1 Tesalonaika 3 - Basef Buꞌwami Godi

Pol nasapa' Timoti nafe'ma nonda'as sataga la'ifis

^1-2 Afa' dei' ina wame' anom basefa ipe' pape pa'imama, ata' owa'etin. Dei' wandaiwa'ma ata' ope nogota laona na'ae. Ea' wa'i afa' atofa biafa ope na'ae wambel lu'unai Atens, ea' wasapa' owalomafa afa'inai Timoti wanda' maol etin Godi nofo'o ma ni'ipasa basef bu'wami Kraisi. Wasapa'ana nafo'o nanda' ipe' la'ifipa nigiambamepa ma pembale'efa Dembinai la'ifipa.

³ Na'ama atuwasi enipa pendafa'ma amamaga amama nimanimi lu'wami, ea' pewa alafugaha God. Ipe' pegawa God atona nandandepapa ma mofa' amamaga amama nimanimi.

⁴ Fowa' afa' wape walomepa, wa'ipipa wa'i, “Owagama afa' ofa' nimanimi.” Ea' amama dei' matagamafa si'i fowa' wa'ipipa pegawam.

⁵ Ae' ina ata' epe ehafa ipe' wapoti', owa'. A'i efo'o. Ea' asapa'a anona aman nafo'o nogawa bale'ef ipe'inai ma nigiambamepa. Na'ama aman anama aonai Satan nakikipipa ma panda' waf aonai, ea' maol afa' wanda'anai nalo na'a.

Pol nandanifela Timoti nofa'i basef bu'wami

⁶ Timoti nakwahepa dei' atef nafi'mai afa', nawalapa basef bu'wami ma afa'. Na'ipafa ma ipe' pembale'efa Kraisa ukup maimaila enis epes. Ea' na'i ipe' pa'i petolofa, afa' wapoti' wa'i utilipa.

⁷ Ipe' Kristen alupipei afa'ipei, afa' wame' basef amama ogawa ipe' pembale'ef pape. Ea' wandanifela ipe', wame' ipe' pembale'efana pape. Amama atom manda' afa' wataga la'ififa ma nimanimi hiami ofa'ami.

⁸ I'i ipe' pepe la'ifipama Dembinai, afa' wapoti' ope ondanifela ambal namunai endilisi.

⁹ Ea' afa' wandanifel endilisi ma naep God afa'inai. Ipe' pembale'efana la'ifipa. Ea' dei' afa' wanifela God.

¹⁰ Dendel owamb alip afa' wanda' betena ipe' mehipa wa'i uti amagahipama ogawa ipe' pembale'efana la'ifipa o owa'? Afa' wa'i ofo'o ma wigiambamepa peso' opalef ipe'imi ma God pape andeande'. Pol nanda' betena Goda nigiambamana nefe'mago esis

¹¹ Afa' wanda' beten wahali' ahalomafa afa'inai God naloma Dembinai Jisasa monda' eaf nogal migiambamafa ofe'mago ipe'.

¹² Afa' wa'i Dembinai nigiambamepa na'ama. Waf anama ipe' ukup maimaila ipe' hipei pandagigiambanama etin ea' ukup maimaila epes hiesi wapoti', waf anama notaga lu'una nikila' waf anama fowa' panda'anai. Penda'am na'ama si'i waf afa' dei' wanda'anai ukup maimaila ipe' endilisi nataga lu'una nikila' waf anama fowa' wanda'anai.

¹³ Wa'i ipe' penda' waf anama ma God nonda'epa petaga la'ifipa opalef ipe'imi. Ama anona nemaf Dembinai ape'inai netambel nifi'i nulumai esis hiesi sambale'efanai sape andeande' ma ipe' pepe bo'wepa andeande' basef a'epa ma naep Godi ahalomapa ape'inai.