1 Korin 6 - Basef Buꞌwami Godi

Kristen ina sonda' kotima sahin owan, owa'

¹ I'i enin epen la'afena ipe' nenda' basef mila enin epen, ina andeande'ma epen inima netopa'ma esis amam nematawa Godi sope ma nefe' nenda' kota naep amam dembemi jas mololama Godi. Na'ama owa'. Andeande'ma epen inima ambal aona nefe' nenda' kota naep amam jas mololama Godi.

² Ape' amam nematawa Godi anona nemaf mowaloga waf epes hiesi etapasi hi'ilas. Ipe' pegawa amama o owa'? A'i ipe' owa' la'ifipama ata' pewaloga basef so'umi mamumami ipe'imi?

³ Ape' anona nemaf mowaloga waf amam enseli wapoti'. Ipe' pegawa amama o owa'? Amama atom dei' la'ifipa endilisi ma pewaloga basef amamaga ipe'imi.

⁴ Ea' i'i ipe' anom basefa amamaga ipe'imi, ipe' pendandepa anom amam agof a'ami ma sios ma mowaloga basef amama.

⁵ Ae' anda' basef amama ma monda' ambagof ipe'imi aom. Dei' main? Gawaimi ipe'imi hiami mape la'afena ipe' amam la'ifima mowaloga anom basef motaga la'afena sahin owan bias ipe'isi.

⁶ Ea' dei' enin epen alipini nanda' kotima sahin owan ananini ma naep amam dembemi jas owa' mombale'efa Kraisi.

⁷ Ipe' panda' kotima esis alupisi ea' amama atom dei' sihi'amba ae' ipe' pewa ea'. Dei' maina owa' pepe pitilisa sonda'mepa waf aonai? Ea' owa' pi'i aho'mas sofa' anom amamaga ipe'imi?

⁸ Penda'am na'ama owa'. Ea' ipe' panda' waf aonaima enis epes pefa' amamaga asasimi! Ipe' panda' waf na'amai ma esis alupusi endilisi ipe'isi etis.

⁹ Emi egafis sanda' waf aonai, anona nemaf ina sefe' wambel Godi, owa'. Ipe' pegawa amama o owa'? Na'ama ipe' pembaso'ma ukup ipe'imi atom. Epes sanda' waf aonai ma so'a waola enis amam nematawa saloma epes isima sanda' lotuma god baso'omunai saloma epes sahambombaga waf daso'amainai saloma amam amama ukup ma'i waf nematawainai saloma amam amama manda' waf aonai maloma anom amami

¹⁰ saloma isima sanda' wali saloma epes kowalasa amamaga enis epesi sa'i sofa'am etini saloma epes isima sa' embel sahaga sagaol saloma epes isima sa'i basef awami findiwaimi ma enis epes ea' isima sanda' wal sahambombaga epesi, epes isima na'amaisi ina anona nemaf sefe' wambel Godi, owa'etin.

¹¹ Fowa' enipa panda' waf anama. Ea' dei' God nasa'opepa nosahe'epa ea' Ananipei etipa si'ipa. God nanda'epa pataga epes bu'upei ma naep Ananimi. Anan nanda'epa na'ama etina agel Dembinai Jisas Kraisi ma Ambal Bu'unai God ape'inai.

Alop ape'inai nope bo'ona ma mefela agel Godi

¹² Endilisi, anom basef mape ma'i, “Amamaga hiami andeande'ma ae' enda'am.” Ea' amamaga amama nambimb enda'ami ina migiambame, owa'. Basef amama ma'i, “Amamaga hiami andeande'ma enda'am.” Basef amama mape, ea' ae' ina i'i aho'ma anom amamaga mope lu'um mombale'e, owa'.

¹³ Ea' enis epes sa'i, “Gwa'aimi amama, alopi atom ea' alop napoma nea' gwa'aimi atom.” Ea' amamaga amama biefim, alop naloma gwa'aimi, anona nemaf God nohambombagam atom hi'ilam. God ina nanda' alop ape'inai ma nonda' waf aonai so'a waolanai, owa'. Anan nanda'ana nonda' maol Ananinai atona bu'unai. Ea' Anan Dembinai ma alop ape'inai numafiana.

¹⁴ Ama pepel Ananinai atona nafela Dembinai nohafel hi'agif ea' anona nemaf na'ama etina nofelapa mohafel hi'agif wapoti'.

¹⁵ Alop ipe'inai alop wa'wa'ana Kraisi atona. Amama ipe' pegawam o owa'? Ea' dei' ipe' pa'i ae' etopa' anona alop wa'awa'ana Kraisi esana noloma alop ano'w nemata'w kwanda' so'a wauli? Owa'etin!

¹⁶ Amam emi egafim mofa' alop amamunai mosana noloma alop ano'w nemata'w kwanda' so'a wauli, amam mataga alop etifina maloma akwa'w. Ipe' pegawa amama o owa'? Dei' main, Baibel na'iam ea' waf anama daso'amainai bu'unai na'i, “Esis bias sataga alop etifina ma waf anama.”

¹⁷ Ea' emi egafis sope la'ifis soloma Dembinai, sataga ukup etifim salomana, si'i epen atotona.

¹⁸ Ipe' pekwaha waf aonai so'a waolanai pefa' pefe'. Anona waf hianai aonai sanda'ana alop ande' atogon. Ea' epen nanda' waf aonai so'a waolanai nanda' waf aonai ma alop ananinai atona.

¹⁹ Alop ipe'inai ipat bu'unai Ambal Bu'unai Godi. Ipe' pegawa amama a owa? Ambal anama nosahe'epa ea' nape nomona ipe'. Ipe' ina ipe' etipa, owa'. Ipe' ananipei etipa si'ipa.

²⁰ God natalepa ma maol lu'unai endilisi. Amama atom dei' pefela agel ananinai lu'una ma alop ipe'inai.