1 Pita 2 - Basef Buꞌwami Godi

Dembinai Jisas Anan si'i owap ambal namunai napainai

¹ Ipe' pendombasa ipe' andeande' ma waf hianai baso'omainai pa'i malogof biamipei ukup kowalipamami maloma waf anama pi'i basef awami alafugaha enis epes. Waf anama aonai, ipe' pekwahona.

² Ipe' pepe ukup mila basef Godi si'i awasi ata' solas dambaisi ukup maila sa' nomambeh atomi. Ipe' la'ela'ef eap nese'epama pi'i basef Godi atom bo'om andeande', owa' somboma anom amamaga awami mealomami. Basef amama manda'epa dembepa la'ifipa ma bale'ef ipe'inai bo'ona. Penda'am na'ama ma anona nemaf God nofa'epa pitanimani pepe andeande'.

³ Endilisi, ipe' pali' pegawa Dembinai ea' pegawana ma waf Ananinai bu'unai endilisi.

⁴ Anan si'i owap ambal namunai napainai. Ipe' pifi'mai Anan, owap anama esis amam nematawa sandaiwa'mana sanda'ana sagwasi'ana na'oh. Ea' God nosahe'ana na'i owap anama bu'unai endilisi.

⁵ Ipe' wapoti' si'i owah ambal namunai napaimi. God nape nanda'epa la'ela'efa pataga bo'wepa si'i anona ipat bu'unai ananinai dei' nape nanda'anai. Ama ipe' pepe epes bu'upei penda' maol pindalalima God. Ea' pindalali pese'ana ukup ambagof ipe'imi mofe'ma Anan. Ipe' pindalali penda'am na'ama, okom Godi na'i amama andeande'ma maol anama Jisas Kraisi nanda'anai.

⁶ Dei' main, basef fowa' God na'iami mail buk Baibeli ma'iam na'ama ma'i, “Peme', Ae' anda' anona owap lu'unai na'oh etap. Owap anama bu'unai satalona moni lu'unai nape nali'i ma nonda' ipat la'ifina. Dei' ae' ambe' owap anama na'oh wambel lu'unai Saion. Emi egafis sombale'efa Anan, esis ina anona nemaf ukup aom, owa'.”

⁷ Owap anama bu'unai endilisi agel lu'unai ma ipe' pembale'efanai, ea' epes isima owa' sombale'efanai anom basef mapomas ma'iam na'ama ma'i, “Owap anama amam mala' ifagwi mandaiwa'mana melefatana na'ihi, dei' nandamboma nataga owap nape nali'i nanda' ipat anama la'ifina.”

⁸ Ea' anom basef Godi wapoti' ma'iam ma'i, “Anona nemaf owap anama nonda' enis epes sowa.” Esis sondasisi'ip sowa. Dei' main, esis ina same' basef Godi sailam, owa'. Sosambalom si'i fowa' God nali' nandandepasa sondasisi'ip sowa.

Ape' mape wambota amam nematawa Godi

⁹ God nosahe' ipe' ea' pape epes Ananipei. Ipe' panda' maola dembinai king Jisas Krais pendilalimana si'i pris. Ea' pape amam nematawa Godi etipa epes hiesi ganima hiagoma. God nosahe'epa ea' Ananipei etipa ma pewalapa pepel bu'unai naloma agel lu'unai Ananinai. Anan nofalepa nanda'epa pakwaha owamb pafi'mai nafifili bu'unai Ananinai.

¹⁰ Fowa' ipe' ata' pape epes falafipei, ea' dei' pape epes Godi etipa. Fowa' ipe' ina pegawa God nati uwahipipa ma dei' pape andeande', ata' owa'. Ea' dei' pegawa God nati uwahipipa nagiambamepa pape andeande'.

Ape' mope si'i amam manda' maol etina mape owina God

¹¹ Ipe' alupipei ae'ipei endilisi, ae' a'i i'ipipa anom basef la'ifimi, ipe' si'i epes anona wambelipei pafi'i pailas pape nogota bandana ma etap anae'. Dei' ipe' pewa' alafugaha waf aonai ukup awami mohafamanai, na'i nopa' noloma ambagof ipe'imi.

