1 Timoti 1 - Basef Buꞌwami Godi

¹ Ae' Pol anda' basef amama. God nofa' ape' motanimani mope andeande' ea' mape mohafa anona nemaf miti Krais Jisas mope molomana. Amam biam mandandepe ma'ipi basef la'ifimi ma ape aposel Krais Jisasi.

² Ae' anda'menago basef amama ine' Timoti, ine' nembale'efa God dei' nataga nogalome ae'inai endilisi. Ae' a'i God noloma Krais Jisas dembinai afa'inai miti uwahipina migiambamena na'a monda'ena netaga la'ifina ma bale'ef, opaf ine'inai nope awanena.

Ape' mohagofa basef baso'maimi hiami

³ Fowa' ae' afo'o etap hiagoma Masedonia ma a'ipina dei' na'ama etin a'ipina wapoti'. Ine' ata' nepe la'ela'ef na'ama Efesusa ni'ipa anom amam mehipa ina mi'ipasa anom basef baso'maimi, owa'. Mi'ipasa basef Godi atom.

⁴ Ni'ipasam mokwaha basef fowa'imi wafimi, basef mamumami hiami ma'i agof amama bafapas ehasas asasisi. Basef amama mamboma ukup amamumi mafela ukup amamumi ma'i basef mandahihianamam. Amam amama ina manda' maol Godi mataga la'ifima bale'ef, owa'. Maol anama Godi natagama bale'ef atona.

⁵ Ea' mi'uli anama dei' a'ipinanai, i'i esis sombale'efana silana, basef mape opalef nomoni ma'iami ma'ipas mihi'ambasa waf esis sanda'anai ina aona, owa'. Esis sombale'efa God endilisi. Ama nambimb waf anama hianai nefela ukup asasimi mimila God noloma enis epes wapoti'.

⁶ Ea' anom amam ukup mase'ama waf anama bu'unai. Ea' dei' mamboma basef bu'wami ma'i basef wafimi atom.

⁷ Amam ma'i mopoma tisa mowalipasa mi'uli Godi si'i anom dembemi tisa ma'i, “Basef afa'imi endilisimi atom.” Ea' amam ina mogawa basef amama ma'iami mogawa ofagema, owa'.

⁸ I'i afa' ogawa mi'uli Godi wilana, na'ama andeande'.

⁹ Afa' ogawa amama wapoti', mi'uli anama ina nafi'mai epes isima sape andeande'i, owa'. Anama nafi'mai epes sanda' waf aonai, sosambala mi'uli anama owa' sope owina amam agufumi. Ea' enis seso' alafugaha Godi sanda' waf aonai. Enis sa'i waf Godi hapainai, ma saila waf etapanai atona. Ea' enis saha ahapas mamasas saga', saha enis epes wapoti' saga'.

¹⁰ Enis sanda' so'a wauli ma waf anama aonai, ea' enis sahambombaga enis amam nematawa si'i fowa' esis Sodom sanda'anai. Ea' enis sofa' enis epes safe' satalisa otamba sanda'masa maol. Ea' enis sambaso'ami, ea' enis sambaso'am sa'i basef endilisi gani ilif. Ea' enis sanda' waf anama naloma anona waf hianai aonai napa' naloma basef endilisimi. Mi'uli Godi nafi'i na'i epes isima sanda' waf aonai.

¹¹ Basef amama mape basef bu'wami God nase'eam ae' ma ewalapam. Basef amama bu'wami ma'ipafa God bu'unai endilisi ofagonama danifel naloma mafifili.

Pol nanifela Goda nagiambamana na'a

¹² Dembinai ape'inai Krais Jisas nase'e pepel, okom napoma ae' bu'uwai anda' maol ananinai nanda'e anda' maol anama, ea' anifelona.

¹³ Endilisi, fowa' la'ela'ef ae' anda' basef findiwami ma agel Ananinai, apa' aloma esis Kristen, anda' waf aonai ma Anan. Ea' ae' ina egawa andeande', owa' embale'efanai, ea' dei' anda' waf anama aonai ma anan la'ela'ef ape. Amama atom dei' nati uwahipiwi nagiambame.

¹⁴ Dembinai ape'inai nagiambame na'a nanda'e ataga la'ifiwi dei' embale'efana okom nainailana.

¹⁵ Anom basef endilisimi atoma epes hiesi some'ama sombale'efam. Basef amama na'ama. Krais Jisas nisila'i etap anae' ma nefa'ape epes manda' waf aonai nokwahomapana motanimani mape andeande'. Ae' ma'uwi ali' anda' waf aonai ikila' enis epes ea' ma'uwi ae' atowe.

¹⁶ Amama atom dei' God nati uwahipiwi ali' ma Krais Jisas na'i nih'iambasa Anan ina okom wandafunama ae' ulal, owa'. Ae' anda' waf aonai ikila' enis epes, ea' anan nape nohafe nogota launai ma etanima ifi'mai Anan. Ama owagama hiesi siti ae' ma esis wapoti' sombale'efana sofa' ambal namunai sope andeande' la'ela'ef.

¹⁷ Anan dembinai King nape la'ela'ef. Anan owa' neaga'i, epes owa' la'ifisa sotolona. Anan atona God endilisinai. Ae' a'i agel lu'unai pepel nafifili mopoma Anan atona la'ela'ef. Endilisi.

Timoti nambimb nonda' wandaf la'ifinai noloma amam naumbih

¹⁸ Nogalome ae'inai Timoti, dei' ase'enago basef amama nenda' maol. Ae' okom napoma basef Godi afagel nimbewa'inai amam profet Ambal Bu'unai Godi nafela ukup amamumi ma'ipinami. Ine' nila basef amama, nenda' wandaf la'ifina andeande' neloma esis naumbih.

¹⁹ Wandaf anama ine' la'ifina nembale'efa God nenda' waf bu'unai andeande', ma basef mape opaf ine' nomoni ina ma'ipina anona waf aonai ine' nanda'anai, owa'. Enis epes soso' alafugaha waf anama bu'unai. Ea' dei' bale'ef asasinai aona si'i sip papalalana nail otamba aona nala naoh.

²⁰ Epes sanda' waf anama, amam biam Himeneus naloma Aleksander. Bale'ef amamunai aona. Ae' andaiwa'mam ali'amonam mafe' lagof Satani ma mogawa gawa bu'unai. Anda'am na'ama amam ina monda' basef findiwama agel Godi, owa'.