1 Pita 1 - Basef Buꞌwami Godi

¹ Ae' Pita anda' maol Jisas Kraisi, Anan nasahe'e aposel. Ae' anda'ago basef amama mafe'mago ipe' amam nematawa anan nosahe'epa ea'. Ipe' epes Godi pakwaha wambel ofagama pafe' pailas pape etap hiagoma wenifina biefina agufunama Pontus naloma Galesia, Kapadosia, Esia Bitinia.

² Fowa' gani Ahalomapa God nogawepa nosahe'epa ea' Ananipei. Ambal Bu'unai Ananinai atona nanda'epa pataga Ananipei etipa bo'wepa andeande'. Anan nanda'epa na'ama ma pila waf Jisas Kraisi Anan nasa'opepa esimbel ananimi pataga bo'wepa. Ae' a'i God nigiambamepago na'a nonda'epa petaga la'ifipa ma opalef ipe'imi mope awanema pepe si'ipa la'ela'efa waf anama.

Ambal namunai ma pe bu'unai nape nohafapa heven ilif

³ Ape' mefela agel Godi, Anan God Ahalomana Jisas Krais Dembinai ape'inai. Anan okom lu'unai nainailapa nati uwahipipa endilisi. Ea' nafela Jisas Krais nohafel hi'agif, amama atom God nanda'apa mataga dambaipa ma mope namepa mogawa endilisi anona nemaf Anan nofa'apa motanimani.

⁴ Ea' dei' mape mohafana anona nemaf nose'apa amamaga bu'wami endilisi. Amama bo'om endilisi, ina anona nemaf aom folo'olam hi'ilam, owa'. Amama mape bo'om la'ela'ef, God nambe'am ma'oh mohafa ipe' otaga ilif.

⁵ Bale'ef ipe'inai atona God nahopepa ma anona nemaf nofa'epa petanimani. Anan na'i notanima nofa'ipei, anona nemaf notaga nondawalap alihiguma nemaf akutainai.

⁶ Ipe' pandanifel endilisi ma nemaf anama, ea' dei' nogota ata' bandana hiahaom mamumami meagwambipei matagamepa ma mase'epa nimanimi.

⁷ Nimanimi amama matagamepa ma God nowaloga bale'ef ipe'inai nonda'ana notaga bo'ona la'ifina. Ipe' ukup mopoma otamba gol, amama buwami satalom otamba lu'wami. Ea' bale'ef ipe'inai nikila' gol amama bo'ona endilisi. Gol amama anona nemaf higililam, ea' esis saofam nifa motaga bo'om. Bale'ef ipe'inai na'ama etin anona nemaf notaga bo'ona la'ifina ma nimanimi amama meatagamipei. God nowaloga bale'ef ipe'inai ma nondawalap notaga bo'ona la'ifina. Ama anona nemaf Jisas Krais notaga nondawalap alihina, God nese'epa agof lu'wami moloma basef bu'wami ninifalipamami ma agel lu'unai.

⁸ Ipe' ina dei' pati Jisas, ea' pembale'efana endilisi. Danifel anama bu'unai endilisi nafi'i ilifi nikila' danifel hianai etap anae'. Ea' epes ina la'ifisa sowalapana sa'iana malogof asasimi, owa'.

⁹ Dei' main, ipe' pape pembale'efana dei' bale'ef anama ipe'inai nawalapa amamaga dei' pape pefa'am la'ela'ef. Amamaga amama na'ama. God nofa'epa nokwahomepa waf aonai ipe' panda'anai petanimani.

¹⁰ Anona nemaf God nofa'apa motanimani, amama fowa' amam profet ma'i basef amama ma Anan dei' nagiambamapa na'a mape andeande'. Amama amam ma'i anona nemaf motagama ipe', God nandandepepa ma pefa'ami. Ea' manda' maol la'ifim ukup mapoma basef amama ma'i anona nemaf anan nofa'apa motanimani.

¹¹ Ambal Bu'unai Ananinai nape nomona amam na'i basef alihima anona nemaf Krais nofa' nimanimi hiami mamumami ma nofa' agel lu'unai. Ea' amam magolopa basef Godi mandahahali'ma ma'i, “Maina nemaf amama mifi'i motaga?”