¹² Ipe' penda' waf bu'unai andeande' ma naep esis sololama Godi. Penda'am na'ama ma maina nemaf esis si'i basef awamima ipe', atuwasi siti waf bu'unai ipe' panda'anai ea' sinifela waf anama si'i bu'unai. Penda'am na'ama, ea' nemaf akutainai Anan niefi'ianai ma esis sefela agel Ananinai lu'una.

¹³ Ipe' hipei pefe' owina agufumi dembemi hiami mape dembemi ma etap anae'. Pepe owinam pila waf Dembinai. Pepe owina dembinai gavman nali'ma esis Romi.

¹⁴ Amam gavman dembemi wapoti', God atona nanda'am mapoma moha epes isima sanda' waf aonai sofa' nimanimi, ea' mefela agofa isima sanda' waf bu'unai.

¹⁵ Okom Godi na'i ipe' penda'am na'ama. Anan na'i ipe' penda' waf bu'unai ma nesopama malogofa epes isima ukup mahaga magaoli sa'i basef gawa a'anai.

¹⁶ Ipe' ina agof a'epa pape owina enis epes, owa'. Ipe' pape wafifipa ea' pape owina God atona. Ipe' pegawa amama pepe andeande' si'i pape wafifipei. Ea' ipe' ina pembaso'am pewalo' waf anama sape wafifisanai bu'unai nese'ala waf aonai pandambaho' panda'anai, hapainai. Ipe' pepe andeande' si'i pape panda' maol Godi.

¹⁷ Ipe' pendanifel pefela agofa epes hiesi penda'as andeande'. Ea' ukup mimila esis Kristen sahin owan ipe'isi. Ipe' umbamehepama Goda penda' lotumana andeande'. Ea' pefela agel king gavman dembinai nali'ma esis Romi.

Ape' mila waf Kraisi mofa' nimanimi

¹⁸ Ipe' panda' maola enis epesi pefe' owina dembemi amama ipe'imi ma maol hianai. Ipe' peme'am ea' umbamehepamam pefela agof amamumi. Ipe' ina penda'am na'ama ma amam bu'wami manda' waf so'umbilinai atom, owa'. Penda'am na'ama ma anom manda' waf aonai wapoti'.

¹⁹ God anona nemaf nofalo'mepa ma amama i'i ipe' pitu la'ifipa pila okom ananinai ma nimanimi esis sese'epam etini.

²⁰ Ea' i'i ipe' penda' waf aonai sohepa ma waf anama ma pitu la'ifipa pitilis, anona nemaf ipe' pefa' maim bu'wami ma waf anama? Owa'. Ea' i'i ipe' penda' waf bu'unai ma esis sonda'mepa waf aonai, God okom ni'i waf anama ea' nofalo'mepa ma amama.

²¹ God nofalai ipe' ma pila waf anama pefa' nimanimi ma waf bu'unai ipe' panda'anai. Dei' main, Krais atona name' nimanimi ma nagiambamapa. Ea' nihi'ambepa waf anama bu'unai ananinai ma pilana.

²² “Anan ina nanda' anona waf aonai, owa'. Ina na'i anom basef baso'maimi ma malogel ananinai, owa'.”

²³ Nemaf anama esis sanda'ana findiwana Anan ina nagwamasam nanda'as findiwas, owa'. Nemaf anama Anan nefa' nimanimi lu'wami Anan ina naumbelis, owa'. Anan naso' Anan atona hi'alana nafe'ma lagof Aman anama nowaloga epes andeande'i.

²⁴ Krais anan atona naga' nail lawag usi'inai tu'wanainai ea' nofa' waf aonai ape' manda'anai ma alop ananinai. Anan nanda'ama ape' mope si'i saga' sakwaha waf aonai hi'alana. Ama ape' mope namepa ambal namunai nupaipa mila waf bu'unai hianai.

²⁵ Esis sahambombaga alop ananinai sanda'ana melegw matomana, amama atom dei' nanda'apa bo'opa wapoti'. Fowa' ipe' pelolama eaf si'i sipsip owa' sumafiami. Ea' dei' ipe' petanima pafi'i ma Dembinai numafi ipe' paloma ambagof ipe'imi andeande' si'i anona numafi sipsipi numafiam andeande'.