2 Jon 1 - Basef Buꞌwami Godi

¹ Ae' agiliwei imafi esis Kristen anda' basef mafe'mago ine', nemata'w God nandandepa'wi kwaloma awasi akwa'usi. Ae' okom nainaila ipe' endilisi. Ina ae' atowe okom nainailipa, owa'. Amam nematawa hiesi sogawa basef endilisimi, esis wapoti' ukup maimailipa.

² Dei' main, basef endilisimi mape ukup ape'imi amama anona nemaf mope la'ifipa ape' la'ela'ef.

³ Ae' a'i Ahalomapa God noloma Jisas Krais Nogalomana Ananinai miti uwahipipa migiambamapa na'a monda'apa la'ifipa ea' monda' opalef ape'imi awanem. Amam biam monda'apa na'ama moloma waf endilisinai noloma waf ukup maimaila sahin owananai.

Ape' ukup mimila sahin owan ape'isi

⁴ Ae' andanifel endilisi ma egawa enis awasi ine'isi saila basef bu'wami endilisimi si'i Ahalomapa na'ipapa basef la'ifimima milam.

⁵ Ea' dei' a'ipa ine' nemata'w na'ama. Ape' hiapai ukup mimila sahin owan ape'isi. Ae' ina a'ipina anom basef la'ifimi dambaimi, owa'. A'ipina basef amama atom fowa' gani ape' mogawam mombale'efam.

⁶ Basef ofagema ma ape' ukup maimaila sahin owani amama. Ape' mope mila basef amama Godi la'ifimi la'ela'ef. Basef amama si'i fowa' dambadamba pame'am. Ipe' ukup mimila sahin owan ipe'isi.

Basef Kraisi ipe' pilam la'ifipa

⁷ Enis epes sambaso'mami safe' ganigani etap hiagoma. Esis ina sawalipasa Jisas Krais sa'i anan nogalomana Godi nataga epen endilisinai, owa'. Esis sambaso'mami, isima naumbih Kraisi.

⁸ Ipe' pindumafuma andeande'ma pefa' amamaga bu'wami amama panda' maol pa'i pefa'ami. Na'ama ipe' anona nemaf ina pefa' amama, owa'. Andeande'ma pefa'am hiami hi'ilam.

⁹ Emi egafis sakwaha basef Kraisi ma simbisila' sefe' sila anom basef, God ina nape opaf epes isima, owa'. Emi egafis sembale'efa basef Kraisi la'ifis la'ela'ef, dei' Ahalomana naloma Nogalomana wapoti' mape la'ifim maloma epes isima nomon ukup asasimi.

¹⁰ Emi egafis sifi'mai ipe' ma ina sefa'ai basef amama Kraisi, ipe' ina pigiambama epes isima pi'ipas sofe' solomepa siwis ifagw ipe'imi, owa'. Ina pinifalis pi'ipas penda'mas, “Nemaf bu'unai” esis, hapaisi.

¹¹ Emi egafis sinifala epes isima anona nemaf solomas okom atotom sigiambamas sonda' waf aonai esis sanda'anai.

Basef amama tu'wanim akutaimi

¹² Ae' a'i i'ipipa anom basef hiami wapoti', ea' ae' ina enda'am mil okwatip, andaiwa'. A'i efo'o itilipa i'i elomepa ma ape' mondatima mondanifel andeande'.

¹³ God nandandepa owamena ine'ikwi nosahe'akw anani'wi ato'w. Ea' awasi owaminai sanda'menago nemaf bu'unai ma ine'. Ea' ma'um.