1 Timoti 4 - Basef Buꞌwami Godi

Basef amama ma epes sambaso'ami

¹ Ambal Bu'unai Godi na'i basef alihim na'ama. Anona nemaf enis epes sokwaha sombale'efa basef endilisimi Godi. Ea' seme' basefa epes isima ambagof awami mambaso'ami sila basef ambagof awami ma'iami.

² Anom amam mambaso'ami mawalipasa basef amama baso'maimi. Basef mape opalef asasimi nomon ma'iami mataga aom. Amam ina nambimb ata' momeme'ma waf aonai mogawana, owa'etin.

³ Nambimb muwalipasa basef amama ma esis sihi'ama waf sandaso'amainai sihi'ama anom gwa'aimi epes sagwa'ami. Gwa'aimi amama God atona nanda'ama ape' epes mombale'efana mogawa basef endilisimi. Amama ape' mofa'am minifela God mogwa'am.

⁴ Amamaga hiami God nanda'ami, bu'wami atom. Ape' minifelona, mofa'am, mogwa'am. Ina mokwahom, owa'.

⁵ Dei' main, basef Godi maloma beten manda' gwa'aimi amama mataga bo'om andeande'.

Timoti nepe aman bu'unai nanda' maol Kraisi

⁶ I'i ine' ni'ipasa basef amama esis Kristen alupusi, nambimb nepe epen bu'unai nonda' maol Krais Jisasi. Ea' nefa' pepel lu'unai ma basef mefela bale'ef ine'inai ma gawa bu'unai.

⁷ Ea' esis amam nematawa sa'i numunefisa basef atom wafimi, newa' alafugamam. Ina manda'ena nelafa waf Godi andeande' negawam, owa'.

⁸ Ine' negawa waf anama niwalipa alop si'ina nonda' maol alop neawi, amama la'ifim kwaikwaie' ma migiambamapa. Ea' ine' nelafa waf Godi, la'ifina endilisi ma nagiambamapa ma waf hianai bu'unai. I'i ine' nelafa waf Godi, anama la'ifina nagiambama ape' epes hiapai ma dei' mape etap nogota anae', ea' nigiambamapa owagama ilif heven wapoti'.

⁹ Basef amae' endilisimi atoma epes hiesi si'i aho'ma seme'am sombale'efam amama na'ama.

¹⁰ God anan ambal namunai napainai. Anan na'i nofa'ai amam nematawa hiesi sotanimani sope andeande'. Ea' dei' endilisi etis nefa'ai epes emi egafis sembale'efanai. Dei' mape mohafana ma'i endilisi nofa'apa. Amama atom dei' manda' maol lu'unai endilisi.

¹¹ Ine' ni'ipasa basef amama mefe'mago esis amam nematawa niwalipas mehip silam.

¹² Esis sati ine' ukup ma'i, ine' ata' awomina, ea' ina ni'i aho'ma si'i ine' aman falafinai, owa'. Ine' nepe si'i ikwaf bu'unai ma esis Kristen sila waf bu'unai ine' nanda'anai ma fe' pe ki bale'ef ine'inai, noloma waf anama okom na'ina'ianai noloma waf bu'unai.

¹³ Nogota anama ine' ata' nepe la'ela'ef nehafa ae', nenda' maol la'ifina ma nitalifa basef Godi alihiguma ma epes hiesi seme'am, ea' nefela ukup asasimi ma waf sonda'anai ni'ipasa basef Godi andeande'.

¹⁴ Fowa' agufumi mumafi siosi mawamona lagofa ine'. Ambal Bu'unai Godi nafelam manda' betena ine' ea' anom amam ma'i basefa presen anama God nasi'inanai na'a. Dei' nenda' maol la'ifina nimafi presen anama andeande' God nali' nase'enana na'ai.

¹⁵ La'ela'ef ine' nimafi maol anama la'ifina nepomana. Ama epes hiesi siti waf ine' nanda'anai netaga bo'ona.

¹⁶ Nindumafuma andeande'ma waf ine' nanda'anai, ma basef amama niwalipasami. La'ela'ef nenda'am na'ama la'ifina. I'i ine' nenda'am na'ama, nambimb God nigiambamena neloma esis seme' basef ine' na'ipasami sailam, nofa'epa petanimani pepe andeande'.