1 Korin 8 - Basef Buꞌwami Godi

Mafis saham sondolalimama god baso'omunai

¹ Dei' ae' a'i i'i basefa mafis saham sapefelam god anama baso'omunai. Endilisi, “Ape' hiapai mogawa”, si'i ipe' pa'iam. Gawa anama atona wafinai nafelai waf safela agof asasimi atom. Ea' i'i ape' ukup mimila sahin owan, amama migiambamapa motaga Kristen la'ifipai.

² I'i anona aman okom ni'i anan gawainai, owa'. Anan owa' ata' nogawa andeande'.

³ Ea' emi epen okom nainaila Godi, God nogawa epen inima ea' ananinai atona.

⁴ Waf sa' mafis saham sondolali saso' god baso'omunai ina waf endilisinai, owa'. Waf anama ikwaf atona wafinai. Ina god baso'omunai nape, owa'. God endilisinai anan atona nape.

⁵ Endilisi, amamaga hiami sofalam sa'i, “Dembami.” I'i endilisi ma amam amama sofalam sa'i, “god baso'omunai” mope ilif etap,

⁶ ea' hapaimi. God ape' manda' lotumanai atotona nape. Anan God ahalomapa, anan atona ofagonama amamaga hiami. Anan ofagema ape' mape etap anae', manda' maol ananinai atona. Ea' Dembinai atotona nape, anan Jisas Krais. Lagel ananinai atona dei' God nanda' amamaga hiami mataga mape. Krais atona nanda' ape' mataga mape dambaipai.

⁷ Ea' enis epes ina sagawa amama, owa'. Epes isima fowa' saila god baso'omunai. Ea' dei' sa' mafis amama sondolali saso' god baso'omunai, ukup asasimi mapoma mafis amama sa'i, “Amama endilisimi,” ea' sa'am. Ea' basef mape opalef asasimi nomon ma'iami mihi'amba esis sanda' waf aonai ea'. Dei' main, esis ina ukup matamea andeande' sa'am, owa'.

⁸ Ea' gwa'aimi amama ina mofa'apa mefe' felefe'ma God, owa'. I'i ape' mundaiwa'ma gwa'aimi amama, ape' ina nambimb mope awepa ma naep Godi, ea i'i mea' mafis amama, ape' ina nambimb motaga bu'upai mikila' fowa' mape, owa'. Ape' mape wafifipa ma mi'uli anama fowa'inai na'i gwa'aimi amama.

⁹ Ea' ipe' pindumafuma andeande'. Na'ama amamaga amama ipe' pape andeande' panda'ami monda' epes isima owa' la'ifisi sowa ma waf aonai.

¹⁰ Ine' epen negawai, i'i nefe' ipat anama sanda' lotuma god baso'omunai nepe nea' gwa'aimi, ma enin epen okom ananinai owa' la'ifinai ma bale'ef ananinai nitilina. Atuwasi nefela okom ananinai nea' gwa'aimi amama saso' godami, o owa'? Ape' ina mogawana.

¹¹ Ine' okom na'i epen inima bale'ef ananinai ina la'ifina ma Krais naga' nofa'an netanimani. Na'ama gawa ine'inai nenda'ana newa ma waf aonai.

¹² Ukup enis sahin owan alupusi ina la'ifim, owa'. I'i ipe' penda' waf anama aonai pehambombaga bale'efa ukup asasimi, ipe' panda' waf anama ma Krais atona.

¹³ Ea' i'i gwa'aimi maim monda' alupunai ae'anai newa ma waf aonai, ae' ina ata' ea' mafis amama wapoti', owa', hapaimi. Na'ama enda' enin newa ma waf aonai.