1 Timoti 5 - Basef Buꞌwami Godi

Waf bu'unai nihi'amba amam nematawa ma waf bu'unai sienda'anai

¹ Ina nenda' megah moham amam hagami ni'ipam basef la'ifimi, owa'. Nepe so'uso'umbel ni'ipama basef Godi, ni'ipam si'i na'ipa ahalomena ine'inai. Ea' ni'ipa awomimi si'i na'ipa owapena ine'imi.

² Ni'ipa nematawa hagiwai si'i na'ipa mama'wena ine'ikwi. Ea' ni'ipa awiawai si'i na'ipa haniti'mina ine'ikwi ma waf bu'unai notaga bo'ona endilisi ma naep Godi.

Basef amama ma nematawa alifiwai

³ Basefa nematawa alifiwai ma'i na'ama. Nematawa awama, i'i owa' enin epen numafiawa, ine' nimafiawa andeande'.

⁴ I'i ano'w nemata'w alifi'wi enis awasi akwa'usi o bafasa'w akwa'usi sope esis ata' sogawa andeande' na'ama. Maol asasinai nali'i sumafi ahapas mamasas asasisi etis ata' sili' ma sogwa wiaf fowa' esis somafias. Esis sonda'am na'ama saila basef Godi. God okom na'iana endilisi waf anama.

⁵ I'i ano'w nemata'w akwa'w ato'w kope alifi'wi, akwa'w kwanda'am na'ama. Ako'w kogawa endilisi God nambimb nigiambama'w ma waf bu'unai, kofala God la'ela'ef owamb alipa beten akwa'unai.

⁶ I'i ano'w nemata'w alifi'wi kwaila okom akwa'unai atona kwandagala ma alop atona kwanda' waf aonai, akwa'w si'i kwaga'i.

⁷ Ine' nefela ukup nematawai ma wila basef amama ma onda' waf bu'unai, ma awau upe andeande'. Ama enin epen ina ni'ipawa ni'i awau wanda' waf aonai, owa'.

⁸ Emi egafis owa' sumafi esis esimbel atom asasisi, esis ina nambimb simafi esis mamasas ahapas soloma batawisas. Epes isima sakwaha bale'ef sataga epes awasi endilisi sikila' isima owa' seambale'efa Godi.

^9-10 I'i anowa nematawa wahupawa maga'i, awau ina onda' so'a waol, owa'. Ope andeande'ma enis epes sotolowa si'i wape andeande'. Onda' maol bu'unai ma umafi batawisawa, ose'as gwa'aimi epes wigiambama esis Kristen wambota Godi, umafi awasi awausi andeande' ope onda' maol hianai bu'unai naninani ofe' ofe' otagama afagof 60-peleim, andeande'. Nematawa wanda'am na'ama atowa ine' nenda' agof awaumi mil okwatiha nigiambamawa nese'awa gwa'aimi.

¹¹ Ea' ine' owa' nenda' agofa nematawa awama awiawai alifiwai, owa'. Hapaiwai. Anona nemaf awau wi'i ugi'ma ukup awoumi ola alop awaunai atona wi'i oso' amam wapoti, ea' hapaiwai. Awau ukup amama mapaiwa, dei' wakwaha wafa basef bu'wami Kraisi fowa' ombale'efanai.

¹² Dei' wakwaha basef bu'wami la'ifimi fowa' wa'iam waloma Krais. Wanda' waf anama aonai, na'ama ofagema awaumi.

¹³ Ea' anona waf awau wanda'ana wapoti'. Wanda' waf anama ala'uta nawa. Ea' wafe' wawis ifagw. Awau ina ala'uta nawa, owa'. Wakwalopa basef enis epesi wanda'am wafe'agon hi'alagon. Ea' wawalapa basef mamumami ina andeande'ma ape' mi'iam, owa'.

¹⁴ Amama atom dei' a'i nematawa awama alifiwai ata' awiawai nambimb oso' amam wapoti' ma ola awasi umafias ope ifagw awaumi atom. Ae' a'i awau ina onda' anom amamaga awami motagama esis naumbih ma si'i anom basef awami ma ape', owa'.

¹⁵ Ine' negawa, anowa nematawa wahupawa maga'i, wakwaha eaf bu'unai wafe' waila aman aonai Satan.

¹⁶ I'i anona wambota nemata'w akwama akwa'w Kristen o anowa nematawa alifiwai ope, ea' nemata'w akwama Kristen kumafiawa. Akwa'w konda'am na'ama ma esis sios ina sonda' maol sope somafiawa, owa'. Na'ama andeande'ma sios esis amam nematawa Godi sumafi nematawa alifiwai kwahuwai endilisi awau atowa wapani.

¹⁷ Amam agufumi mumafi ipe' Kristen manda' maol andeande' endilisi, ipe' pinifelom penda'am andeande' pimafiam pese'am gwa'aimi maim bif etif mikila' peso' anom agufumi ma siosi. Agufumi manda' maol Godi mawalipasa basef ofagema Ananimi ipe' pimafiam na'ama etin andeande'.

¹⁸ Basef mape Buk Baibeli ma'iam na'ama ma'i, “Ine' owa' nesopama malogofa bulmakau manda' maol mafa'asa wit, owa'.” Ea' anom basef wapoti' na'ama ma'i, “Aman nanda' maoli anan nofa' anom amamaga tu'wanima maol anan nanda'anai.”

¹⁹ I'i enin epen etitin ni'i, “Agilinai anama numafi esis Kristeni nonda' waf aonai, ine' owa' neme'anama basef ananimi, hapaimi. I'i epes bias o wenis si'i basef amama ma waf aonai anan nanda'anai, ine' neme'as.”

²⁰ Ea' i'i anom agufumi monda' waf aonai, ine' ni'ipam basef la'ifimi ni'ipam naep esis Kristen hiesi. Nenda'am na'ama ma enis epes umbamohasa waf anama ma ina sonda'am na'ama.

²¹ Ae' a'ipina andeande'ma naep Godi naloma Krais Jisas maloma amam ensel God nandandepami. Ine' nila basef amama andeande'. Ine' owa' ninifala anom amam awomimi ni'ipam mehip. Ea' ina nenda' anom dembemi sa'ombemam ni'ipam so'umbel, owa'. Ni'ipa epes hiesi na'ama etin. Ina ninifala enis epes ea' nenda' enis alupusi sa'ombemas, owa'. Ni'ipas na'ama etin.

²² Ine' owa' nefa'anai anona aman mehip nenda'ana nope agilinai ma esis Kristen, owa'. Nili' notolona andeande' nanda' waf bu'unai o nanda' waf aonai. Na'ama enis epes sitilina nigiambama anona nanda' waf aonai, si'i ine' wapoti' nanda' waf aonai anan nanda'anai. Ine' nindumafuma nepe andeande'.

²³ Ine' nekwaha waf anama na' embel wafimi atom. Andeande'ma nea' wain kwaie'una nigiambama opaf ine'inai ma netofa awes la'ela'ef nanda'inai.

²⁴ Waf aonai enis epes sanda'anai nape alihina esis nafe' nali'as sogawana alihina. Ea' waf aonai enis sanda'anai nape nandambaho', anona nemaf notaga nendawalap.

²⁵ Ea' na'ama etin anona waf bu'unai wapoti' nape nandawalap. Ea' anona waf bu'unai nandambaho' ea' ina nandambaho' la'ela'ef, owa'. Anona nemaf nondawalap.