1 Korin 3 - Basef Buꞌwami Godi

Amam manda' maol siosi amama manda' maol Godi

¹ Alupipei, fowa' ae' ina a'ipipa basef si'i a'ipasam epes isima saila okom Ambal Bu'unai Godi, owa'. A'ipipam si'i a'ipasam epes isima ukup maso'asa basef ofagema Godi, si'i awasi ata' sa' nomagof atomi.

² Fowa' ase'epa nomagof atom. Ina dei' ase'epa gwa'aimi la'ifimi, ata' owa'. Dei' main, ipe' ina la'ifipa, ata' owa'. Ae' a'iam endilisi, ipe' dei' wapoti' ata' owa'.

³ Dei' main, ipe' ata' pape la'ela'ef paila waf etapanai. Endilisi, waf anama nawalapai waf kowalasanai naloma ukup aoma sahin owan ma basef safitapami ata' mape la'ela'efa ipe'. Amama mihi'amba ape' hiapai ipe' ata' paila waf anama aonai etapanai. Waf anama epes etapesi atona.

⁴ Enin epen na'i, “Ae' epen Poli.” Enin na'i, “Ae' epen Apolosi.” Waf anama nawalapa ipe' ata' pape si'i epes paila waf etapanai atona.

⁵ Ipe' ata' ukup motamea andeande'. Apolos emi egafuna? Ae' Pol emi egafowe? Afa' biafa wanda' maoli atofa. Dembinai nase'afa maol nandandafa. Ea' maol anama afa' biafa wanda'anai, eaf anama atona dei' ipe' pembale'efa Krais. Ape' hiapai manda' maol anama God nasi'ipami.

⁶ Ae' ali' awalipipa basef Godi si'i ewaha olelemb gwa'aimi, ea' Apolos nagi' nakolo' embel nasa'opam. Ea' God atotona nanda'am mataga.

⁷ Ea' dei' epen inima newaha olelemb gwa'aimi, enin agel a'ana. Ea' epen nakolo' embel nasa'opami enin wapoti' agel a'ana, ea' God nanda' gwa'aimi amama matagai, Anan nefa' agel lu'unai.

⁸ Ea' epen inima newaha olelemb gwa'aimi naloma epen inima nakolo' embel nasa'opami, esis bias sanda' maol anama atona. Ea' esis bias atona etin anona nemaf sofa' amamaga mandahama maol sanda'anai.

⁹ Afa' biafa wanda' maol etifinama God. Ea' ipe' si'i aof Ananinai. Ea' ipe' si'i ipat Godi.

Amam manda' maola siosi si'i manda' ifagwi

¹⁰ God nandahome. Ea' Anan nanda' ae' ataga ape si'i epen gawainai nanda' ifagwi. Ea' awa olaf nape nali'i ea' enis sala' ipat natomana. Ea' epes hiesi atona etin sundumafuma andeande' sola' ipat notoma olaf anama.

¹¹ Ipe' pegawa God nanda' Jisas Krais nape nali' si'i olaf notawa nali'i. Amama atom ina ata' enin epen la'ifina newa anona olaf wapoti', owa'etin.

¹² I'i emi egafis si'i sola' ipat notoma olaf anama ilifi sola'ana, esis sonda' gol sola'ana o sonda' siliwa sola'ana, o sonda' anom otamba salatamami sola'ana, o sonda' lawah o sonda' walol o otalef alimi sola'ana.

¹³ Nemaf anama Krais niefi'ianai maol anama epes hiesi sanda'anai notaga nondawalap alihina nope bo'ona o aona. Nemaf anama notaga noloma nif lu'wami. Ea' nif amama mondo maol anama hianai ma epes hiesi atona etin hi'ilasa sogawa maol asasinai bo'ona o aona.

¹⁴ I'i enin epen nola' ipat notoma olaf anama ilifi ma nif owa' fendona, anona nemaf nefa' anom amamaga bu'wami.

¹⁵ Ea' i'i ipat epen nanda' maoli fendona hi'ilana, anona nemaf ina nefa' amamaga bu'wami, owa'. Endilisi God nofa'ana notanimani, ea' amamaga a'ana nepe na'a si'i epen netanima nandalo' nifi.

Sios amam nematawa Godi si'i ipat lu'unai Ananinai

¹⁶ Ipe' pegawa o owa'? Ipe' etipa si'i ipat lu'unai Godi, ea' Ambal Bu'unai Ananinai nape nomona opalef ipe'imi.

¹⁷ I'i emi egafis sohambombaga ipat anama Godi, anona nemaf God nohambombaga epes isima. Dei' main, ipat anama Ananinai bo'ona andeande'. Anama ea' ipe' etipa.

Ape' ina mefela agof epesi, owa'

¹⁸ Na'ama ipe' pembaso'ma ipe' etipa. I'i emi egalin ipe'inai okom ni'i enin gawaini si'i epes etapasi sofalasi, epen inima andeande'ma nemboma okom ananinai ata' netaga okom nahaga nagaolani nili' ma nambimb netaga epen gawaini endilisi.

¹⁹ Dei' main, gawa etapanai anama falafunai si'i basef epes ukup maso'asi sa'iami ma naep Godi. Si'i Baibel na'iam na'i, “God nofa' epes gawaisi ma waf gawainai naninani asasinai atona baso'omainai si'i epes saha mafis esalef.”

²⁰ Ea' Baibel na'iam wapoti' na'ama na'i, “Dembinai nogawa nomonas epes gawaisi falafumi atom.”

²¹ Ea' enin epen ina nefela agof ape' epesi, owa'. Amamaga hiami ipe'imi atom.

²² Pol naloma Apolos naloma Pita, amam ipe'imi atom. Etap anae' naloma ambal namunai naloma ga' naloma amamaga dei' mapani, anona nemaf migi' meatagai, amama hiami ipe'imi atom.

²³ Ea' ipe' epes Krais Jisasi ea' Anan Godi.