1 Timoti 6 - Basef Buꞌwami Godi

Basefa epes agof a'asi sanda' opeh na'a

¹ Ipe' Kristen agof a'epa panda' opeh na'a pape owina enis epes, ipe' ata' ukup mopoma na'ama. Dembemi mumafi ipe'i, ipe' pinifelom pi'i bu'wami pefela agof amamumi peme' basef amamumi. Ama enis epes ina nambimb si'i basef awami ma agel Godi ma waf ipe' Kristen panda'anai, owa'.

² Ipe' agof a'epa panda' opeh na'a ma amam agufumi dembemi anom Kristen, ipe' ina ukup mope na'ama pi'i, “Anom Kristen sahopafa atom ea' hapaimi, osambala basef amamumi.” Owa'. Ipe' ukup mope na'ama pi'i, “Amom Kristen ea' afa' ukup mimilam, onda' maol amamunai andeande', ukila' maol wanda'ama amam agufumi owa' Kristeni.” Dei' main, ipe' agof a'epa pagiambama amam Kristen ipe' ukup maimailami. Timoti, basef amama ine' niwalipasam nefela ukup asasimi nenda'as sotaga la'ifis. La'ela'ef ine' niwalipa esis amam nematawa ma sonda' waf bu'unai, ea' nefelasa sonda'am.

Waf endilisinai ma sefa' amamaga hiami

^3-4 Basef dembinai Jisas Kraisi mawalipapa andeande'ma waf Godi. I'i anona aman nokwaha basef amama ma nowalipa esisa anom basef owa' mefe' dende'ma basef amama bu'wami Jisasi, ape' mogawa aman anama na'i nosambala basef Godi. Anan ina nogowa andeande', owa'. Anan nomonas a'anai. Anan okom na'i basef nalomas sandahihianama. Sa'i basef amama, nafitap nalomasa basef amama ofagema. Basef amama atom mawalapa waf anama. Opalef aoma enis epes, sanda' findiwa ma sope ukup aom mopoma sahin owan.

⁵ Epes isima sanda' na'ama, ukup asasimi mahaga magaol endilisi ea' ina sombale'efa basef bu'wami endilisimi, owa'. Ea' sa'i basef sapa'am sandahihianama saloma enis. Ea' sa'i, “Eaf anama Godi eaf sofa' otambanai.”

⁶ Endilisi, emi egafis sila waf Godi ma esis ukup mopoma amamaga asasimi si'i, ea' ma'um dende'ma ape', opalef asasimi mape awanem mape andeande'.

⁷ Ape' mogawa, mamalapa olapa mataga etap anae', nemaf anama ape' ina mofa' anom amamaga mafi'i, owa'. Anona nemaf moga' wapoti' ina mofa' anom amamaga mefe' molomapa mokwaha etap anae', owa'.

⁸ Ea' anom gwa'aimi luwaguf maim mo'omapa, ape' mi'iam mi'i, “Ea' ma'um amama ea' dende'ma ape'.”

⁹ Ea' epes ukup ma'i sofa' otamba maim hiami, esis anona nemaf amama meagwambipai motagamas sowa ma sonda' waf aonai, si'i huguf sandowam sambaho'wam mapoma mafis ma mofe' mowala mope seaham. Ea' nambimb ukup mamumami awami motagamasa amamaga awami monda' esisa ukup mose'as hegililas owa'etin.

¹⁰ Waf anama ukup ma'i otamba endilisi, ofagema ma waf hianai aonai. Enis epes ukup lu'um ma'ima'i otamba endilisi, waf anama nambomas sakwaha sombale'efa God safe'ma waf aonai. Ea' sofa' nimanimi lu'wami endilisi.

Ine' nihapila ambal namunai la'ifina nepe la'ela'ef

¹¹ Ea' ine' aman Godi newa' alafugama amamaga amama ea' nefe' nila waf anama bu'unai. Nenda' maola nefa' waf bu'unai endilisinai Godi, nembale'efa Jisasa okom ninila epes hiesi. Nenda'am na'ama ma nitu la'ifina ma waf aonai enis sonda'menanai. Ine' nenda' waf so'uso'umbela enis epes.

¹² Nembale'efa Krais si'i enin epen nasagih mehip naloma enis. I'i enin nesagih mehip nefe' nisila'as, nefa' anom amamaga. Ine' wapoti' na'ama etin. I'i nembale'efana la'ifina, anona nemaf nepe andeande' la'ela'ef. Ine' nihapila okom anama ambal bu'unai nape la'ela'efi fowa' God nofalena ma nefa'anai. Anan nofalena nemaf anama ma newalapa bale'ef anama ine'inai naep epes hiesi sanda' lotuma Godi.

^13-14 God nase'am ambal namunai hiahaom hiami maloma epes. Afagel nali'i Jisas Krais nawalapa basef ofagema endilisimi andeande'ma naep Pontius Pailat gavman dembinai. Naep Godi naloma Jisas Krais dei' a'ipina basef la'ifimi na'ama. Nila basef bu'wami Godi nimafi esis amam nematawa Godi andeande'. Ine' nenda'am na'ama. Ine' nimafi okom ine'inai andeande' nila basef amama Godi andeande' waf aonai owa' nopeina, ea' epes ina sonda' findiwa ma basef amama. Nimafiam nepe na'ama etin nefe' netaga ma nemaf anama Dembinai ape'inai Jisas Krais notaga alihina.

¹⁵ Nemaf anama God na'ianai nosapa'ana nifi'i. God atona ofagonama danifel, anan atona Dembinai King numafi epes hiesi soloma amamaga hiami hi'alam. Anan king ma king hiami, Dembinai ma dembemi hiami.

¹⁶ Ea' anan atona owa' neaga'i, nape nafifili lu'unai endilisi. Ea' ape' dei' ina la'ifipama mefe' felefele'ma anan, owa'. Dei' enin epen owa' neatolonai. Owagama wapoti' owa' enin epen la'ifina neati Anan, owa'. Ae' a'i agel ananinai lu'unai noloma pepel Ananinai nopoma Anan atona la'ela'ef. Endilisi.

Basef amama ma esis amamaga hiamisi

¹⁷ Ine' ni'ipa epes isima amamaga hiamisi ma etap anae' ina sosambala basef endilisimi sombale'efa amamaga amama mamumami hiami anona nemaf motaga aom endilisi, owa'. Ine' ni'ipasa sombale'efa God endilisi andeande'. Anan atona nase'apai amamaga hiami bu'wami manda' ukup ape'imi mataga bo'om mandanifel.

¹⁸ Ine' kipa epes isima amamaga hiamisi, sonda'ama sigiambama maol bu'unai. Esis la'ela'ef sowaloga amamaga asasimi soso' enis epes.

¹⁹ I'i sonda'am na'ama, andeande'ma anona nemaf sokolasa amamaga bu'wami atom migiambamas owagama gani heven. Sonda'am na'ama, sofa' ambal bu'unai endilisi.

Ine' nimafi maol ine'inai andeande'

²⁰ Nogalome Timoti, ine' nindumafuma nimafi basef amama God nasi'inami andeande'. Newa' alafugama basef amama baso'maimi wafimi sa'i basef gawaimi. Basef amama ma'i mohambombaga waf Godi.

²¹ Enis epes sombale'efa basef amama baso'maimi sa'i, “Ape' mogawai.” Ea' dei' sakwaha sombale'efa God sahaga sogaol sapan. Ae' a'i God nigiambamepa na'a ipe' hipei. Ea' ma'um.