1 Korin 9 - Basef Buꞌwami Godi

Pol nandanifel ma owa' nofa' anom amamaga ma maol aposel nanda'anai

¹ Dei' ae' a'i ihali'ipa efela ukup ipe'imi. Ipe' pa'i ae' ape wafifiwi ape aposel ati Dembinai Jisas ea' o owa'? Ae' anda' anama atona dei' ipe' pataga Kristen, o owa'? Endilisi.

² I'i enis epes ukup ma'i ae' ina aposel, hapaisi. Ipe' wila. Ipe' pembale'efa Dembinai pape la'ifipama Anan. Amama atom dei' ipe' etipa si'i anona ikwaf nihi'ambepa pegawa ae' ape aposel anda' maol Dembinai.

³ Ea' anom epes mape manifa ae' ma'i ae' endilisiwei o falafuwei. Ea' agwamama basef na'ama.

⁴ Endilisi afa' aposel andeande'ma ofa' gwa'aimi maima maol afa' wanda'anai.

⁵ Ea' andeande'ma oso' nematawa Kristen ofe' olomawa si'i anom aposel maloma amam owapana Dembinai Jisasi maloma Pita manda'am.

⁶ Ina andeande'ma ae' eloma Barnabas atofa onda' maola ofa' otamba afa'imi, ea' enis epes ipe' etipa pigiambamas pimafiasa otamba. Na'ama owa'.

⁷ Maina aman nanda' maol soldia anan atona notala gwa'aimi maim ananimi? Ea' emi epen nawa gwa'aimi aof ama anan ina nofa' gwa'aimianai? Emi epen nimafi bulmakau ma anan ina nea' nomagofa amam? Owa'etin.

⁸ Ae' aila ukup epesi a'iam na'ama? Owa'. Mi'uli God fowa' naso' Mosesanai na'iam na'ama etin.

⁹ Moses nanda' basef mape mi'uli Godi ma'iam na'ama ma'i, “Bulmakau manda' maol mafa'asa olelemb witim mandilamam ma'i mea' anom, ipe' ina pesopama malogof amamumi, owa'.” Ipe' pa'i God okom napoma amam bulmakau atom a' amon? Owa'etin.

¹⁰ Anan okom na'i ape' wapoti'. Basef amama ma'iama ape' atepa. God okom na'i waf anama. Epen nawa nelemb etap ananinai neloma emi epen nela gwa'aimi maof ea'i, anan okom na'i opaf ananinai ma nefa' amamaga tu'wanima maol anama.

¹¹ Afa' wanda' maol Godi wape na'ama etin. Afa' wawa amamaga bu'wami Ambal Bu'unai Godi nase'afami la'afena ipe'. Ea' ipe' wilama pese'afa anom amamaga pigiambama alop afa'inai ma amama ina ahifima ipe', owa'.

¹² Ipe' pase'am amamaga anom amam mawalipipa basef Godi, ea' afa' dei' wape wa'imama? Afa' wapoti' pese'afa amamaga ipe'imi, andeande'. Dei' main, afa' wali' wanda' maol wagiambamepa. Ea' amamaga amama afa' wa'i aho'ma ofa'ami, afa' ina ofa'am, owa'. Fowa' dambadamba afa' wali' wafe'mago ipe' wafi'i wafi'i wataga dei', afa' wandaiwa'ma owahopa eafa basef bu'wami Kraisi. Amama atom afa' wandaiwa'ma ofa'am. Amama atom dei' nimanimi hiami matagamafa.

¹³ Dei' ipe' ukup mi'i anom basef. Amam manda' maol ipat lu'unai Godi mofa' gwa'aimi ipat anama. Ipe' pegawa amam manda' maola balata anama sondolalima mafisanai ma God, amam wapoti' mofa' mafis to'wanima balata anama.

¹⁴ Ea' na'ama etin Dembinai nanda' mi'uli anama nape. Emi amam mawalapa basef bu'wami Godi, amam ata' mofa' amamaga ma esis amam nematawa sofa' basef bu'wami ma sigiambama alop amamunai.

