1 Tesalonaika 2 - Basef Buꞌwami Godi

Maol Pol nanda'anai wambel Tesalonaika

¹ Alupipei, ipe' pegawa fowa' afa' wafe'mago ipe', maol anama afa' wanda'anai ina nalo, owa'.

² Fowa' wali' wafe' wambel anama Filipai ea' sanda'afa aofa alop afa'inai, wame' nimanimi endilisi. Ipe' pegawa. Ea' God afa'inai nanda' opalef afa'imi la'ifim. Ea' afa' ina umbamahafa wandafa'ma esis naumbih, owa'. Afa' la'ififa wafo'o wawalapa basef bu'wami Godi ma ipe'.

³ Basef ofagema wa'ipipami ina wa'i onda' waf aonai ma ipe', owa'. Afa' ina waila basef amama falafumi baso'maimi wa'ipipam, owa'.

⁴ God atona nagwambafa natolofa wape andeande' ea' nase'afa maol afa' ma wawalapa basef bu'wami Ananimi. Ea' amama atom dei' wawalapam. Afa' ina wanda' maola epes sinifela maol afa' wanda'anai, owa'. Wanda' maola God atona nondanifela maol Ananinai, Anan atona nawaloga afa' nogawafa.

⁵ Ipe' pegawa basef wa'ipipami afa' ina wakikipipa, owa'. God natolofa nogawafa ea' afa' ina wanda' maol wambaho' basefa waf kowalasanai, owa'.

⁶ Afa' ina wanda' maola epes sefela agof afa'imi, o enis epes o ipe' wapoti' pinifelafa, owa'.

⁷ Afa' wape aposel Kraisi endilisi. Anan nasapa'afa ma onda' maol Ananinai. Ea' dei' wi'i a'e, wi'ipipa mehipa pese'afa anom amamaga gwa'aimi maim. Ea' owa'. Nogota nanima wape walomepa afa' wanda' waf so'umbilanai endilisi ma ipe', si'i ano'w nemata'w kumafi awasi akwa'usi andeande'.

⁸ Afa' ukup maimailipa endilisi. Ea' wase'epa basef bu'wami Godi. Ina wa'ipipa basef atom, owa' wase'epa opalef endilisi ma ipe'. Ea' wandandombam ma oga' wigiamabamepa.

⁹ Endilisi ipe' alupipei pegawa amama, afa' wanda' maol mehipa wawalapa basef bu'wami Godi ma ipe'. Ea' wanda' maol wapoti' umafi alop afa'inai ma gwa'aimi maim. Wanda' maol owamb alipa ina opoma ipe' etipa ma ofa' gwa'aimi maima ipe', owa'.

¹⁰ Ipe' patolom pegawam ea' God wapoti' natolom nogawam ea' waf wanda'ana ipe' pembale'efa Krais. Waf anama afa'inai bu'unai, ina aona, owa'.

¹¹ Ipe' pegawa waf anama si'i ahalomas numafi awasi ananisi, ea' na'ama etin si'i afa' wanda'mepam ipe' atona etin. Afa' wafela ukup ipe'imi, wawalapa waf bu'unai so'umbilinai.

¹² Wa'ipipam na'ama ma ipe' penda' waf nefe' andeande'ma God nitilipa ninifelipa. Ea' nofalepa pafi'i piwis pelomana wambel Ananinai howalogoma.

¹³ Fowa' ipe' pefa' basef Godi malogof afa'imi, pembale'efam. Basef amama ina pefa'am si'i basef epesi atom, owa'. Pefa' basef amama endilisimi Godi. Ea' basef amama magiambama opalef ipe'imi, dei' paila waf bu'unai. Ea' afa' wanifela God la'ela'efa ipe' pefa' basef Ananimi pembale'efana andeande'.

¹⁴ Ipe' Kristen alupipei, pefa' nimanimi na'ama etin si'i esis sombale'efa basef Godi sape etap hiagoma Judiai. Esis sombale'efa Jisas Krais, ea' sataga amam nematawa Godi. Amama atom dei' esis Juda sase'as nimanimi enisa alop asasinai na'ama etin si'i ipe' wambel atotona sase'epa nimanimi.

¹⁵ Esis Juda saha Dembinai Jisas naloma amam profet maga' ea' sanda' wandaf sali'amonafa. Sosambala waf God okom na'ianai sahambombaga epes hiesi.

¹⁶ Ea' sasopama eafa afa' i'ipasa basef Godi esis sololama Anani ma nofa'as sotanimani sope andeande'. Esis Juda sanda'as na'ama dei' sowatani waf aonai asasinai la'ela'ef nataga lu'una endilisi. Fowa' God natilis na'a ea' dei' okom wandafunai Ananinai nafi'i natagamas nemaf akutainai nonda'as awes higilalas.

Pol okom nohafel endilisi ma na'i nitilis wapoti'

¹⁷ Ipe' Kristen alupipei, esis Juda sali'amonafa nogota bandana ma wape si'i awasi mamasas a'asi. Endilisi afa' ina wati amagahipama, ea' ukup afa'imi mape malomepa. Amama atom dei' wanda' maol la'ififa endilisi ma uti anona eafa ofo'o uti amagahipama. Afa' ukup maimailipa endilisi ma utilipa.

¹⁸ Ea' dei' wa'i ofe'mago ipe'. Ae' Pol anda'am nimeguf hiami a'i efo'o, ea' Satan nahopamafa eaf.

^19-20 Owagama Dembinai ape'inai nifi'i wapoti', ape' mitu naep Ananimi. Nemaf anama afa' ukup bo'om mopoma main? Ea' ondanifela amamaga maim bu'wami? Owa'etin. Nemaf anama afa' ondanifelama ipe' etipa. Nemaf anama ape' hiapai mefe' mope molomana.