2 Korin 10 - Basef Buꞌwami Godi

Pol nahagofa basef awami sanda'manami

¹ Ae' Pol ahali'ipa nimanis aila waf Kraisi so'umbilinai si'i anan nanda' okom ananinai nefe' owina epes hiesi. Dei' anifelipa ma anom amamaga etifim. Enis epes sambaso'me sa'ipi na'ama sa'i, “Anan ata' nape naloma ape' nanda' anan nafe' sa'osa'ona nafe' owin, ea' nogota anama nafe' napani laogon nanda' basef la'ifimi ma ape'.”

² Ae' ihali'ipa na'ama. Anona nemaf ae' etagamepa, ipe' pindumafuma andeande'. Na'ama pehafa ae' i'ipipa basef la'ifimi si'i ae' okom na'i ewalapama enipa. Ae' ewalapama ipe' pa'i afa' wafe' waila waf aonai etapanai.

³ Endilisi, afa' wape wafe' etap anae', ea' ina wape wanda' wandaf si'i epes etapasi sapa', owa'.

⁴ Amamaga hiami sapa'ami afa' wahapilami amam ina etapami, owa'. Amama pepel Godi, la'ifinai ma notala endalelemb pepel naumbih Seteni.

⁵ Afa' wahagofa nomonas epes isima owa' endilisisi. Ea' waf hianai nasopama eafa epes sa'i sogawa Godi, anama afa' wahagofana wasopamana wapoti'. Ea' afa' wali'amona nomonas hiami ape' epesi ma onda'am bo'om mila okom Kraisi.

⁶ Afa' wandandombol wape ohafa ipe'. Ama i'i ipe' pila basef hiami afa'imi, afa' nambimb ogwamasa nimanimi awami emi egafis sosambala basef Godi.

⁷ Ipe' pati amamaga mape naep ipe'imi atom ande' atogon, nomon owa'. Dei' piti amamaga ofagema. I'i emi egafis sope la'ifis si'i esis epes Kraisi, esis sogawa afa' wapoti' wape epes Kraisi.

⁸ Dembinai nase'afa agof lu'wami afa' ma onda' maol anama ananinai, amama monda' bale'ef ipe'inai notaga la'ifina. Amama ina mohambombagepa, owa'. Ama ae' i'i efela agof afa'imi atoma maol anama Dembinai, nambimb ae' ina ambal aona ma amama, owa'.

⁹ Ae' andaiwa' endilisi ma ipe' pi'i ae' aumbelipa etina anom pasa basef amama ae'ami, owa'.

¹⁰ Dei' main, enis epes sa'i, “Pasa basef ananimi nimanim endilisi ea' la'ifim endilisi. Ea' anan nafi'i natagamapa ma matolona naep ape'imi, ina la'ifina ea' basef ananimi falafumi atom.”

¹¹ Epes sa'i basef na'ama, ata' ukup mi'i andeande' sogawa na'ama. Afa' wape laogon ea' wanda' basefa pas atoma ipe'. I'i afa' ope olomepa, onda' waf anama atona basef amama atom si'i wanda'am mail pas.

¹² Afa' ukup hiahiam dei' wandaiwa' ma wi'i afa' wandati na'ama etin si'i epes safela agof asasimi atom lu'wami, owa'. Epes isima sawaloga waf asasinai ma ikwaf ukup asasimi atom. Ea' sawalogam na'ama. Esis isima owa' sogawai, ukup mololasi.

¹³ Ea' afa' wandaiwa'ma usila' ikwaf afa'inai ma ofela agof afa'imi ilif endilisi, owa'. Afa' wa'ila ikwaf God nawalogafa nase'afa maol ananinai. Afa' waila amama ea' wafe' wataga ma ipe' wanda' maol anama. Ea' wafela agof afa'imi ma maol anama atona.

¹⁴ Afa' wame' basefa God wailam wafo'o watagama ipe' dende' ma alol anan nandandepamafagoma. Ea' afa' ina umbisila' alola maol anama ma wawalipipa basef ananimi, owa'. I'i afa' owa' ome' basef Ananimi na'ipipami ugi'mam, afa' umbisila' alol. Owa'etin. Afa' wafo'o ofa'ago basef bu'wami atom Kraisi watagamepa.

¹⁵ Ea' afa' ina umbisila' alola ofela agof afa'imi atoma anona maol enis epes sanda'anai, owa'. Afa' ukup matamea la'ifim na'ama. Maol anama afa' wanda'anai, ipe' nambimb pembale'efa Krais la'ifipa pikila' fowa' pali' pambale'efana. Ea' maol anama nataga lu'una la'afena ipe' nikila' fowa'inai. Afa' wa'i onda'ana la'ela'ef nendahama ikwaf God nase'afanai.

¹⁶ Wa'iam na'ama ma afa' ata' ofa' basef bu'wami Godi ofo'o laogon anona etap nape alafugaha ipe' ganima wa'ol. Ama afa' ina umbisila' ofe'ma maol anama amani ofela agof afa'imi anona maol aman anama nanda'ana ea', owa'.

¹⁷ “Epen nindanifel, enin nendanifel ma Dembinai atona.”

¹⁸ Dei' main, ape' mogawa emi egafis sefela agof asasimi atom, esis agof a'asa naep Dembinai, owa'. I'i Dembinai nefela agof anis epesi, dei' epes isima etis sofa' agof endilisi.