1 Korin 5 - Basef Buꞌwami Godi

Waf aonai so'a waolanai nape Korin

¹ Anom basef matagama ae' ma'i waf anama aonai so'a waolanai napoma ipe'. Waf aonai endilisi nahambombaga daso'amai, waf anama epes isima sololama Godi ina sanda' anona waf aonai na'amai, owa'etin. Waf anama na'ama. Anona aman naso' nemata'w komafianai ahalomana nase'akwi.

² Dei' ipe' ata' patopa' basef pafela agof ipe'imi atom ma waf anama aonai ma main? Na'ama owa'. Andeande'ma opalef ipe'imi mope si'ima lef ipe'inai ma pelopa waf anama aonai. Ipe' pili'amona aman anama nanda' waf anama ma ina ata' nope wapoti' nolomepa, owa'.

³ Endilisi, alop ae'anai nape laogona ipe', ea' ambal ae'anai nape nalomepa. Ae' si'i endilisi ape alomepa ma awaloga waf aman anama nanda'anai aonai.

⁴ Dei' a'iam na'ama. Nemaf anama ipe' pendakolasanai ma agel Dembinai Jisasi, ambal ae'anai noloma pepel Dembinai ape'inai Jisasi amama mope molomepa nemaf anama.

⁵ Ape' miliamonago aman anama nefe'mago Satana nohambombaga alop noloma okom apinai ananinai. Monda'am na'ama ma God nofa'ai ambal aman anama nemaf Dembinai akutainai.

Esis Korin sokwahago yis amama apimi womun etina aman anama aonai nanda' so'a wauli

⁶ Ipe' patopa' basef pafela agof ipe'imi atom lu'um pati waf anama aonai napomepa, amama ina waf bu'unai, owa'etin. Ipe' pegawa ea' basefa mi'uli anama ma yis amama manda' bret natifi na'i, “Yis kwawie'im manda' bret hianai hi'alana natef lu'una.”

⁷ Ea' ipe' pekwaha yis amama apimi ma pepan si'i bret dambainai yis a'anai, si'i endilisi ipe' pataga epes dambaipei. Dei' main, sipsip sondolali sahanama gwa'aimi lu'wami Pasovai anan Krais, esis sahana naga' ea', si'i sondolali gwa'aimi mafis maima God.

⁸ Ape' monda' gwa'aimi amama lu'wami Pasova, ape' ina mofa' yis amama apimi, owa'. Amama si'i waf aonai. Ape' mofa' bret wafinai yis a'anai, amama si'i waf ukup bu'wamunai basef endilisimi.

⁹ Anom basef ali' anda'am mafe'ma ipe', a'iam na'ama. “Ipe' ina pefala epes isima sanda' waf aonai so'a waolanai pi'i alupusi, owa'.”

¹⁰ Ae' ina a'iama pekwaha epes isima sanda' waf aonai so'a waolanai, o epes isima kowalasa amamaga enis epesi o epes isima sanda' wali o sahambombaga enis epesi soloma isima sanda' lotuma god baso'omunai, owa'. I'i ipe' pi'i pekwahis endilisi, pekwaha etap anae' hi'ilana.

¹¹ Ea' basef dei' anda'ami ofagema na'ama. I'i anona aman ipe' pefalona owalomepa ipe'inai nonda' waf aonai so'a waolanai o kowalanama amamaga enis epesi o nonda' lotuma god baso'omunai, ni'i basef neso' alafuga enis epes, nea' embel nohaga nogoul, nonda' wal, nohambombaga enis epes, ipe' ina pefalona alupunai ipe'inai pi'i basef pelomana, owa' hapainai. Ipe' ina pea' gwa'aimi peloma epes na'amaisi wapoti', owa'.

^12-13 Maol sowaloga epes sape ande'ma siosi ina maol ae'anai, owa'. God atona anona nemaf nowaloga waf epes isima. Ea' maol sowaloga epes sape nomoni, amama maol ipe'inai, ipe' penda'ana. “Ipe' galo'manago aman aonai nape la'afena ipe' nanda' waf aonai.”