1 Pita 4 - Basef Buꞌwami Godi

Ape' mofa' nimanimi ma mokwaha waf aonai

¹ Krais nofa' nimanimi alop ananinai ea' ipe' wapoti' ukup motaga la'ifim na'ama etin si'i Anan. Dei' main, emi egafis ipe'isi sefa' nimanimi ma alop asasinai, esis sakwaha waf aonai.

² Ea' dei' nogota anae' ipe' ata' pape etap anae', ipe' pefe' pila okom Godi atona nahopepa pefe' pefe' petagama pega'. Ea' okom aonai nehafema waf aonai, owa'. Hapainai.

³ Fowa' ipe' pape nogota launai ea' pafe' paila waf naninani aonai esis sololama Godi ukup ma'ianai. Waf anama na'ama, waf aonai so'a waolanai, ukup mahaga magaolasanai, ukup mohafela waf aonai ea' sa' embel la'ifimi ma ukup mahaga magaol ea' sa' gwa'aimi embel la'ifimi nogota launai ea' sandatama etifigin sa' embel la'ifimi mamumami sosambala basef Godi ma sanda' waf aonai, sanda' lotuma god baso'omunai. Nogota pafe' paila waf anama dei' hi'alana.

⁴ Dei' epes isima sololama Godi gegelalasis sati ipe' owa' pendao'oma pelomas penda' waf anama hianai aonai. Na'ama dei' sa'ipipa basef awami findiwama ipe'.

⁵ Anan nandandombam nowaloga epes isima sapani soloma saga'i. Esis anona nemaf sowalapa waf aonai esis sanda'anai sogwamana basef Anan ama waf anama ofagena esis sanda'anai.

⁶ Amama atom fowa' basef bu'wami Godi mafe' matagama epes isima saga'i wapoti'. Ama God nowaloga esis si'i anona nemaf nowaloga epes hiesi hi'ilas. Basef amama bu'wami mafe' matagama esisa sope namis ambagof asasimi si'i God nape namona.

Ape' monda' maol andeande' mumafi presen amamaga bu'wami God nase'apam na'ai

⁷ Nogota amamaga amama ma'i hi'ilamanai nafi'i felefele'. Amama atom ipe' ukup mope andeande' ea' pimafi alop ipe'inai andeande'ma ipe' la'ifipa ma penda' beten.

⁸ Basef lu'wami mape mali'ma basef hiami amama. Ipe' ukup mimila sahin owan ipe'isi la'ifipa endilisi. Dei' main, waf anama ukup mimilasanai nase'ala waf hianai aonai ea' nikila' waf hianai hi'alana.

⁹ Ipe' pi'i aho'ma pigiambama enis alupusi deindei'as sifi'i ifagw ipe'imi pimafias andeande'. Ipe' ina opalef aoma esis, owa'.

¹⁰ Ipe' hipei atona etin pefa' presen naninani bu'unai hianai Ambal Bu'unai Godi nasi'ipanai. Ea' pimafi presen anama ipe' atona etin andeande' ma pigiambama esis sahin owan. Pimafiana na'ama.

¹¹ Emi egafis sowalapa basef, esis si'iam si'i sawalapa basef Godi atom. Ea' emi egafis sonda' maola sigiambama enis epes, esis sonda'ana pepel anama God nase'asanai. Ama epes hiesi siti maol anama hianai bu'unai sondanifel sefela agel Godi ma Jisas Krais atona. Agel lu'unai noloma pepel nafifili hianai Ananinai atona la'ela'ef hihif. Endilisi etis.

Ape' mofa' nimanimi moloma Jisas

¹² Ipe' Kristen alupipei endilisi, anom hiahaom meagwambipei mi'i motagama ipe', ipe' ina pi'i amama anom amamaga awami matagamepa pehafel gegelalasipa ma amama, owa'. Nimanimi amama ipe' pefa'am paloma Krais.

¹³ Ea' ipe' pendanifel pefa' nimanimi amama. Ama anona nemaf agel lu'unai ananinai noloma nafifili ananinai notaga, nemaf anama ipe' pendanifel endilisi.

¹⁴ I'i enis siti ipe' pitu la'ifipama Kraisa si'ipipa basef awami findiwaimi, andeande', ipe' pendanifel. Dei' main, nimanimi amama mihi'ambepa Ambal Bu'unai Godi nafifili dei' napaipa.

¹⁵ Ae' andaiwa' endilisi ma enin epen ipe'ini neha enin epen nega' o nenda' wal o nenda' waf aonai naninani o ni'i nepe nilinili' ma maol enis epesi, owa'. Ae' andaiwa'ma enin epen ipe'ini nenda' waf aonai ma sose'ana nimanimi. Amama owa', aom.

¹⁶ Ea' i'i ipe' pefa' nimanimi ma pataga Kristen, andeande'. Ipe' ina ambagof aoma amama pefa'am, owa'. Ipe' pinifela Goda pepan epes Kraisi.

¹⁷ Nogota anama mataga ea' ma dei' God nowaloga epes hiesi Ananisi ma basef lu'wami. I'i God nili' nowaloga ape' mili', anona nemaf nigi' nowaloga epes isima sosambala basef bu'wami Ananimi sope si'imama? Esis sofa' nimanimi lu'wami.

¹⁸ Si'i basef Godi mail Baibeli ma'iam ma'i, “I'i ahifima God nofa'ai epes bu'wasi sotanimani, dei' epes isima sowa' alafugaha Godi soloma isima sanda' waf aonai anona nemaf sope si'imama? Esis sope awes sofa' nimanimi lu'wami.”

¹⁹ Ea' emi egafis sofa' nimanimi ma saila okom Godi, isima sonda'am na'ama. Esis sope sonda' waf bu'unai atona ea' soso' esis sofe'ma God numafias. God nanda' epes hiesi sataga sapan. Ea' naila basef Ananimi andeande' la'ela'ef.