1 Korin 7 - Basef Buꞌwami Godi

Waf sandaso'amainai

¹ Dei' a'i egwamepa basef amama pahali'iami panda'am mafi'i. I'i anona aman owa' noso' ano'w nemata'wi, andeande'.

² Ea' waf naninani aonai ma so'a waolanai nape. Ea' dei' andeande'ma amam nematawa hiesi atona etin sondase'ama deindei.

³ Alop amani akwa'w waulu'mana kumafiana. Aman ina nonda'imana ni'i ananinai, owa'. Ea' na'ama etina alop waulu'manai, alop anan waulunama'w akwa'unai. Akwa'w wapoti' ina kunda'imana kwi'i akwa'unai, owa'.

⁴ Nemata'w ina kope dembe'wi kumafi alop akwa'unai, owa'. Aman akwa'unai numafiana. Ea' na'ama etina aman ina nope dambenai numafi alop ananinai, owa'. Akwa'w waulu'mana kumafiana.

⁵ Ipe' bipa pandase'ama ea' anan ina newa' alafuga akwa'w nonda'ima alop ananinai, owa'. Ea' akwa' wapoti' ina kowa' alafuga anan, owa'. Ea' i'i ipe' ukup mope etifima pihi'ama alop nogota bandana ma penda' beten, ipe' pi'i aho'ma penda' beten endilisinai. Ea' penda' alop nondaloma wapoti'. Na'ama ukup mose'epama pimafi alop andeande' ea' Satan nogwambepa penda' waf aonai.

⁶ Basef amama ae'ami ma amam nematawa sandaso'ama mape na'ama. Ea' basef amama ina la'ifima pilam la'ifipa, owa'. Amama basef kwaie'um a'ipipam agiambamepa.

⁷ Ae' okom na'i ipe' amam nematawa hipei pepe si'i ae' Pol apan, owa' eso' nemata'w. Ea' God nase'as amamaga bu'wami presen mandandas deindei'. Anona anona presen, anona anona presen.

⁸ Ea' esis amam nematawa owa' seandaso'amai saloma nematawa alifiwai amam maga' makwahowa wapani, amama na'ama. I'i ipe' pepe etin si'i ae', andeande'.

⁹ Ea' i'i owa' la'ifipama pepe andeande' pimafi opalef moloma alop ipe'inai andeande', pendase'ama. Waf ipe' pandaso'amainai, anama andeande' nikila' waf ukup mohafel la'ifipa ma waf aonai so'a waolanai.

^10-11 Ea' esis amam nematawa sandaso'ama ea'i, ae' a'ipasa mi'uli anama. Anama ina mi'uli ae'anai atona, owa'. Mi'uli anama Dembinai. Ano'w nemata'w ina kokwaha aman akwa'unai, owa'. Ea' akwa'w kwi'i kokwahona, kope na'a. I'i owa', kotanima kofe'ma anan wapoti' kolomana kope okom etifina. Ea' anona aman wapoti' ina nokwaha waulu'mana anani'wi, owa'.

¹² Ea' dei' a'ipa ipe' na'ama a'i. Basef amama ina basef Dembinai, owa'. Amama dei' a'ipipa na'ama a'i i'i fowa' esis bias owa' ata' sombale'efa Krais ma sandaso'ama sili', ma dei' anan nagi' nembale'efa Kraisa akwa'w kwi'i aho'ma kose'ana kolomana kope, anan ina nokwaho'w owa'.

¹³ I'i akwa'w ato'w dei' kugi' kombale'efa Kraisa nase'akw, ma ni'i a'e nope noloma'w, akwa'w ina kokwahona, owa'.

¹⁴ Dei' main, aman owa' nombale'efa Kraisi nape la'ifina naloma waulu'mana kombale'efa Krais, anan nataga andeande' si'i God nandandepana ea'. Ea' nemata'w owa' kombale'efa Kraisi kwape kwaloma anan nombale'efa Krais, akwa'w kwataga andeande' si'i God nandandepa'w ea'. I'i owa', anona nemaf sola awasi, ina anona nemaf sotaga bo'wes, owa'. Ea' dei' sape andeande' si'i God nandandepas ea'.

¹⁵ Ea' emi epen owa' nembale'efa Kraisa ni'i nekwaha waulu'mana o waulunama'w, enin nefe'. I'i waf anama notaga na'ama ma esis isima ipe'isi sahalomepa o owalomepa aman nemata'w, esis ina ata' la'ifis sape si'i sanda' kalabus, owa'. God nofalapa ma mila wafa opaf awanena.

¹⁶ Nemata'w, ine' anona nemaf la'ifinama nigiambama waulunamena notaga Kristen o owa'? Amama ine' owa' neagawam. Ea' ine' aman wapoti', anona nemaf la'ifinama nigiambama waulu'mena ine'ikwi kotaga Kristen o owa'? Amama ine' owa' neagawam.

Maina maol manda'ana nemaf God nofalapa mataga Ananipei, ape' monda' maol anama atona

¹⁷ Maim opeh bu'wami Dembinai naso' enin epen, enin nepe la'ela'ef nenda' amama atom nali' nanda'ami. Ae' a'ipas mi'uli anama etina esis Kristen hiesi sios sape wambel hiagoma.

¹⁸ A'i anona aman amam mali' matopa'mana alop ananinai ma God dei' nofalana? Wila' anan ina nofana melet anama alop ananinai wapoti' nombaho'ana, owa'. Ea' aman emi ina meatopa'mana alop ananinai ma God dei' nofalana, amam ina motopa'mana alop ananinai, owa'.

¹⁹ Waf matopa' alopanai naloma waf owa' meatopa' alopanai wapoti' falafunai atona. Ea' waf saila mi'uli Godi anama waf endilisinai.