¹⁵ Ea' ae' ina efa' anom amamaga amama, owa'. Dei' wapoti' ina anda' basef amama ma i'ipipa ae' andeande'ma efa' anom amamaga ma ipe', owa'. Andeande'ma ae' ili' ega'. Ae' andanifel anda' maol Godi agiambamepa ea' ina efa' anom amamaga amama. Andaiwa'ma anin epen netofa danifel ae'anai ma efela agel ae'anai ma waf anama, owa'.

¹⁶ Ea' ae' ina efela agel ae'anai atona awalapa basef bu'wami Godi, owa'. Ae' owa' anona eafa esopama malogela i'ipasam, owa'. Okom ae'anai nahafel endilisi ma a'i i'ipasam etin. I'i ae' owa' ewalapa basef amama bu'wami, na'ama God nese'e nimanimi lu'wami.

¹⁷ I'i okom ae'anai atona enda' maol anama Ananinai, owagama efa' otamba ma maol anama. Owa'etin. Ae' owa' anona eaf, anda'am etin. Dei' main, anama anona maol God nase'eana ae' anda'anai.

¹⁸ Owagama efa' maima anama anda'anai? Ae' efa' amamaga amama bu'wami na'ama. Ae' anda' waf anama bu'unai atona. Amamaga ae' wila ma efa'ama maol anama, amama ina efa'am, owa'. Ae' awalapa basef bu'wami Godi ase'asam na'a. Ae' ina efalasa amamaga otamba maima sese'e si'i mi'uli Godi na'iam, owa'.

Pol nafe' owina amam nematawa hiesi ma nigiambamas

¹⁹ Ae' ina anda' maol ape owina anin epen, owa'. Ae' ape wafifiwi. Ea' okom ae'anai atona anda' ae' ape si'i afe' owina epes hiesi ma efa'ai hiesi sondahama ikwafa pepel ae'anai sefe'ma God.

²⁰ Amama atom dei' naep esis Judai ataga si'i Juda, ma efa'ai enis Juda. Ae' ina afe' owina mi'uli God naso' Mosesanai, owa'. Ea' naep isima sape owina mi'uli anama, ae' wapoti' afe' owina mi'uli anama ma efa'ai epes isima sefe'ma God.

²¹ Ea' naep epes isima sololama mi'uli anama ina Judaisi, ataga si'i epes isima sololama mi'uli anama ma efa'ai epes isima sefe'ma God. Ea' ae' ina okom nase'e ma mi'uli Godi, owa'. Dei' aila mi'uli Kraisi.

²² Ama naep epes isima ina la'ifisi, ataga si'i esis ama efa'ai epes ina la'ifisi. Ae' ataga si'i efa' waf epes hiesi endondomba iaguf hiami ma efa' enis epes sotanimani.

²³ Ae' anda' maol anama ma efela agel basef bu'wami Godi ma anona nemaf efa' amamaga amama bu'wami epes isima saila basef amama sofa'ami eloma enis epes Godi wapoti'.

Ape' masagih mehipa mefa' amamaga bu'wami

²⁴ Ipe' pegawa epes sasagih sandahawaipama etini hiesi sasagih safe' ea' etitin nikila'as nefa' amamaga bu'wami. Ipe' pegawa amama o owa'? Ea' ipe' wapoti' pesagih mehipa pefa' amamaga amama bu'wami.

²⁵ Emi egafis sa'i sisagih sikila' ikwaf anama, sanda' maol la'ifinai endilisi sandameme'ma alop asasinai nimeguf hiami. Epes isima sanda'am na'ama ma sofa' amamaga bu'wami kwaie'um mape nogota bandanai. Ea' ape' Kristen manda'ama mefa' amamaga bu'wami mape la'ela'ef hihifi.

²⁶ Amama atom ae' asagih. Ea' ina ati ganigani, owa'. Naep mati ikwaf atona asagih afe' mehip ikila' hiesi ataga ikwaf anama ma efa' amamaga bu'wami. Ae' ape si'i anona aman nanda' boksen napa'i, ina nakwaha lagof mafe' ganigani noha uf atona, owa'.

²⁷ Ae' la'ifiwi aha alop ae'anai nataga la'ifina nape owina okom ae'anai. Na'ama ewalapa basef bu'wami ma enis epes, ea' owagama ae' ina efa' amamaga bu'wami, owa'.