1 Timoti 2 - Basef Buꞌwami Godi

Waf anama manda' betenanai

^1-2 Maol anama ae' a'i efela okom ine'inai nenda'ami, basef mali'i na'ama. Ipe' penda' betena God pihali'ana, pinifelona ma epes hiesi penda' betena anan nigiambama esis soloma amam king dembemi moloma gavman dembemi wapoti'. Ipe' penda' beten na'ama ma ape' hiapai mope opalef awanem, mila waf Godi bu'unai.

³ Beten anama bu'unai ma naep Godi, notanima nofa' ape' mope andeande'. I'i ape' monda' waf anama monda' beten, Anan nondanifela ma ape'.

⁴ Anan na'i nofa'ai epes hiesi sotanimamai Anan sope andeande'ma sogawa basef endilisimi ofagema.

⁵ Ape' mogawa God atotona nape. Ea' anona aman nape la'afena God naloma epes, anama aman endilisinai anan Krais Jisas.

⁶ Anan fowa' God nandandepana ea' nakwaha ambal ananai atona natala ape' epes hiapai nakwahomapa waf aonai motanimani. Nemaf anama dohamadohama Krais nihi'ambamapa God na'i nefa'ai epes hiesi sotanimani.

⁷ Ea' dei' God nanda'e ape aposela ewalapa basef bu'wami Ananimi. Ae' a'i endilisi, ina ambaso'am. Anan nanda'e ape dembiwei tisa ma enis epes hiesi sololama Godi ma sombale'efa basef amama endilisimi.

⁸ Ea' dei' ae' a'i epes hiesi wambel hiagoma sonda' beten. Ae' okom na'i esis hiesi sope bo'wes andeande', sokwaha ukup wandafumi moloma migimigah ea' sonda' beten.

Basef awo nematawai

⁹ Ae' a'i awau nematawa wapoti' onda' luwaguf maim bu'wami atom, mondahama awau dende'. Ina onda'am bandabandam endilisi motambel nimbifah, owa'. Awau ina ola sosaf anama ofalo'ma balagah alop si'ina ombahigis mamumami hiami moloma sosaf gol bu'wami, owa'. Luwaguf amama satalom otamba hiami otalom, hapaimi.

¹⁰ Ea' nematawa wa'i basef wa'i ope awasi Godi, awau onda' maol bu'unai hianai naninani. Maol anama si'i sosaf awaunai endilisinai.

¹¹ Maina nemaf ipe' penda' lotu, nematawa awau owalipama wila waf anama so'umbilinai ea' osopama malogofa ofa' basef andeande'.

¹² Ae' ina a'i aho'ma ano'w nemata'w kope dembe'wi tisa kope kwili' ma anona maol, owa'. Nematawa osopama malogof ome' basef atom.

¹³ Basef ofagema mape na'ama. Fowa' God nali' nanda' aman Adam, ea' nanda' Iv kwagi'.

¹⁴ Adam ina nombale'efa basef baso'maimi, owa'. Nemata'w kwambele'efa basef baso'maimi, ea' kwataga nemata'w kwanda' waf aonai.

¹⁵ Waf nematawa onda'anai anama. Awo ombale'efa God endilisi ea' ukup mimila enis epes wigiambamas, ea' ope bo'owa andeande' umafi awau andeande' waf aonai a'awa. I'i ombale'efa waf anama wilana la'ela'ef, God nambimb nokwahomawa waf aonai awau wanda'anai nofa'awa utanimani ope andeande'. Maina nogota ola awasi, nigiambamawa olas andeande'.