes owa' la'ifisi.” Ea' ae' dei' ina ata' okom aona, owa'. Ae' andanifel endilisi ma amama ma pepel Kraisi napaiwe.

¹⁰ Amama atom dei' maol anama Kraisi etin, ae' ina la'ifiwi, owa'. Esis sanda'me waf aonai ea' sanda'me nimanimi mamumami hiami, enis sahambombage. Ea' hapaimi. Ae' andanifel ma amamaga amama. Nemaf anama ae' owa' la'ifiwi, nogota anama ae' la'ifiwi endilisi.

Pol na'i nonda' esis Korin sotaga la'ifis

¹¹ Basef amama aho'ma'iami amama basef falafalafumi a'iam si'i epen okom nololani. Ea' ipe' pefela ae' dei' a'iam na'ama. I'i ipe' pefela agel ae'anai, anama waf bu'unai. Owa'etin. Endilisi, ae' epen falafuwei, ea' ina afe' owina amam amama “Aposel ipe'imi” mali'i, owa'etin.

¹² Ae' anda' okom ae'anai la'ifina ea' anda' ikwaf la'ifinai hianai la'afena ipe', awalapai ikwaf hianai aposeli. Amama na'ama. Amama la'ifimi si'i God nanda'ami mataga hiami mamumami la'afena ipe' mandahama maol Godi. Sati pepel anama, esis gegelalasis kwapete'as. La'ifimi amama mihi'ambepa ae' aposel endilisiwei.

¹³ Ipe' ina pape owina enis Kristen sios sape ganigani, owa'. Ipe' palomas pape dende' etina waf hianai ae' anda'mepanai. Ea' anona waf aonai anda'mepana ipe' etipei ma esis owa', anama na'ama. Ae' ina a'ipipama anom amamaga ipe'imi, owa'. Dei' ae' ati uwahipipa, ipe' pekwahome waf aonai anama anda'mepanai.

¹⁴ Dei' andandombam efe'mago ipe' ma wenif, ea' ae' ina nambimb efa' amamaga ipe'imi, owa'. Dei' main, ae' andaiwa'ma efa' amamaga ipe'imi, owa'. A'i efa'ai ipe' etipa. Ipe' pegawa, ipe' si'i awasi ae'ipei. Ina andeande'ma esis awasi sogolopa amamaga sigiambama mamasas asasisi, owa'. Esis mamasas etis, sanda' maol sagolopama amamaga sagiambama awasi.

¹⁵ Ae' okom na'iam endilisi ma ekwaha amamaga hiami ae'ami ea' elelama ambal ae'anai ekwahona igiambamepa. Ae' okom na'i na'ama. Waf ae' okom nanailipanai nataga nape lu'una endilisi la'ela'ef nikila' fowa'. Ea' waf ipe' ukup maimilianai nowala sa'osa'ona endilisi la'ela'ef nape.

¹⁶ Ea' ipe' pegawa fowa' ae' ina ase'epa nimanimi ipe', owa'. Ea' enis sa'i na'ama sa'i, “Endilisi anan ina nofa' amamaga ape'imi alihim, ea' anan aman nakikipapa ma waf baso'mainai ea' nefa'apa mailana.”

¹⁷ Endilisi fowa' asapa' anom amam mafe'mago ipe'. Dei' si'i main? Ae' ina ambaso'mepa efa' anom amamaga ma lagof ipe'imi. Owa'.

¹⁸ Ae' afela Taitus a'ipana nafe'mago ipe'. Ea' asapa' owalomapa anama nafo'o nalomanago. Taitus ina nambaso'am nefa' amamaga ipe'imi, owa'. Afa' dei' waila waf bu'unai ukup etifim. Ipe' pegawa afa' waila eaf atotona wafe'.

¹⁹ Ipe' ina pi'i afa' wanda' basef amama hiami wali' wa'iami wa'ipipa waf afa'inai ina aona, ea' wanda' waf bu'unai atona, owa'. Afa' wape epes Kraisi wanda' basef amama ma naep Godi. Alupipei endilisi ae'ipei, afa' wanda' basef amama hi'alama monda' ipe' pembale'efa God petaga la'ifipa.

²⁰ Ae' umbamahe a'iam na'ama a'i nabimb efo'o etaga ma itilipa ina pepe bo'wepa si'i okom ae'anai na'i efo'o iti ipe' pepe bowepa, owa'. Ea' ipe' wapoti' nambimb piti ae' ina epe bo'awe si'i pa'i piti ae' epe, owa'. Na'ama waf naninani hianai nope. Basef lopa' fitapaimi, waf kowalepa ma anom amamaga, migimigah, findiwa, daha basef, sasambala basef, basef manda'as sanda hape'ma sape deindei'. Ea' ipe' ina peme' andeande'ma pila ukup etifima waf sanda' lotuwanai, owa'. Paila ukup deindei'. Ae' umbamahema amama.

²¹ Nemaf anama ae' efe'mago ipe', God ae'anai nambimb nonda' agel ae'anai nowala ma naep ipe'imi ma alopa ipe' amam nematawa hipei fowa' panda' waf aonai owa' pemboma opalef pefe'ma Gode. Ma ipe' owa' pewa' alafugaha waf aonai so'a waolanai ma opalef awami maloma amamaga awami fowa' pali' panda'ami. Ae' umbamahema amama.