¹² Ea' God nihi'ambamam ea' amam ina manda' maol magiambama amam atoma basef amama, owa'. Manda' maol magiambama ipe', ma'i basef amama ma amamaga bu'wami anona nemaf meatagai. Ea' dei' amam mawalipipa basef bu'wami Godi ma'ipipa amamaga amama atom. Ma'ipipa ma pepel Ambal Bu'unai Ananinai nisila'i otaga ilif. Amam profet amama, ina amam atom ukup ma'i basef amama mogawam, owa'. Amam ensel wapoti' ma'i mogawam.

God nofalapa ma mope bo'opa andeande'

¹³ Ea' dei' ipe' pendondomba ukup ipe'imi ma penda' maol bu'unai, pimafi alop noloma ukup ipe'imi pepe andeande'. Ea' pembale'efa God pepe ukup bo'om pehafa Jisas Krais anona nemaf notaga nondawalap alihinama nigiambamepa na'a nofa'epa petanimani.

¹⁴ Ipe' pila waf Godi si'i awasi saila basef mamasasi. Fowa' ipe' gawa a'epa ata' pape waf anama aonai ukup mase'epa. Dei' ipe' ina ata' pila waf anama wapoti', hapainai.

¹⁵ God nofala ipe', Anan bo'ona andeande'. Ea' ipe' wapoti' pepe na'ama etin si'i Anan, pepe ananipei etipa andeande' ma fe' pe anama ipe'inai hi'ilana.

¹⁶ Dei' main, Baibel na'iam na'ama na'i, “Ae' ape andeande' bo'awe. Ea' ipe' wapoti' pepe Ae'ipei etipa bo'opa andeande'.”

God natalepa maol bu'unai lu'unai endilisi

¹⁷ Ipe' pefala God pa'i Anan “Ahalomapa”. Ahalomapa anama anan ina okom napoma agof ape'imi lu'um so'um ea' nawaloga ape', owa'. Anan nawaloga ape' na'ama etina ikwaf bu'unai atona ma waf ape' manda'anai. Amama atom ipe' umbamehepama God penda' lotumana pefe' bo'opa nimeguf hiami ipe' pailam pape etap anae'.

¹⁸ Ipe' pegawa fowa' ipe' ata' pape panda' waf aonai wafinai pefa'ana bafasepa ehasepa ipe'isi. Ea' dei' God natalipa natagahipa ma waf anama aonai. Anan ina natalipa ma amamaga anona nemaf motaga aom higililam si'i otamba bu'wami siliwa gol, owa'.

¹⁹ Anan natalipa natagahipa ma pepe wafifipa ma esimbel Kraisi atom. Esimbel amama bo'om lu'um endilisi. Krais naga' si'i fowa' gani esis saha sipsip noganai sondolalima God. Sipsip anama bo'ona endilisi ina anona melet natomana, owa'. Anan bo'ona endilisi.

²⁰ God owa' ata' nonda' etap anae' notagae, Anan nandandepa Krais ea' ma naga' si'i sipsip anama. Nimeguf amama hiami dei' magi' matagai, Anan nataga nandawalap alihina ma nagiambamepa.

²¹ Anan atona nagiambamepa dei' pembale'efa God. Anan nafela Krais nohafel hi'agif nase'ana agel lu'unai Anan. Amama atom dei' pembale'efa God atona pegawa endilisi anona nemaf anan atona nofa'epa pitanimani.

Ape' ukup mimila sahin owan ape'isi endilisi

²² Ipe' paila basef amama, amama atom dei' manda' opalef ipe'imi bo'om. Ea' dei' ipe' panda' waf anama ukup maimailasanai panda'ana endilisi. Ipe' ina pembase'am alupupei ma alop atona, owa'. Dei' penda' waf ukup maimailasanai la'ifipa pikila' fowa' panda'anai. Ea' ukup mimila Kristen hiesi pindagigiambanama peloma esis.

²³ Dei' main? Ipe' ina pataga dambaipa si'i awasi sataga mamasas etapasi saga'i, owa'. Basef Godi atom Anan nanda'epa pataga dambaipa. Basef amama ambal namunai napainai nape namuna la'ela'ef, dei' ipe' pataga dambaipa ea'.

^24-25 Si'i Baibel na'iam na'i, “Amam nematawa hiesi si'i otalef ea' sosaf asasinai si'i afis mataga etap. Otalef alimi afis wapoti' mandala'of mowa, ea' basef Dembinai mape la'ela'ef.” Basef amama basef bu'wami esis sawalipipami.