1 Pita 5 - Basef Buꞌwami Godi

Ipe' agufipei ma sios pimafi epes Godi andeande'

¹ Ipe' agufipei pimafi esis Kristeni, ae' a'i efela ukup ipe'imi enda'epa petaga la'ifipa. Ae' wapoti' ae' agiliwei imafi esis Kristen. Fowa' aitu ati Krais nofa' nimanimi egawam. Ea' anona nemaf wapoti' itu elomepa ma miti nafifili lu'unai Ananinai notaga. Dei' a'ipipa basef la'ifimi na'ama a'i,

² ipe' pimafi amam nematawa God nasi'ipasi andeande' si'i amam mumafi sipsipi mumafiam. Ipe' ukup mohafel endilisi ma pimafias si'i okom Godi na'i penda'am. Ipe' penda' maol ananinai andeande', ina penda'ana ukup mopoma pefa' otamba atom, owa'. Opalef ipe'imi mohafel endilisi ma penda' maol Godi.

³ Ipe' owa' pepe si'i epes sofa' agof lu'wami ma pepe dembipei pi'ipas basef la'ifimi esis amam nematawa isima Godi ipe' pimafiasi, owa'. Ipe' pepe andeande'ma esis sitilipa sila waf ipe' panda'anai.

⁴ Ama dembinai numafi amam nematawa si'i sipsip Godi notaga nondawalap alihinama ipe', pefa' amamaga bu'wami mope andeande' la'ela'ef, agel lu'unai. Amama ina anona nemaf aom higililam, owa'. Mope la'ela'ef.

Ape' mofe' owina God noloma epes

⁵ Ea' na'ama etin ipe' amam awomipei wapoti', ipe' pinindifa ipe' pefe' owina amam amama agufumi dembemi mumafi ipe'i. Ea' pefa' waf anama pinindifa ipe' pefe' owina amam sahopepa ipe'imi pigiambama waf bu'unai. Dei' main, basef mail buk Baibeli ma'iam na'ama ma'i, “God nowa' alafuga epes isima sasombala basef sefela agof asasimi atom. Ea' anan nigiambama epes isima safe' owina enis epes ma sape so'umbil.”

⁶ Ea' dei' ipe' penda' ukup ipe'imi pefe' owina God, pepe owina pepel Ananinai. Penda'am na'ama ma maina nemaf Anan okom nie'ianai notaga, nefela agof ipe'imi ninifelipa.

⁷ Amamaga nimanimi monda'epa aopai, pese'anam mofe'ma God atona. Dei' main, Anan bu'unai la'ifinai numafi ipe' andeande'.

⁸ Ipe' pimafi alop ipe'inai pindumafuma andeande'. Satan aman aonai nautamepa ipe'inai anan si'i mafin lu'unai wandafunai laion nape aolopi. Anan nafe' noga na'i mehipa na'i niti enis epes nohas nogwa'as.

⁹ Ipe' pitu la'ifipa ma pewa' alafugahana pili'amonana. Dei' main, sahin owan ipe'isi sape etap hiagomai esis sofa' nimanimi na'ama etin.

¹⁰ God anan ofagonama waf anama nigiambamepa na'a. Ipe' pepe la'ifipa peloma Jisas Krais, amama atom dei' God nofalepa ma pepe nafifili pepel ananinai nape la'ela'ef. Ea' dei' ipe' pame' nimanimi nogota bandana. Anom nimeguf mofe'ma ea', anan Atona nonda'epa pataga bo'wepa ea' nonda'epa pitu la'ifipa si'i olaf la'ifinai nanda ipat notawa la'ifina.

¹¹ La'ifimi hiami ananimi atom la'ela'ef.

Anom basef tu'wanim

¹² Ae' a'ipa owalome Sailas nanda'ago basef amama ae'ami bandami mafe'mago ipe'. Ae' ati anan nanda' maol Kraisi andeande'. Ea' a'ipipago basef amama endilisimi God nigiambamapa na'a. Dei' pitu la'ela'ef ma amama. Anda' basef amama a'i efela ukup ipe'imi enda'epa petaga la'ifipa.

¹³ Esis amam nematawa Kristen sahin owan ipe'isi sape wambel Babiloni, God nasehe'as salomepa. Esis sasapa'ago danifela basef bu'wami mafe'mago ipe'. Nogalome ae'anai Mak wapoti' nandanifel ma ipe' ea' nasapa'ago basefa danifel ananinai ma ipe'.

¹⁴ Ipe' Kristen pendase'ama logof alupipei hipei atona etin, ama penda' waf anama ukup maimailasanai. Ae' a'i God nonda'epa opalef awanem, ipe' emi egafipa pape la'ifipa paloma Jisas Kraisi.