1 Tesalonaika 1 - Basef Buꞌwami Godi

¹ Ae' Pol aloma Sailas naloma Timoti wape na'ae. Ea' anda' basef amama mafe'mago ipe' amam nematawa Godi pape Tesalonaika. Ipe' pape paloma God ahalomapa ape'inai naloma Dembinai Jisas Krais. Ipe' Kristen pape paloma amam ea' amamipei si'ipa. Afa' wa'i God nigiambamepago ipe' na'a nonda' opalef ipe'imi mope awanem.

Esis Tesalonaika sombale'efa God la'ifis sape andeande'

² Nimeguf hiami afa' wanifela God la'ela'ef ma ipe'. Ea' wa'i agof ipe'imi wanda' betena ipe'.

³ Afa' la'el'ef wa'ipa God ahalomapa ape'inai ma ipe' wanda' betena ipe'. Ipe' pembale'efa God panda' waf bu'unai. Fowa' ipe' paso' opalefa God naloma enis epes wapoti'. Ea' dei' panda' maol lu'unai Godi. Ipe' ukup mape la'ifipa pehafa Dembinai Jisas Krais nifi'i. Ea' afa' wanda' beten nimeguf hiami ma ipe'.

⁴ Ipe' Kristen alupipei, God okom nainailipa. Ea' afa' ogawa Anan nosahe'epa ea' Ananipei si'ipa.

⁵ Basef amama bu'wami Godi fowa' ofa'ami, amama ina mataga na'a ma ipe' si'i anom basef wafimi, owa'. Ambal Bu'unai Godi nanda' basef amama mataga la'ifim ma pepel Ananinai ea' wafi'i wa'ipipam. Ea' manda' ukup ipe'imi la'ifim pembale'efana. Waf fowa' wape walomepa wanda'anai, ipe' pegawana.

⁶ Amama atom dei' pegawam paila Dembinai. Amamaga nimanimi matagamepa, ea' pefa' basef Godi, Ambal Bu'unai Godi nafela opalef ipe'imi pandanifel.

⁷ Ea' pihi'ambasa waf bu'unai epes isima hiesi enis amam nematawa sombale'efa Kraisi sape etap anama hiagoma biefigin Masedonia naloma Akaia.

⁸ Basef Dembinai ipe' pa'ipasami mogal ma'i mafe' si'i wata nalef mehip. Ina mafe' Masedonia naloma Akaia atogon, owa'. Anama hiagoma esis same' basefa ipe' pembale'efa God. Afa' ina wa'ipa epes isima, owa'. Ipe' pali' paso' opalefa God andeande'.

⁹ Dei' esis etis sa'i basefa ipe' pandanifel pa'i nemaf bu'unai ma afa' ea' pame' basef afa'imi fowa' afa' wanofa wafe'mago ipe'. Esis sa'i ipe' pakwaha amamaga amama ambagof awami fowa' ipe' panda' lotumami. Ea' pamboma opalef pafe'ma God. Ea' dei' panda' maola God endilisinai, owa' neaga'i, nape la'ela'ef.

¹⁰ Ea' esis sa'i ipe' pape pehafa Nogalomana Ananinai anona nemaf nekwaha heven notanima nifi'i. Anan Jisas, fowa' naga' ea' God nafelona wapoti'. Anona nemaf owagama God okom wandafunai ma emi egafis sanda' waf aonai. Ea' dei' Jisas nagalo'mapa ma okom anama wandafunai.