²⁰ Ipe' papoma maina maol bu'unai God dei' nofalipei, pepoma anama atona la'ela'ef.

²¹ I'i ipe' agof a'ipei panda' maol pape owina enis epes ma dei' God nofalipei, ipe' ina ukup aoma amam, owa'. Ea' i'i anona eafa pekwaha maol anama pepe wafifipa, na'ama andeande' pekwahona.

²² Dei' main, emi egafis agof a'as sanda' maol sape owina enis epes, dei' epes isima Dembinai nakwahomas waf aonai sepe wafifis ea' Ananisi etis. Ea' na'ama etina epes sape wafifis owa' seape owina enis epes, dei' Dembinai nofalas ea' sanda' maola Krais.

²³ God natalepa ma maol lu'unai Ananinai. Ea' ipe' ina pepe owina epes etapasi penda' maolanas, owa'.

²⁴ Ipe' alupipei, maina maol epen inima nali' nanda'anai ma God dei' nofalan enin nepoma maol anama atona ma naep Godi.

Basefa amam nematawa owa' seandaso'amai

²⁵ Amam nematawa isima ata' owa' seandaso'amai, ae' mi'uli Dembinai owa'ma ie'ipas ea' awalapa nomonas ae'ami atom a'ipipa. Anan nati uwahipiwi nagiambame ea' nanda'e anda' maol Ananinai andeande'. Ea' ipe' peme' basef ae'ami andeande'.

²⁶ Ama nogota anae' dei' nimanimi lu'wami mataga, na'ama ipe' andeande'ma ipe' hipei pepe na'ama etin si'i dei' pape.

²⁷ Ine' nali' naso' nemata'w ea', ina nokwaho', owa'. I'i ine' ata' owa' neaso' nemata'wi, ina okom ni'i ano'w nefa'akw owa'.

²⁸ Ea' i'i ine' nefa' nemata'w, ina nanda' waf aonai, owa'. Ea' i'i nemata'w awiawai'wi kwoso' aman, akwa'w ina kwanda' waf aonai, owa'. Ea' amam nematawa sandaso'amai esis anona nemaf sofa' nimanimi lu'wami etap anae'. Andaiwa'ma nimanimi amama meatagamepa.

²⁹ Ipe' alupipei, a'i basef ae'ami ofagema na'ama. Dei' nogota anae' ea' bandana ma etap anae' na'i higililona. Amama atom dei' ipe' amam paso' nematawai pepe si'i nematawa a'ipei.

³⁰ Ea' epes isima sawa salifi sope si'i isima owa' sowa salifi. Epes sandanifel sope si'i isima ina sandanifeli. Ea' isima satala amamaga sope si'i sumafi amamaga amama na'a, owa' asasimi.

³¹ Epes isima sanda' maola amamaga etapami, sope si'i isima owa' ukup mimila amamaga etapami. Dei' main, ape' mogawa, ina nogota laona, amamaga amama hiami moloma etap anae' anona nemaf mefe' hil'ilam.

³² Ae' a'i ipe' opalef mope awanem, andaiwa'ma amamaga mamumami mohambombaga ukup ipe'imi. Amam owa' measo' nematawai ukup matamea ma maol Dembinai ma'i monda' amamaga Dembinai okom na'iami.

³³ Ea' amam amama maso' nematawai, ukup amamumi matamea ma amamaga etapami atom. Ma'i monda' hiahaoma awo wauhiamawa ukup awaumi ma'iami.

³⁴ Ea' ukup amamumi mandawal biefim. Ea' nemata'w awiawai'wi ata' owa' kweaso' aman, okom natanea endilisi ma maol Dembinai. Akwa'w okom na'i konda' maola Dembinai atona. Ea' nemata'w kwaso' amani, okom natanea ma amamaga etapami atom kwa'i konda' waf waulunama'w okom na'ianai.

³⁵ Ae' a'i basef amama ma igiambamepa pepe andeande'. Amama ina mohopa eaf ma ipe', owa'. Ae' a'i ipe' pepe andeande' penda' waf bu'unai penda' maol Dembinai atona ma anom amamaga ina momboma ukup ipe'imi, owa'. Ipe' pepe ukup etifim endilisi.

³⁶ I'i anona aman okom na'i anan ina nanda' waf bu'unai ma nemata'w awiawai'wi esis sandandepamana'wi ea' okom ananinai nohafema akwa'w ma owa' nieti anona eaf, anan nila okom ananinai nose'akw, ea' andeande'. Anan ina nanda' waf aonai, owa'. Esis bias sondase'ama.

³⁷ I'i anan owa' okom biefina ma akwa'w, nope la'ifina okom ananinai andeande' ni'iam ni'i akwa'w kope etin, na'amai andeande'.

³⁸ Ea' emi aman naso' nemata'w anani'wi ea', anan nanda' waf bu'unai. Ea' emi aman ata' owa' nease'akwi, anama nanda' waf bu'unai endilisi.

³⁹ I'i anona aman naso' nemata'wi ina dei' naga', nemata'w akwama anani'wi ata' kwape la'ifikw kwalomana. Ea' i'i waulunama'w akwa'unai noga', ina ata' anom amamaga motagamo'w, owa'. Akwa'w okom na'i kwoso' aman dambainai wapoti', wila kose'ana. Ea' akwa'w koso' aman Kristen.

⁴⁰ Ea' ae' okom na'i na'ama. I'i akwa'w kope na'a, kondanifel endilisi. Koso' aman dambainai, ina kwandanifel, owa'. Okom ae'anai a'i basef amama ea' ae' okom na'i ae' wapoti' efa' Ambal Bu'unai Godi nape ae' nihi'ambe basef amama.