1 Korin 4 - Basef Buꞌwami Godi

Anona nemaf Dembinai atona nowaloga amam manda' maol Ananinai

¹ Ipe' pegawa afa' wanda' maol Kraisi umafi basef endilisimi Godi fowa' mape mandambahi'i dei' mataga mandawalap alihim.

² I'i aman dembinai nose'ana maol enin epena nimafianai, enin nimafiana nenda'ana andeande' hi'ilana.

³ I'i ipe' pewaloga waf ae'anai ma enis epes sonda'me kot sowaloga waf ae'anai, ae' okom na'i amama falafumi atom. Ae' wapoti' ae' atowe ina awaloga waf ae'anai, owa'.

⁴ Endilisi, basef mape opaf ae'anai nomon ma'iami ae' ina ati anona waf aonai anda'anai, owa'. Ea' amama ina mihi'ambe endilisi ma i'i, “Ae' epen bu'uwei andeande',” owa'. Anona nemaf Dembinai atona nowaloga waf ae'anai.

⁵ Ea' dei' nogota dende'anai ata' owa'. Ipe' owa' pewaloga waf enin epen nanda'anai, owa'. Ipe' ata' pepe pehafa nemaf anama Dembinai niefi'ianai. Nemaf anama anan nowalapai amamaga hiami mandamabaho' mape akoti motaga mondawalap howalagoma. Nemaf anama Anan nowalapa ukup epes hiesi mape mandambahi'i motaga mondawalap alihim. Ea' God ni'ipapa basef ananimi ape' hiapai atona etin mondahama maol ape' manda'anai, bo'ona o aona.

Esis Korin safela agof asasimi atom

⁶ Alupipei, ae' okom na'i igiambamepa. Amama atom ae' aloma Apolos wihi'ambepa basef amama do'ok a'ipipami ofagema ma waf afa'inai. Afa' wanda'am na'ama ma ipe' pelafa waf ape'inai basef amama ofagema ma'iam ma'i, “Ipe' ina pimbisila' mi'uli anama, owa'.” Ea' dei' ipe' ina pesambala basef pefela agola anona aman, owa'.

⁷ Alupipei, ipe' ukup mape ma'imama? Emi nanda'epa pape dembipei pikila' enis epes? Amamaga amama hiami God atona nase'epam. Ea' ipe' ina pesambala basef pi'i ipe' etipa dembipei la'ifipei, owa'. Amamaga amama hiami ipe'imi, God atona nase'epam.

⁸ Endilisi, opalef ipe'imi si'im ea'! Ipe' amamaga hiamipei si'ipa dende'! Ipe' pikila'afa pataga dembipei king! Uwahipipa! Ae' okom na'i endilisi ma petaga pepe dembipei king nambimb ope dembifai king olomepa!

⁹ Ae' okom na'i na'ama a'i God nanda' afa' aposel si'i epes sape agof a'asi sagi' endilisi. Epes hiesi hi'alas sape ilif etapi saloma amam ensel wapoti' satolofa wandahama epes isima atuwasi sohas seaga'i.

¹⁰ Afa' wape si'i epes ukup maso'asi ma ofela agel Kraisi, ea' ipe' pape epes gawaipei ma waf Ananinai. Afa' owa' la'ififa, ea' ipe' la'ifipa. Ipe' agof lu'wami, afa' agof a'afa.

¹¹ Fowa' gani wapoti' nafi'i nataga nogota anae' wape nolomahafa batag fafatimufa endilisi, ea' luwaguf hiahaom a'afa. Esis sumagwi lagof sahafa etin. Afa' wambel a'afa ma ofe' weape andeande'.

¹² Wanda' maol lu'unai endilisi ma lagof afa'imi atom. Esis sa'i basef sanda'afa findiwafa ea' afa' la'ififa ofalo'mas wagwamasa basef bu'wami atom. Esis sanda'afa aofa, wape la'ififa watilis, afa' ina wagwamas, owa'.

¹³ Esis sa'ipafa basef awami endilisi ea' afa' wagwamasa basef awanemi sa'osa'ombel. Wataga si'i alufuta awasimi endilisi ma etap hiagoma si'i alogw maimailami, si'i etap awagoma alufuta nana'oma. Fowa' gani wape na'ama etin wafi'i wataga dei'.

Pol na'ipa esis Korin na'i, “Pila waf ae'anai.”

¹⁴ Ae' ina anda' basef amama ma monda'epa ambagof ipe'imi aom, owa'. Ae' okom nainailipa si'i awasi ae'ipei, a'i iwalapa nomonas ipe'imi.

¹⁵ I'i endilisi ipe' amam mowalipipa basef Kraisi 10,000-peleim ea' hapaimi, ahapepa ipe'imi ina hiam, owa'. Waf Krais Jisasi atona ae' atowe ape ahalomepa ipe'iwei, ipe' pataga batawisi ae'ipei ma basef bu'wami Godi awalipipami.

¹⁶ Amama atom dei' afela ukup ipe'imi ma pila waf ae'anai pefe'.

¹⁷ Ea' asapa' Timoti nafe'mago ipe'. Anan nogalome ae'anai wanda' maol Dembinai. Anan numafi maol anama andeande'. Ae' okom nailana endilisi, dei' asapa'ana ma nambimb nefela ukup ipe'imi ma basef mihi'ambepa fe' pe ae'ami aila waf Kraisi. Ae' awalipa esis amam nematawa Godi sape wambel anama hiagoma ma basef maloma waf ae'anai ea' amama atom.

¹⁸ Ipe' enipa ukup ma'i ae' nambimb ina efo'o itilipa ea' dei' pesambala basef ae'ami.

¹⁹ Owa'etin. I'i Dembinai ni'i a'e, na'ama efe'mago ipe' mehip. Ea' ae' ina efe'mago ipe'ma egawa basef amam masambala basef ae'ami ma'iami atom, owa'. Basef amamumi hapaimi. Ae' a'i efo'o egawa waf naloma maina maol Godi amam manda'anai.

²⁰ Dei' main, ofagema amama ma epes isima suwis wambota Godi numafias, amama ina amamaga ma'iam etin, owa'. Amama ina basef atom, owa'. Amama pepel Godi atona.

²¹ Ipe' ukup ma'i maina waf, pa'i efa'ago bumbulita okom wandafunai efo'o ma ihi'ambepa, o pa'i efa'ago waf okom nainailipa efe'mepago? Amama nomonas ipe'imi atom.