1 Tesalonaika 5 - Basef Buꞌwami Godi

Ape' mondondombam mopoma Dembinai niefi'i

¹ Ipe' amam nematawa afa'ipei alupipei, afa' ina onda' anom basef laumi ma wi'ipipa nemaf anama amamaga amama motaga, owa'.

² Ipe' pegawa nemaf anama Dembinai niefi'ianai. Anan nifi'i si'i epen nanda' wali nafi'i owamba pa'oh pelolamana.

³ Anona nemaf enis amam nematawa si'iam si'i, “Ea' dei' nemaf bu'unai ma mope andeande'.” Esis si'iam na'ama, nogota anama atona amamaga mohambomba alop asasinai motagamas mehip, si'i nemata'w kwame' akep paha'w kola awani. Ea' esis ina sindihi'ama amamaga amama, owa'etin.

⁴ Ipe' alupipei, ina ata' pape owamb si'i isima sololama Dembinai, owa'. Ipe' ina gegelalasipa ma nemaf anama notaga si'i gegelalasipa ma aman nanda' wali nafi'i, owa'.

⁵ Ipe' epes hipei pape alip. Ina si'i epes sape owamb, owa'.

⁶ Na'ama ipe' ina penda'am si'i isima enis ukup mase'as sa'oh solola, owa'. Andeande'ma ape' ukup mope naep motawa motologon.

⁷ Ape' mogawa esis isima sa'ihi esis sa'oh owamb atona. Ea' isima sa' embela sahaga sagaoli sanda'am owamb atom.

⁸ Ape' mape si'i epes sape alipi, ukup mapaepa mumafi alop andeande'. Ape' mofa' waf anama mombale'efana la'ifipa ma moso' opalef enis, si'i sanda' wandafi sofa' walitah sanda' wandafa mahagasa wambawa. Ape' mogawa basef amama anona nemaf God nofa'apa motanimani. Ukup mopoma basef amama si'i mowalo' anona hat la'ifinai nili'akwa balagah.

⁹ Dembinai God ina nosahe'apa ma mofa' okom wandafunai ananinai nefa'apa, owa'etin. Anan nosahe'apa ma Jisas Krais Dembinai ape'inai nofa'apa motanimani.

¹⁰ Fowa' anan naga' ma nagiambamapa. I'i nemaf anama anan notanimani mope ambagof mopaepa o moga', mofe' mope namepa molomana.

¹¹ Dei' ipe' hipei penda opalef ipe'imi motaga la'ifima pendagigiambanama etin si'i dei' pape panda'am.

Anom basef mawalipipei

¹² Ipe' Kristen alupipei afa'ipei, afa' wa'ipipa na'ama, wa'i amam agufumi mumafi esis Kristen, anom manda' maol lu'unai malomepa magiambamepa. Ipe' pefe' owina amam. Dembinai nanda'am mape agufumi ipe'imi ma mogawa monda' ukup ipe'imi mope andeande'.

¹³ Ipe' ukup mopoma maol amam manda'anai, ea' ukup mimilam bo'om mopomam endilisi. Ea' ukup etifim etin mimilas sahin owan.

¹⁴ Ipe' Kristen alupipei afa'ipei, afa' wa'ipipago mehip wafela ukup ipe'imi ma pigiambamago isima ala'uta nasi la'ifipa pi'ipasa sokwahago waf ala'uta nasanai. Ea' enis ambagof mondolele'asi ma owa' si'i anom basefi, ipe' penda'as sotaga la'ifis sie'i basef. Ea' penda' esis enis owa' seambale'efana la'ifisi sotaga la'ifis. Penda' waf so'umbilinai ma esis hiesi.

¹⁵ Na'ama ipe' pegwamasa waf aonai enis epes sanda'mepana ipe'i, owa'. La'ela'ef pitu la'ifipa ma waf bu'unai atona la'ela'ef. Ea' penda'masana isima enis hiesi wapoti'.

¹⁶ Ipe' pendanifel la'ela'ef.

¹⁷ Penda' beten pihali' God la'ela'ef owamb alip.

¹⁸ Ipe' pinifelona amamaga hiami. Ipe' pape la'ifipa paloma Krais Jisasi, God na'i ipe' penda' waf bu'unai pinifelona ma amamaga hiami.

¹⁹ Ipe' ina pehefa nif amama ma maol Ambal Bu'unai Godi nanda'ami, owa'.

²⁰ Ipe' ina pewa' alafugaha basef Godi Ambal Bu'unai nafelas sa'ipipami, owa'.

²¹ Pewaloga basef hiami, ma pembale'a basef bu'wami atom la'ifipa.

²² Ea' pindihi'ama amamaga awami mamumami hiami.

²³ God anan ofagonama ukup awanem. Ae' a'i anan atona nonda'epa pepe bo'wepa andeande' ananipei etipa. A'i anan numafi ambagof moloma alop ukup ipe'imi andeande'ma waf aonai a'epa, pepe andeande' ma nemaf anama Dembinai ape'inai Jisas Krais niefi'ianai.

²⁴ God nofala ipe', anan bo'ona endilisi. Basef maloma maol main na'iam ea' ma nonda'anai, anan nonda'am andeande'.

²⁵ Ipe' Kristen alupipei, penda' betena God nigiambamafa.

²⁶ Ipe' pendase'ama lagof penda'ama nemaf bu'unai peloma esis Kristen alupusi hiesi.

²⁷ Ae' a'ipipa mehipa agel Dembinai, ipe' pi'i basef mail pas amama ma esis Kristen alupusi hiesi.

²⁸ Afa' wa'iam na'ama wa'i, Jisas Krais nigiambamepa na'a nonda'epa pepe la'ifipa. Ea' ma'um.